Read Revised Akuapem Twi DC-KYERƐW KRONKRON Numeri 27 Bible Online

Numeri 27 - Revised Akuapem Twi DC-KYERƐW KRONKRON bible

Numeri 27

¹ Na Manase ba Makir ba Gilead ba Hefer ba Selofehad mmabea a wɔwɔ Yosef ba Manase mmusua mu no twiw bae; na ne mmabea no din ne: Mahla, Noa ne Hogla ne Milka ne Tirsa.

²Na wobegyinaa Mose ne ɔsɔfo Eleasar ne mmapɔmma no ne asafo mu no nyinaa anim, ahyiae ntamadan no ano kae sɛ:

³ Yɛn agya wui sare so, nso ɔno de, ɔmfra asafo a wohyia tiaa AWURADE, Kora asafo no mu, na n'ankasa ne bɔne nti na owui; nso na onni mmammarima.

⁴Ɛdɛn nti na yɛn agya din mpopa mfi n'abusua mu sɛ onni babarima yi? Ma yɛn agyapade yɛn agya ne nuanom mu.

⁵ Na Mose de wɔn asɛm no baa AWURADE anim.

⁶Na AWURADE ka kyerɛɛ Mose sɛ

⁷Selofehad mmabea no asɛm no teɛ, na ma wɔn agyapade na wonni so wɔn agya ne nuanom mu, na ma wɔn agya agyapade no nyɛ wɔn dea.

⁸Na kasa kyerɛ Israelfo sɛ: Sɛ ɔbarima bi wu na onni babarima a, ɛnne momma n'agyapade nyɛ ne babea de.

⁹Na sɛ onni babea nso a, ɛnne momfa n'agyapade mma ne nuammarimanom;

¹⁰na sɛ onni nuammarima nso a, momfa n'agyapade mma n'agya nuanom.

¹¹Na sɛ n'agya nni nuanom nso a, momfa n'agyapade mma ne bogya a ɔbɛn no n'abusua mu na onni so. Na eyi nyɛ ahyɛde ne mmara mma Israelfo, sɛnea AWURADE hyɛɛ Mose no.

¹² Na AWURADE ka kyerɛɛ Mose sɛ: Foro Abarim bepɔw yi na kɔhwɛ asase a mede merema Israelfo no;

¹³ na sɛ wunya hu a, watiw wo mpanyimfo, sɛnea Aaron tiw ne mpanyimfo no,

¹⁴ efisɛ moyɛɛ m'asɛm ho asoɔden, Sin sare so, asafo no ham no mu a ɛsɛ sɛ anka moyɛ me kronkron, nsu no ho wɔ wɔn ani so no. (Ɛne ɔham nsu no wɔ Kades, Sin sare so).

¹⁵Na Mose kasa kyerɛɛ AWURADE sɛ

¹⁶ Ma AWURADE, ɔhonam nyinaa ahonhom Nyankopɔn, mpɛ ɔbarima bi nsi asafo no so

¹⁷ a obedi wɔn anim afi adi na obedi wɔn anim aba mu, nea ɔde wɔn befi adi na ɔde wɔn aba mu, na AWURADE asafo no anyɛ sɛ nguan a wonni hwɛfo.

¹⁸ Na AWURADE ka kyerɛɛ Mose sɛ: Fa Nun ba Yosua, ɔbarima a honhom wɔ ne mu no, na fa wo nsa gu no so.

¹⁹Na fa no gyina ɔsɔfo Eleasar ne asafo mu no nyinaa anim, na hyɛ no mmara wɔn anim;

²⁰ na fa w'anuonyam no bi hyɛ no, na Israelfo asafo mu no nyinaa ntie no.

²¹ Na onkogyina Ɔsɔfo Eleasar anim, na ommisa Urim atemmu mma no, AWURADE anim; ɔno na ɔka a, womfi adi, na ɔka a, wɔmmra mu, ɔno ne Israelfo a wɔka ne ho nyinaa, ne asafo mu no nyinaa.

²²Na Mose yɛɛ sɛnea AWURADE hyɛɛ no no, na ɔfaa Yosua de no kogyinaa ɔsɔfo Eleasar ne asafo mu no nyinaa anim,

²³na ɔde ne nsa guu no so na ɔhyɛɛ no mmara, sɛnea AWURADE nam Mose so kae no.