Read Revised Akuapem Twi DC-KYERƐW KRONKRON Numeri 35 Bible Online

Numeri 35 - Revised Akuapem Twi DC-KYERƐW KRONKRON bible

Numeri 35

¹Na AWURADE kasa kyerɛɛ Mose wɔ Moab tataw so Yordan fa a ɛbɛn Yeriko no sɛ;

² Hyɛ Israelfo na wɔmfa wɔn agyapade a wɔanya no mu nkurow bi mma Lewifo na wɔntena mu, na nkurow no ho mfikyisaase nso momfa mma Lewifo.

³Na nkurow no nyɛ wɔn tenabea, na ɛho mfikyisaase no nneda hɔ mma wɔn anantwi ne wɔn nyɛmmoa ne wɔn mmoa nyinaa.

⁴Na nkurow no ho mfikyisaase a mode bɛma Lewifo no mfi kurow no fasu akyi nkɔ basafa ahanum ahanum ntwa ho nhyia.

⁵Na munsusuw kurow no akyi apuei fam basafa apem, ne anafo fam basafa apem, ne atɔe fam basafa apem, ne atifi fam basafa apem, na kurow no nna ntam: eyi ne nkurow no ho mfikyisaase a ɛnyɛ wɔn dea.

⁶ Na nkurow a mode ma Lewifo no nyɛ guankɔbea nkurow asia a mode bɛma sɛ nnipakumfo nguan nkɔ hɔ; na momfa nkurow aduanan abien nka ho.

⁷Nkurow a mode bɛma Lewifo no nyinaa nyɛ nkurow aduanan awotwe ne ɛho mfikyisaase.

⁸ Na nkurow a mugye fi Israelfo agyapade mu ma Lewifo no, wɔn a wɔn de dɔɔso no, wɔn hɔ na munnye pii, na wɔn a wɔn de sua no, munnye wɔn hɔ kakra; obiara sɛnea n'agyapade a wanya no dodow te no na ɔmfa ne nkurow no bi mma Lewifo.

⁹Na AWURADE kasa kyerɛɛ Mose sɛ:

¹⁰Kasa kyerɛ Israelfo sɛ: Sɛ mutwa Yordan kɔ Kanaan asase no so a,

¹¹munyiyi nkurow a ɛfata na ɛnyɛ guankɔbea nkurow mma mo, na onipakumfo a ne nsa apa obi ho no aguan akɔ hɔ.

¹²Na nkurow no nyɛ guankɔbea mma mo mfi ɔweretɔfo nsam, na onipakumfo no anwu kosi sɛ obegyina asafo anim na wɔabu no atɛn ansa.

¹³Na nkurow a mubeyi no nyɛ mo guankɔbea nkurow asia.

¹⁴Munyi nkurow abiɛsa mma Yordan agya, na munyi nkurow abiɛsa nso mma Kanaan asase no;

¹⁵ɛnyɛ guankɔbea nkurow, na nkurow asia yi nyɛ guankɔbea mma Israelfo ne ɔhɔho ne ɔmamfrani a ɔte wɔn mu, na obiara a ne nsa apa onipa bi ho no aguan akɔ hɔ.

¹⁶Na sɛ obi de dade bɔ obi ma owu a, ɔyɛ owudifo; okum na wonkum owudifo no.

¹⁷Na obi kura ɔbo a ebetumi akum onipa na sɛ ɔde bɔ obi ma owu a, ɔyɛ owudifo; okum na wonkum owudifo no.

¹⁸Anaasɛ okura dua a ebetumi akum onipa na sɛ ɔde bɔ no ma owu a, ɔyɛ owudifo; okum na wonkum owudifo no;

¹⁹mogya ho werefo na onkum owudifo no; ɔto no a, onkum no.

²⁰Na sɛ ɔtan so na ɔpem no, anaasɛ ɔboapa tow biribi bɔ no ma owu,

²¹anaasɛ nitan so na ɔde ne nsa bɔ no ma owu a, okum na wonkum nea ɔbɔɔ no no; ɔyɛ owudifo: mogya ho werefo, sɛ ɔto owudifo no a, onkum no.

²²Na sɛ obi hwe hɔ pem obi mpofirim na ɛnyɛ nitan so, anaasɛ ɔtow ade biara na ɛbɔ no, na wammoapa,

²³anaasɛ wanhu obi na ɔde ɔbo bi a etumi kum nnipa bɔ no ma owu, na ɔnyɛ ne tamfo, nso ɔmpɛ no bɔne bi a,

²⁴ɛnne asafo no nnyina saa ahyɛde yi so mmu onipakumfo no ne mogya ho werefo no ntam atɛn.

²⁵ Na asafo no nyi onipakumfo no mfi mogya ho werefo no nsam, na asafo no mfa no nsan nkɔ ne guankɔbea kurow a oguan kɔɔ mu no mu, na ɔnkɔtena hɔ nkosi sɛ ɔsɔfo panyin a wɔasra no ɔsra ngo kronkron no bewu.

²⁶Na sɛ onipakumfo no fi adi tena ne guankɔbea kurow a oguan kɔɔ mu no hye so,

²⁷na mogya ho werefo no kɔto no ne guankɔbea kurow no hye akyi, na mogya ho werefo no kokum onipakumfo no a, onni mogya ho fɔ.

²⁸Na anka ɛsɛ sɛ ɔtena ne guankɔbea kurow no mu kosi sɛ ɔsɔfo panyin no bewu, na ɔsɔfo panyin no wu akyi no, onipakumfo no asan aba asase a ɛyɛ n'agyapade no so bio.

²⁹Na eyi nyɛ atemmu ahyɛde mma mo, mo awo ntoatoaso nyinaa mu, mo tenabea nyinaa mu.

³⁰ Obiara a okum obi no, adansefo anom asɛm so na wɔmfa nkum onipakumfo no; na ɔdansefo biako nnni adanse nntia ɔkra bi mmma onnwu.

³¹Nso munnnye owudifo a odi fɔ sɛ wakum onipa bi no hɔ biribi mmfa nnnye no nkwa, na mmom okum na wonkum no.

³²Na munnnye agyede nso nnsi ne guankɔbea kurow mu guankɔ ananmu mmma ɔnnsan mmmɛtena asase no so kosi sɛ ɔsɔfo no bewu.

³³ Monnyɛ saa nnhura asase a mote so no ho, efisɛ mogya no ara na ehura asase no ho, na wɔrentumi mfa biribiara mpata mma asase no, mogya a wɔahwie agu so no nti, gye nea ɔkaa mogya gui no ara mogya.

³⁴ Na munngu asase a mote so na me nso mete mu no ho fi, na mene AWURADE a mete Israelfo mu no.