Read Revised Akuapem Twi DC-KYERƐW KRONKRON Numeri 32 Bible Online

Numeri 32 - Revised Akuapem Twi DC-KYERƐW KRONKRON bible

Numeri 32

¹ Na Ruben mma ne Gad mma wɔ mmoa pii a ɛdɔɔso pa ara, na wohuu Yaser ne Gilead asase, na hwɛ, ɛhɔ yɛ baabi a eye ma mmoa.

²Na Gad mma ne Ruben mma no ba bɛka kyerɛɛ Mose ne ɔsɔfo Eleasar ne asafo no mu mmapɔmma no sɛ:

³Atarot ne Dibon ne Yaser ne Nimra ne Hesbon ne Eleale ne Sebam ne Nebo ne Beon,

⁴asase a AWURADE abrɛ no ase Israel asafo anim no, yɛ asase a eye ma mmoayɛn; na wo nkoa wɔ mmoa.

⁵Na wɔkae sɛ: Sɛ yɛn anim aba onyam wɔ w'anim a, ma wɔmfa asase yi mma wo nkoa na yenni so, na mfa yɛn ntwa Yordan.

⁶Na Mose ka kyerɛɛ Gad mma ne Ruben mma no sɛ: So mo nuanom nkɔ, na mo de, montena ha?

⁷Na ɛdɛn na mutu Israelfo koma sɛnea ɛbɛyɛ na wɔrentwa nnkɔ asase a AWURADE de ama wɔn no so.

⁸ Saa na mo agyanom yɛe bere a mesomaa wɔn fi Kades-barnea sɛ wɔnkɔhwɛ asase no,

⁹na wɔforo koduu Eskol subon no mu, na wohuu asase no, na wobetuu Israelfo no koma, na wɔankɔ asase a AWURADE de ama wɔn no so;

¹⁰na AWURADE bo fuwii da no, na ɔkaa ntam sɛ:

¹¹ Mmarima a wofi Misraim bae a wɔadi mfe aduonu de rekɔ no renhu asase a mekaa ɛho ntam mekyerɛɛ Abraham ne Isak ne Yakob no, efisɛ wɔanwie m'akyidi!

¹²Gye Kenisini Yefune ba Kaleb ne Nun ba Yosua, efisɛ wɔn na wɔadi AWURADE akyi nokware mu.

¹³Na AWURADE bo fuw Israel, na ɔma wokyinkyinii sare so mfirihyia aduanan kosii sɛ awo ntoatoaso a wɔyɛɛ AWURADE anim bɔne no nyinaa wiee ɔsa.

¹⁴Na hwɛ, moasɔre agyina mo agyanom ananmu, mmarima nnebɔneyɛfo asefo, sɛ mode AWURADE abufuhyew no bi reka ho de aba Israel so ara.

¹⁵Sɛ mosan fi AWURADE akyi a, obegyaw ɔman no bio sare so, na moasɛe ɔman mu yi nyinaa.

¹⁶Ɛnna wotwiw bɛn no kae sɛ: Yebegyigye nguammuw wɔ ha ama yɛn mmoa, na yɛakyekye nkurow nso ama yɛn mma;

¹⁷na yɛn de, yɛamia aso akode mu adi Israelfo anim akosi sɛ yɛde wɔn bedu wɔn tenabea ansa; na yɛn mma ntenatena nkurow a ɛyɛ den no mu asase no sotefo no nti.

¹⁸Yɛrensan mma yɛn afi de bɛkɔ akosi sɛ: Israelfo nyinaa benya wɔn agyapade mmiako mmiako adi so.

¹⁹Na yɛne wɔn remfa agyapade wɔ Yordan agya ne akyiri, efisɛ yɛn agyapade abefi Yordan agya ha wɔ apuei fam ama yɛn.

²⁰ Na Mose ka kyerɛɛ wɔn sɛ: Sɛ mobɛyɛ eyi na moamia wɔ AWURADE anim akɔko,

²¹na mo mu wɔn a wɔamia nyinaa betwa Yordan adi AWURADE anim akosi sɛ ɔbɛpam n'atamfo afi n'anim,

²²na wɔabrɛ asase no ase AWURADE anim ansa na moasan a, ɛnne na moayɛ mo asɛde, AWURADE ne Israel ho, na asase yi nyɛ mo agyapade, AWURADE anim.

²³Na sɛ moanyɛ saa a, hwɛ, na moayɛ AWURADE bɔne, na munhu yiye sɛ mo bɔne beyi mo ama.

²⁴Monkyekyere nkurow mma mo mma na munnyigye ban mma mo nguan, na nea afi mo anom no, monyɛ.

²⁵Na Gad mma ne Ruben mma no ka kyerɛɛ Mose sɛ: Wo nkoa bɛyɛ sɛnea me wura ahyɛ no:

²⁶Yɛn mma ne yɛn yerenom ne yɛn nguan ne yɛn anantwi nyinaa ntena Gilead nkurow mu hɔ;

²⁷na wo nkoa mu wɔn a wɔamia rekɔ ɔsa nyinaa betwam adi AWURADE anim akɔko, sɛnea me wura kae no.

²⁸Ɛnna Mose hyɛɛ wɔn ho mmara maa ɔsɔfo Eleasar ne Nun ba Yosua ne Israelfo mmusuakuw mu mpanyimfi so atitiriw no.

²⁹ Na Mose ka kyerɛɛ wɔn sɛ: Sɛ Gad mma ne Ruben mma ne mo twa Yordan, wɔn a wɔamia di AWURADE anim rekɔ ɔsa nyinaa, na wonya brɛ asase no ase mo anim a, ɛnne momfa Gilead asase mma wɔn na wonni so;

³⁰na sɛ wɔammia ne mo antwa a, ɛnne Kanaan asase so na wɔmma wonnya tenabea wɔ mo mu.

³¹Na Gad mma ne Ruben mma buae sɛ: Nea AWURADE aka akyerɛ wo nkoa no, saa ara na yɛbɛyɛ

³²Yɛn de, yebemia adi AWURADE anim atwam akɔ Kanaan asase so, na yɛn agyapade a yɛanya Yordan agya ha no atena yɛn hɔ.

³³ Ɛnna Mose de Amorifo hene Sihon ahenni ne Basan hene Og ahenni, asase no ne n'ahye mu nkurow, asase no so nkurow a atwa ahyia nyinaa maa Gad mma ne Ruben mma ne Yosef ba Manase abusuakuw fa.

³⁴Na Gad mma no kyekyeree Dibon ne Atarot ne Aroer,

³⁵ne Atrot-sofan ne Yaser ne Yogbeha,

³⁶ne Bet-nimra ne Bet-haran, nkurow a wɔatoto ho afasu ne nguammuw.

³⁷Na Ruben mma no kyekyee Hesbon ne Eleale ne Kiriataim,

³⁸ne Nebo ne Baal-meon a din no sakrasakrae, ne Sibma, na wɔtotoo nkurow a wɔkyekyeree no din.

³⁹Na Manase ba Makir mma siim kɔɔ Gilead kɔfae, na wɔpam Amorifo a wɔwɔ hɔ no.

⁴⁰Na Mose de Gilead maa Manase ba Makir, na ɔtenaa mu.

⁴¹ Na Manase ba Yair siim kɔfaa wɔn atenae no, na ɔfrɛɛ no Yair atenae.

⁴²Na Noba siim kɔfaa Kenat ne ɛho nkurowa, na ɔde ne din Noba too so.