Read Revised Akuapem Twi DC-KYERƐW KRONKRON Numeri 2 Bible Online

Numeri 2 - Revised Akuapem Twi DC-KYERƐW KRONKRON bible

Numeri 2

¹Na AWURADE kasa kyerɛɛ Mose ne Aaron sɛ:

² Israelfo no mmobɔ nsra wɔn mu biara wɔ n'ankasa frankaa ho, ɛne wɔn mpanyimfi nsɛnkyerɛnne; ahyiae ntamadan no ntentenso na wɔmmɔ nsra no nhyia.

³Wɔn a wɔmmɔ nsra apuei fam, no ne: Yuda nsra frankaa no ase nnipa, sɛ wɔn dɔm te. Yuda mma no safohempanyin ne Aminadab ba Nahasɔn,

⁴na ne dɔm a wɔkan wɔn no, yɛ ɔpeduɔsɔn anan ne ahansia.

⁵Na wɔn a wɔmmɔ nsra ntoa no so ne: Isakar abusuakuw. Isakar mma no safohempanyin ne Suar ba Netanel,

⁶na ne dɔm a wɔkan wɔn no, ɔpeduonum anan ne ahannan.

⁷Sebulon abusuakuw na ɛntoa so. Sebulon mma no safohempanyin ne Helon ba Eliab,

⁸na ne dɔm a wɔkan wɔn no, ɔpeduonum ason ne ahanan.

⁹Wɔn a wɔkan wɔn maa Yuda nsra no nyinaa si ɔpehaduɔwɔtwe asia ne ahanan, sɛ wɔn dɔm ahorow no te; wɔn na wontu kan.

¹⁰Ruben nsra frankaa ase nnipa, sɛ wɔn dɔm ahorow no te. Ruben mma safohempanyin Sedeur ba Elisur,

¹¹na ne dɔm a wɔkan wɔn no, ɔpeduanan asia ne ahanum.

¹²Na wɔn a wɔmmɔ nsra ntoa no so ne Simeon abusuakuw. Simeon mma no safohempanyin Surisadai ba Selumiel,

¹³na ne dɔm a wɔkan wɔn no yɛ, ɔpeduonum akron ne ahasa.

¹⁴Na Gad abusuakuw na ɛntoa so Gad mma safohempanyin Reuel ba Eliasaf,

¹⁵na ne dɔm a wɔkan wɔn, ɔpeduanan anum ne ahansia aduonum.

¹⁶Wɔn a wɔkan wɔn maa Ruben nsra no nyinaa si ɔpeha ne ɔpeduonum biako ne ahanan aduonum, sɛ wɔn dɔm ahorow no te. Na wɔn na wɔnto so abien ntu.

¹⁷Afei ahyiae ntamadan no ne Lewifo nsra no ntu nni nsra horow no ntam. Sɛnea wɔbɔ nsra no, saa ara na wontu, wɔn nyinaa wɔ wɔn dibea sɛ wɔn afrankaa no te.

¹⁸Efraim nsra frankaa nni atɔe fam, sɛ wɔn dɔm ahorow no te. Efraim mma safohempanyin Amihud ba Elisama,

¹⁹na ne dɔm a wɔkan wɔn no, ɔpeduanan ahannum.

²⁰Na Manase abusuakuw ntoa so. Manase mma safohempanyin ne Pedahsur ba Gamaliel,

²¹na ne dɔm a wɔkan wɔn no, ɔpeduasa abien ne ahanu.

²²Na Benyamin abusuakuw na ɛntoa so. Benyamin mma safohempanyin Gideoni ba Abidan,

²³na ne dɔm a wɔkan wɔn no, ɔpeduasa anum ne ahanan.

²⁴Wɔn a wɔkan wɔn maa Efraim nsra no nyinaa si nnipa ɔpeha ne awotwe ne ɔha, sɛ wɔn dɔm ahorow no te; na wɔn na wɔnto so abiɛsa ntu.

²⁵Dan nsra frankaa nni atifi fam, sɛ wɔn dɔm ahorow no te. Na Dan mma safohempanyin Amisadai ba Ahieser,

²⁶na ne dɔm a wɔkan wɔn no, ɔpeduosia abien ne ahansɔn.

²⁷Na wɔn a wɔmmɔ nsra ntoa no so ne Aser abusuakuw. Aser mma no safohempanyin Okran ba Pagiel

²⁸na ne dɔm a wɔkan wɔn no, ɔpeduanan biako ne ahanum.

²⁹Na Naftali abusuakuw na ɛntoa so. Naftali mma safohempanyin Enan ba Ahira,

³⁰na ne dɔm a wɔkan wɔn no, ɔpeduonum abiɛsa ne ahanan.

³¹Wɔn a wɔkan wɔn maa Dan nsra no nyinaa si ɔpeha ne ɔpeduonum ason ne ahansia; wɔn na wonni akyiri ntu sɛ wɔn afrankaa no te.

³² Eyinom ne Israelfo a wɔkan wɔn, sɛ wɔn mpanyimfi te; nsra ahorow no mu wɔn a wɔkan wɔn nyinaa, sɛ wɔn dɔm ahorow no te, si ɔpehansia ne abiɛsa ne ahanum aduonum.

³³ Na Lewifo no de, wɔankan wɔn amfra Israelfo no, sɛnea AWURADE hyɛɛ Mose no.

³⁴ Na Israelfo no yɛe, sɛnea AWURADE hyɛɛ Mose no nyinaa. Wɔbɔɔ nsra, sɛ wɔn afrankaa no te, na saa nso na wotui, wɔn nyinaa sɛ wɔn mmusua ne wɔn mpanyimfi te no.