Read Revised Akuapem Twi DC-KYERƐW KRONKRON Nahum 2 Bible Online

Nahum 2 - Revised Akuapem Twi DC-KYERƐW KRONKRON bible

Nahum 2

¹Niniwe, nea ɔbɔ pete no reforo aba wo so. Bɔ nsra a emu yɛ den, wɛn ɔkwan, bɔ wo ho so, hyɛ w’ahoɔden mu den yiye.

²Na AWURADE de Yakob kɛseyɛ resan aba sɛ Israel kɛseyɛ; ɔno a afowfo afow no, na wɔasɛe ne bobe abaa.

³Ne nnɔmmarima kyɛm ho abere, akofofo no furafura kɔben, nteaseɛnam no yɛ dade gya, ɛda a osiesie dɔm no, na wɔwosow peaw nnua;

⁴nteaseɛnam bɔ dam mmɔnten so, efi ti kɔ ti, mprama so; ɛho te sɛ agyatɛn, ɛnenam sɛ anyinam.

⁵Ɔfrɛfrɛ n’akofo atitiriw, wohintihintiw wɔn nantew mu; wɔde ahoɔhare kɔ fasu no so, na wɔde osuhyɛ si so.

⁶Wɔabue nsubɔnten no ano aponkɛse no, na ahodwiriw aba ahemfi.

⁷Na wɔahyɛ no sa, wɔapa [Niniwe] ho, wɔafa no kɔ, na ne mmaawa si apini sɛ mmorɔnoma pempem wɔn koko.

⁸Na Niniwe te sɛ ɔtare fi ne tete nna mu; na wɔn de, woguan. Munnyina, munnyina! Na obiara nnan n’ani.

⁹Momfow dwetɛ, momfow sika kɔkɔɔ! Na ahonyade no nni awiei, nnwinne afɛfɛ ahorow nyinaa dodow yɛ duru.

¹⁰ Ao Niniwe, hwɛ sɛ wasi ada mpan, na wayɛ hunu ne amamfo, na wo koma ahodwow, na w’anankoroma hinhim, w’asen mu nyinaa yɛ wo yaw, na w’anim nso asinsiam fitaa.

¹¹Ɛhe na gyata tenabea no wɔ, ne gyataforo adidibea a anka ɛwɔ hɔ no, nea gyatanini ne gyatabere ne gyata ba nenam hɔ a obi nni hɔ a oyi wɔn hu no?

¹²Gyata tetew mu ma ne mma na omia ma n’abere, na ɔde ntetewee hyɛɛ n’atu mu amaama, na ɔde nea ɔtetew mu no hyehyɛɛ ne tenabea.

¹³Hwɛ, me ne wo anya, asafo AWURADE asɛm ni, na mɛma ne nteaseɛnam ahyew owusiw mu, na afoa bedi w’agyataforo no; na metwa w’afow ade no afi asase so, na wɔrente w’abɔfo no nne bio.