Read Revised Akuapem Twi DC-KYERƐW KRONKRON Numeri 13 Bible Online

Numeri 13 - Revised Akuapem Twi DC-KYERƐW KRONKRON bible

Numeri 13

¹ Na AWURADE kasa kyerɛɛ Mose sɛ:

²Fa mmarima soma wɔn, na wɔnkɔsra Kanaan asase a mede merema Israelfo no; monsoma ɔbarima biako mfi wɔn agyanom abusuakuw biara mu, na wɔn mu biara nyɛ wɔn mu mmapɔmma no bi.

³Na Mose nam AWURADE asɛm so somaa wɔn fii Paran sare so, wɔn nyinaa yɛ mmarima a wɔyɛ Israelfo mu atitiriw.

⁴Na wɔn din ni: Ruben abusuakuw mu de ne Sakur ba Samua;

⁵Simeon abusuakuw de, Hori ba Safa;

⁶ Yuda abusuakuw de, Yefune ba Kaleb;

⁷Isakar abusuakuw de, Yosef ba Igal;

⁸ Efraim abusuakuw de, Nun ba Hosea;

⁹Benyamin abusuakuw de, Rafu ba Palti;

¹⁰Sebulon abusuakuw de, Sodi ba Gadiel;

¹¹Yosef abusuakuw a ɛne Manase abusuakuw de, Susi ba Gadi;

¹²Dan abusuakuw de, Gemali ba Amiel;

¹³Aser abusuakuw de, Mikael ba Setur;

¹⁴Naftali abusuakuw de, Wofsi ba Nahbi;

¹⁵Gad abusuakuw de, Maki ba Geuel;

¹⁶ eyinom ne mmarima a Mose soma kɔsraa asase no. Na Mose frɛɛ Nun ba Hosea sɛ Yosua.

¹⁷Na Mose somaa wɔn sɛ wɔnkɔsra Kanaan asase no, na ɔka kyerɛɛ wɔn sɛ: Monkɔfa anafo fam ha yi, na monkɔforo mmepɔw no;

¹⁸na monkɔhwɛ asase no sɛnea ɛte ne aman a wɔtete so no, sɛ wɔyɛ den anaasɛ wɔagurow, wosua anaasɛ wɔdɔɔso,

¹⁹ne sɛnea asase a wɔtete so no te, sɛ ɛyɛ asase pa anaa bɔne, ne sɛnea nkurow a wɔtete mu no tetee, sɛ wɔtete nsra mu anaa aban mu,

²⁰ne sɛnea asase no te, sɛ emu yɛ bɛtɛɛ anaa kyenkyerenn, sɛ nnua wɔ so anaasɛ ebi nni so; na momfa akokoduru ntetew asase no so aba bi mmra. Nso saa bere no yɛ bobe aba a edi kan bere.

²¹Na wosiim kɔe kɔsraa asase no fi Sin sare so kosii Rehob, nea wɔnam kɔ Hamat no.

²²Na wɔforo faa nifa fam, na woduu Hebron, nea Anak mma Ahiman, Sesai ne Talmai wɔ. (Na Hebron no, wɔkyekyeree no mfe ason ansa na wɔkyekyere Soan a ɛwɔ Misraim).

²³Na woduu Eskol bon mu, na wotwaa obobe baa ne bobe kasiaw biako wɔ so wɔ hɔ, na nnipa baanu wuraa no dua, ne ateaa ne borɔdɔma.

²⁴Esiane sɛ: Israelfo no twaa obobe aba kasiaw wɔ hɔ no nti, wɔfrɛ hɔ Eskol: ase ne: Bobe kasiaw.

²⁵Na adaduanan dui no, wɔsan fii asase no sra bae.

²⁶Na wɔbaa Mose ne Aaron ne Israelfo asafo no nyinaa nkyɛn Paran sare so wɔ Kades, na wɔbɔɔ wɔn kaseɛ kyerɛɛ wɔn ne asafo no nyinaa, na wɔde asase no so aba no kyerɛɛ wɔn.

²⁷ Na wɔbɔɔ wɔn amanneɛ kyerɛɛ no sɛ: Yɛakɔ asase a wosomaa yɛn so no so, na ɛsen nufusu ne ɛwo [3] ampa, na ɛso aba ni.

²⁸Nanso amanfo a wɔtete asase no so no yɛ den, na nkurow no, wɔabɔ ho ban, ɛsosoe sɛ, na yehuu Anak mma nso wɔ hɔ.

²⁹Amalek te anafo fam asase so, na Hetifo ne Yebusifo ne Amorifo tete bepɔw so, na Kanaanfo tete mpoano ne Yordan ho.

³⁰ Na Kaleb dwudwoo ɔman no maa Mose, na ɔkae sɛ Momma yɛnkɔ nkɔforo, na yɛnkɔfa asase no; na otumi de, yebetumi wɔn.

³¹Na mmarima a wɔne no kɔe no kae sɛ: Yɛrentumi nkɔforo nhyɛ ɔman no, efisɛ wɔyɛ den sen yɛn.

³²Na wɔmaa asase a wɔkɔsrae no ho atenka bɔne trɛw Israelfo no mu sɛ: Asase a yɛfaa mu kɔsrae no yɛ asase a edi ɛsotefo, na nkurɔfo a yehuu wɔn wɔ so no nyinaa yɛ abran ara nko;

³³ na ɛhɔ na yehuu abran akɛse no, (Anak mma a wofi abran akɛse no mu no), na yɛyɛɛ yɛn ankasa ani so sɛ mmebɛw, na saa nso na yɛyɛe wɔ wɔn ani so.