Read Revised Akuapem Twi DC-KYERƐW KRONKRON Obadia 1 Bible Online

Obadia 1 - Revised Akuapem Twi DC-KYERƐW KRONKRON bible

Obadia 1

¹ Obadia anisoadehu ni. Sɛ AWURADE Nyankopɔn ka Edom ho ni: Yɛate AWURADE anom asɛm, na wasoma abɔfo akɔ amanaman mu sɛ: Monsɔre na yɛnsɔre nhyɛ no ne no nko.

²Hwɛ, mayɛ wo amanaman mu ketewa, wɔabu wo animtiaa pa ara.

³ Wo koma ahantan adaadaa wo, wo a wote ɔbotan ntokuru mu, nea ɛhɔ korɔn ne w’agua, wuse wo koma mu sɛ: Hena na obetumi ayi me asi fam?

⁴Sɛ woma wo ho so sɛ ɔkɔre, na sɛ wode wo berebuw si nsoromma ntam mpo a, ɛhɔ na mɛfa wo afi aduru, AWURADE asɛm ni.

⁵Sɛ awifo, sɛ anadwo adwowtwafo ba wo so a, ao, woasɛe dɛn ara, so anka wɔrenwia nea ɛbɛso wɔn? Sɛ obobe abatewfo ba wo so a, so anka wɔremma mpɛpɛwa nka anaa?

⁶Na wo Esau de, hwɛ wɔapra w'ade mu na wɔapɛ n’ahentade dɛn ara!

⁷Wɔn a wɔne wo wɔ apam nyinaa adaadaa wo, wɔapam wo abedu ɔhye so; wɔn a wo ne wɔn te asomdwoe so adaadaa wo afa wo so; wɔn a wodii w’aduan asum w’ase afiri; nhumu abɔ no.

⁸So ɛnyɛ ɛda no, AWURADE asɛm ni, na mɛsɛe anyansafo afi Edom, ne nhumu afi Esau bepɔw so?

⁹Teman, wo nnɔmmarima bo betu, na wɔde kum atwa nnipa nyinaa afi Esau bepɔw so.

¹⁰ Atirimmɔden a wode bɔɔ wo nua Yakob nti na aniwu bɛkata wo ho, na wɔatwa wo akyene akosi daa.

¹¹Ɛda a wubegyinaa ntentenso, ɛda a ananafo faa ne dɔm nnommum kɔe, na ahɔho hyɛn ne kurow apon mu na wɔtwee Yerusalem so ntonto no, ɛno mu na wo nso woyɛe sɛ wɔn mu biako.

¹² Nanso ɛnsɛ sɛ anka wode anigye hwɛ wo nua, ɛda a abu buu no no; ɛnsɛ sɛ anka w’ani gye Yuda mma ho, wɔn sɛe da no; ɛnsɛ sɛ anka wohyehye wo ho, ahohia da no;

¹³ɛnsɛ sɛ anka wohyɛn me man kurow pon no mu, wɔn amanehunu da no; ɛnsɛ sɛ anka wode anigye hwɛ wɔn amanehunu, wɔn amanehunu da no; ɛnsɛ sɛ anka woteɛ wo nsa so wɔn ahode mu, wɔn amanehunu da no;

¹⁴ɛnsɛ sɛ anka wugyina nkwanta so twitwa ne mfimufo gu, na ɛnsɛ sɛ anka wuyi ne nnipa a wɔaka no ma, ahohia da no.

¹⁵ Na AWURADE da no abɛn, amanaman nyinaa so; sɛnea woyɛe no, saa ara na wɔbɛyɛ wo, wo nneyɛe bɛsan abebua w’atifi.

¹⁶ Na sɛnea amanehunu boroo me man Yuda sɛ nsa me bepɔw kronkron no so no, saa ara na ɛbɛboro amanaman nyinaa daa yi, amanehunu bɛmene wɔn na wɔn ase ahyew koraa.

¹⁷ Na Sion bepɔw so de, mfimufo bɛtena hɔ, na ayɛ kronkronbea, na Yakob fi bɛfa wɔn agyapade adi so.

¹⁸ Na Yakob fi bɛyɛ ogya, na Yosef fi ayɛ ogyaframa, na Esau fi ayɛ sakran, na wɔadɛw wɔn mu ahyew wɔn a obiara renka mma Esau fi, efisɛ AWURADE na waka.

¹⁹Na anafo famfo bɛfa Esau bepɔw adi so, na asasetaw sofo bɛfa Filistifo de adi so, na wɔbɛfa Efraim asase ne Samaria asase adi so, na Benyamin afa Gilead adi so.

²⁰Na dɔm yi a ɛyɛ Israel mma de no nnommum a wɔwɔ Kanaanfo mu no bedi asase no so de akosi Sarefat, na Yerusalem nnommum a wɔwɔ Sefarad no bɛfa nifa mu nkurow no adi so.

²¹Na agyefo bɛforo aba Sion bepɔw so abedi Esau bepɔw no so, na ahenni no bɛyɛ AWURADE dea.