Read Revised Akuapem Twi DC-KYERƐW KRONKRON Amos 4 Bible Online

Amos 4 - Revised Akuapem Twi DC-KYERƐW KRONKRON bible

Amos 4

¹Muntie asɛm yi, Basan anantwibere a mowɔ Samaria bepɔw so, mo a mumia abrɛfo na mohyɛ ahiafo so, na moka kyerɛ mo wuranom sɛ: Fa bra na yɛnnom no.

²AWURADE Nyankopɔn aka ne kronkronyɛ ho ntam sɛ: Hwɛ, nna bi bɛba mo so a wɔde ntɔnkɔgye bɛtwe moakɔ, ne mo akyirikafo nso, apofofo nnarewa ano.

³Na ɔfasu tokuru mu na mobɛfa apue, obiara bɛfa n’anim tee afi adi, na wobesunsum mo akyene Harmon, AWURADE asɛm ni.

⁴ Monkɔ Betel nkɔto mmara, monkɔ Gilgal mma mmarato nnɔɔso, na momfa mo kum afɔre mmra daa anɔpa, ne mo ntotoso du du daa nnansa.

⁵ Na momfa mmɔkaw abodoo nhyew aseda afɔre, na mompae ayamye ayɛyɛde mma wɔnte. Na saa na mopɛ, mo Israelfo, AWURADE Nyankopɔn asɛm ni.

⁶Na me nso memaa mo se so daa mpan, mo nkurow nyinaa mu, na mudii aduankɔm mo tenabea nyinaa mu; nanso moansan amma me nkyɛn, AWURADE asɛm ni.

⁷ Na me nso mekamee mo osutɔ asram abiɛsa a edi otwa anim no mu, na metɔɔ osu guu kurow biako so, na mantɔ bi angu kurow biako so; afuw biako nyaa osu, na afuw a ebi antɔ angu so no hyewee;

⁸na nkurow abien anaa abiɛsa kyinkyin kɔɔ kurow biako so kɔnom nsu, nanso wɔammee; nanso moansan amma me nkyɛn, AWURADE asɛm ni.

⁹ Memaa ɔyow ne ɔpo baa mo so; mo nturo ne mo bobe nturo ne mo borɔdɔma ne mo ngo nnua dodow no ntuntummɛ wee; nanso moansan amma me nkyɛn, AWURADE asɛm ni.

¹⁰ Mesomaa ɔyaredɔm a ɛte sɛ Misraim de baa mo mu, mede afoa mikunkum mo mmerante, na mefaa mo apɔnkɔ nnommum, na memaa mo nsra mu hua kankan hyɛn mo hwene mu; nanso moansan amma me nkyɛn, AWURADE asɛm ni.

¹¹ Mibutuw mo mu binom, sɛ mibutuw Sodom ne Gomora no, na moyɛɛ sɛ gyentia a wɔatu afi ogya mu; nanso moansan amma me nkyɛn, AWURADE asɛm ni.

¹²Enti sɛɛ na mɛyɛ wo, O Israel; esiane sɛ mɛyɛ wo sɛɛ nti, siesie wo ho kohyia wo Nyankopɔn.

¹³ Na hwɛ, nea ɔnwenee mmepɔw na ɔbɔɔ mframa na ɔkyerɛ onipa nea ɛwɔ n’adwenem no, nea ɔyɛ adekyeehema ne kusuu na otiatia asase sorɔnsorɔmmea so no, Awurade, asafo Nyankopɔn ne ne din.