Read Revised Akuapem Twi DC-KYERƐW KRONKRON Mika 3 Bible Online

Mika 3 - Revised Akuapem Twi DC-KYERƐW KRONKRON bible

Mika 3

¹Na mise: Muntie ɛ, Yakob atitiriw ne Israel fi akannifo, so ɛnyɛ mo na ɛsɛ sɛ muhu atemmu?

²Mo na motan papa na modɔ bɔne, mugua wɔn were fi wɔn ho, ne wɔn nam fi wɔn nnompe ho,

³ na mo na moadi me man nam, na moaworɔw wɔn were afi wɔn ho, na moabubu wɔn nnompe mu, na moatwitwa no sɛ kutu mu ade, ne ɔsɛn mu nam.

⁴Ɛno ansa na wobesu afrɛ AWURADE, nanso ɔremmua wɔn, na ɔde n’anim behintaw wɔn bere no mu, sɛnea wɔmaa wɔn nsɛnnii yɛɛ bɔne no.

⁵Sɛɛ na AWURADE ka tia adiyifo a wɔdaadaa me man na wɔde wɔn se ka na wɔka sɛ: Asomdwoe! Na nea ɔmfa biribi nhyɛ wɔn anom no, wɔnoa no so sa no.

⁶Ne saa nti ade bɛsa mo, anisoadehu nni hɔ ma mo, na esum aduru mo, mo nkɔmhyɛ ho, na owia bɛtɔ adiyifo no so, na adekyee adan wɔn so sum kabii;

⁷na adehufo no ani bewuwu, na nkɔmhyɛfo no anim asinsiam, na wɔn nyinaa bemuamua wɔn ano, efisɛ Onyankopɔn mmuae bi nni hɔ.

⁸ Na me de, AWURADE honhom mu tumi ne atemmu ne mmaninyɛ ahyɛ me ma, sɛ menkyerɛ Yakob ne mmarato, ne Israel ne bɔne.

⁹Muntie eyi ɛ, Yakob fi atitiriw ne Israel fi akannifo, mo a mukyi atemmu na mokyea nea ɛteɛ nyinaa,

¹⁰ mo a mokyekye Sion, mogyahwiegu mu, ne Yerusalem, akɔntɔnkyede mu.

¹¹ Emu atitiriw gye ademmude bu atɛn, na emu asɔfo gye akatua kyerɛkyerɛ, na emu adiyifo gye sika hyɛ nkɔm, nanso wotweri AWURADE ka sɛ: So ɛnyɛ AWURADE na ɔwɔ yɛn ntam yi? Bɔne bi remma yɛn so.

¹² Ne saa nti, mo nti wɔbɛfɛntɛm Sion sɛ afuw, na Yerusalem adan abo akuakuw, na ofi no bepɔw adan kwae sorɔnsorɔmmea.