Read Revised Akuapem Twi DC-KYERƐW KRONKRON Numeri 36 Bible Online

Numeri 36 - Revised Akuapem Twi DC-KYERƐW KRONKRON bible

Numeri 36

¹Na Gilead, Makir ba, Manase ba mma abusua mu mpanyimfi so atitiriw a wofi Yosef mma mmusua mu no bae bɛkasae, Mose ne mmapɔmma no, Israelfo mpanyimfi so atitiriw no, anim,

² na wose: AWURADE ahyɛ me wura sɛ wɔmfa ntontobɔ so nkyɛ asase no mu mma Israelfo na wonni so, na me wura nyaa AWURADE anom mmara sɛ wɔmfa yɛn nua Selofehad agyapade mma ne mmabea.

³Na sɛ wɔkɔyɛ Israelfo mmusuakuw mu mma bi yerenom a, ɛnne wɔn agyapade no befi yɛn agyanom agyapade mu, na wɔde akɔka abusuakuw ko a wɔakɔyɛ wɔn de no agyapade ho, na afi yɛn ntonto kyɛfa no mu;

⁴ na sɛ edu Israelfo ahosɛpɛw afahyɛ afe so a, wɔde wɔn agyapade no bɛka abusuakuw a wɔakɔyɛ wɔn de no agyapade ho, na wɔayi wɔn agyapade afi yɛn agyanom abusuakuw agyapade mu.

⁵Na Mose nam AWURADE asɛm so hyɛɛ Israelfo no sɛ: Nea Yosef mma abusuakuw aka yi teɛ.

⁶Eyi ne nea AWURADE ahyɛ wɔ Selofehad mmabea no ho: Obiara a wosusuw sɛ oye no, wɔnware no, nanso wɔn agyanom abusuakuw mu abusua bi mu na wɔnware,

⁷na Israelfo agyapade bi amfi abusuakuw bi mu ankɔ abusuakuw foforo bi mu, na Israelfo mfomfam wɔn agyanom abusuakuw agyapade ho.

⁸Na ɔbabea biara a onya agyapade Israelfo mmusuakuw mu no nyɛ obi a ofi n'agya abusuakuw mu abusua bi mu yere, na Israelfo nnya wɔn agyanom agyapade nni so,

⁹na agyapade bi amfi abusuakuw bi mu ankɔ abusuakuw foforo mu; na Israelfo mmusuakuw no mfomfam wɔn agyapade ho.

¹⁰Sɛnea AWURADE hyɛɛ Mose no, saa ara na Selofehad mmabea no yɛe;

¹¹ na Mahla, Tirsa ne Hogla ne Milka ne Noa, Selofehad mmabea no warewaree wɔn agya nuanom mma;

¹²na wɔwarewaree wɔ Yosef ba Manase mma mmusua mu, na wɔn agyapade no kaa wɔn agya abusuakuw no mu.

¹³Eyinom ne mmara nsɛm ne atemmude a AWURADE nam Mose so hyɛɛ Israelfo wɔ Moab tataw so, Yordan fa a ɛbɛn Yeriko no.