Read Revised Akuapem Twi DC-KYERƐW KRONKRON Numeri 12 Bible Online

Numeri 12 - Revised Akuapem Twi DC-KYERƐW KRONKRON bible

Numeri 12

¹ Na Miriam ne Aaron kasa tiaa Mose sɛ ɔwaree Kusni bea, efisɛ na waware Kusni bea bi.

²Na wɔkae sɛ: So Mose nko so na AWURADE nam kasa, na ɔmfa yɛn so nso nkasa? Na AWURADE tee.

³Na ɔbarima Mose de, odwo pii sen nnipa a wɔwɔ asase so nyinaa.

⁴Ɛnna AWURADE ka kyerɛɛ: Mose ne Aaron ne Miriam mpofirim sɛ: Mo baasa mumfi adi mmra ahyiae ntamadan no ho.

⁵ Na wɔn baasa no fii adi. Na AWURADE sianee omununkum dum mu begyinaa ntamadan no ano, na ɔfrɛɛ Aaron ne Miriam; na wɔn baanu fii adi.

⁶Na ɔkae sɛ: Muntie me nsɛm a sɛ AWURADE diyifo bi wɔ mo mu a, adehu mu na mema ohu me, ɔdae mu na mekasa mekyerɛ no:

⁷ ɛnyɛ sɛ m'akoa Mose te ne no, Ɔno na mede me fi nyinaa ahyɛ ne nsa;

⁸ ano ne ano na me ne no de kasa ohu mu, na ɛnyɛ mmebu mu, na ohu AWURADE suban: na ɛdɛn nti na moansuro sɛ mobɛkasa m'akoa Mose?

⁹Na AWURADE bo fuw wɔn, na osiim kɔe.

¹⁰ Na omununkum no fii ntamadan no so, na hwɛ, Miriam ayare kwata sɛ sukyerɛma. Na Aaron dan n'ani hwɛɛ Miriam, no hwɛ, na wayare kwata.

¹¹Na Aaron ka kyerɛɛ Mose sɛ: Mepa wo kyɛw, me wura. Mfa bɔne a yɛadi nkwaseasɛm ayɛ yi nto yɛn so.

¹²Mma ɔnnyɛ sɛ funu a ofi ne na yam bae na ne honam fa asɛe dedaw.

¹³ Na Mose su frɛɛ AWURADE sɛ: O, Onyankopɔn ee, sa no yare ɛ!

¹⁴ Na AWURADE ka kyerɛɛ Mose sɛ: Na sɛ n'agya hinam n'ani so ntasu teta po a, anka n'ani renwu nnanson anaa? Wɔnto ne mu nnanson nsra no akyi, na ɛno akyi ansa na wɔmfa no mmra mu bio.

¹⁵Na wɔtoo Miriam mu nsra no akyi nnanson. Na ɔman no antu kosii sɛ wɔde Miriam baa mu bio.

¹⁶Na ɛno akyi no, ɔman no tu fii Haserot, na wɔkɔbɔɔ nsra Paran sare so.