Read Revised Akuapem Twi DC-KYERƐW KRONKRON Habakuk 1 Bible Online

Habakuk 1 - Revised Akuapem Twi DC-KYERƐW KRONKRON bible

Habakuk 1

¹Eyinom ne nsɛm a AWURADE yi kyerɛɛ Odiyifo Habakuk.

²AWURADE, menteɛm nkosi da bɛn ara, na wubetie me? Nhyɛso nti misu mefrɛ wo, nanso worennye me so

³Ɛdɛn nti na woma mihu abusude, na wohwɛ ɔhaw pii yi? Ɔsɛe ne nhyɛso da m’anim, na ɔham ba, na akameakame sɔre.

⁴Enti mmara mu agow, na atɛntrenee nni hɔ bio, efisɛ abɔnefo twa ɔtreneeni ho hyia, enti atemmu akyea.

⁵ Monhwɛ amanaman mu na munhu, na mo ho nnwiriw mo pa ara, na mereyɛ adwuma bi, mo bere so a, wɔka kyerɛ mo a, morennye nni.

⁶Na hwɛ, merehwanyan Kaldeafo, ɔman a wɔn tirim yɛ den, na wɔn ho yɛ hare a wɔnantew asase so nyinaa, fa tenabea a ɛnyɛ wɔn de di so.

⁷Wɔn ho yɛ hu ne ahometew, wɔyɛ ahantanfo a wɔyɛ nea wɔpɛ.

⁸ Wɔn apɔnkɔ ho yɛ hare sen asebɔ, na wɔn ho yɛ hu yiye sen anadwofa mpataku, na wɔn apɔnkɔ tew praka, na wofi akyirikyiri reba, wotu sɛ ɔkɔre a ɔrepɛ ntɛm akɔ adidi.

⁹Wɔn nyinaa reba anibere so, na wɔde wɔn ani akyerɛ apuei fam, na wɔtase nnommum sɛ anwea.

¹⁰Wɔn de, wosi ahene atwetwe na abirempɔn ho yɛ wɔn serew, wɔserew aban a ɛyɛ den nyinaa, na wɔboa dɔte ano gu hɔ na wɔfa.

¹¹Ɛno na wotwam sɛ mframa, na wɔsen kɔ, na wokodi so; wɔn ahoɔden yi ara ne wɔn nyame.

¹² AWURADE, me Nyankopɔn, me kronkronni, so womfi tete nteredee? AWURADE wo ne ɔbotantim, yɛrenwu, na mmom hyɛ ara na woahyɛ Kaldeafo sɛ wommu yɛn atɛn na yɛn asotwe nti na wode wɔn asi hɔ.

¹³Wo a w’aniwa yɛ kronkron a wuntumi nhwɛ bɔne na wuntumi nhwɛ ɔhaw, ɛdɛn nti na wohwɛ nkɔnkɔnsafo, na ɔbɔnefo mene ɔtreneeni a ɔteɛ sen no a, woyɛ komm?

¹⁴Na woayɛ nnipa sɛ ɛpo mu mpataa, sɛ mmoa a wɔwea a obi nni wɔn so.

¹⁵Saa nti ɔtamfo no de darewa atwe wɔn nyinaa, ɔde asawu twe wɔn, na ɔboa wɔn ano ne kyerɛnkyɛ mu; enti n’ani gye na ne ho sɛpɛw no,

¹⁶Saa nti ɔbɔ n’asawu no afɔre na ɔhyew aduhuam ma ne kyerɛnkyɛ no, efisɛ ɛno na ɛma ne kyɛfa dɔ srade, na n’aduan dɔɔso.

¹⁷So ɛno nti ɔnkɔ so mporow n’asawu mu, na okunkum amanaman a ahummɔbɔ nni mu?