Read Revised Akuapem Twi DC-KYERƐW KRONKRON Mika 1 Bible Online

Mika 1 - Revised Akuapem Twi DC-KYERƐW KRONKRON bible

Mika 1

¹ AWURADE asɛm a ɛbaa Moresetni Mika nkyɛn, Yuda ahene Yotam, Ahas ne Hesekia bere so wɔ Samaria ne Yerusalem ho ni.

²Aman nyinaa, muntie! Asase ne ne mayɛ, monyɛ aso! Na AWURADE Nyankopɔn nyɛ ɔdansefo ntia mo, AWURADE wɔ n’asɔrefi kronkron no mu.

³ Na hwɛ, AWURADE refi adi afi n’afa, na wasian abetiatia asase sorɔnsorɔmmea so.

⁴Na mmepɔw bedwiriw wɔ n’ase, na abon mu apaepae, sɛ hweawa tetew ogya anim no, te sɛ nsu a wɔahwie agu nea ɛhɔ sian.

⁵ Efi Yakob mmarato ne Israel fi nnebɔne nti na eyi nyinaa ba, Dɛn ne Yakob mmarato? So ɛnyɛ Samaria? Na dɛn ne Yuda sorɔnsorɔmmea? So ɛnyɛ Yerusalem?

⁶Enti mede Samaria mɛyɛ wuram abokuw wɔ aman anim ne abobe atɛwee, na mede n’abo megu obon no mu, na mayi ne nnyinaso adi.

⁷ Na wɔbɛbobɔ n’ahoni nyinaa, na wɔde ogya ahyew n’ayɛyɛde nyinaa, na mɛyɛ n’abosom adum nyinaa afo, efisɛ aguaman apɛde na ɔde aboa ano, na aguaman apɛde na ɛbɛsan akɔyɛ.

⁸Eyi nti mesu na matwa adwo, mɛnantew a mpaboa nni mu, akɔ no adagyaw mu, metue osu sɛ sakraman, na madi nkɔmmɔ sɛ sohori.

⁹Na n’apirakuru no wontumi nsa bio; na abedu Yuda, abɛso me man pon ano, adu Yerusalem.

¹⁰ Monnka no wɔ Gat, munnkosu koraa; wɔ Bet-leafra na monyantam mfutuma mu.

¹¹Safirfo, monsen nkɔ, wɔ adagyaw ne aniwu mu; Sanaanfo mfi adi; Bet-esel retwa adwo na obegyae w’akyi gyina;

¹²na Marotfo de ahoyeraw twɛn mmere pa, efisɛ amane afi AWURADE nkyɛn aduru aba Yerusalem kurow pon ano.

¹³Lakisfo, momfa teaseɛnam nsa ɔpɔnkɔ hoɔharefo; ɛyɛ Sion babea bɔne mfiase, sɛ mo mu na wohuu Israel mmaratode no.

¹⁴Enti wɔbɛma Moreset-gat nkradi akyɛde: Aksib afi bedi Israel ahene huammɔ.

¹⁵Maresafo, mede ɔdedifo foforo mɛbrɛ mo; Adulam na Israel anuonyamfo bedu.

¹⁶Bɔ tikwaw na bɔ kwatrekwa, w’akorɔkorɔ mma nti, ma wo tikwaw ntrɛw sɛ opete de, efisɛ wɔatu wo nkyɛn kɔ nnommum mu.