Read Revised Akuapem Twi DC-KYERƐW KRONKRON Habakuk 2 Bible Online

Habakuk 2 - Revised Akuapem Twi DC-KYERƐW KRONKRON bible

Habakuk 2

¹ Megyina m’ahwɛe na mede me ho besi aban so, na masra mahwɛ asɛm ko a ɔbɛka akyerɛ me, ne nea mede bebua no me nkurobɔ ho.

²Na AWURADE buaa me sɛ: Kyerɛw adehu no, na kyerɛkyerɛ mu gu abopon so, na wɔanya no akanye ahoɔhare so.

³ Na adehu no da so kyerɛ bere a wɔahyɛ, na ɛrepɛ kwan aba na ɛyɛ nokware, sɛ ɛtwentwɛn ase nso a, twɛn no ara, na ba de, ɛbɛba, ɛrenka akyiri.

⁴ Hwɛ, ahantanfo. Wɔn kra nteɛ wɔ wɔn mu, na ɔtreneeni de, ne gyidi mu na obenya nkwa.

⁵Na afei nso, Kaldeafo te sɛ asabofo, na wɔyɛ nnipa ahokyerɛfo a wɔn ho nnwo da. Wɔatrɛw wɔn kra akɔnnɔ mu sɛ asaman, na wɔte sɛ owu a ɔmmee na wɔfa amanaman nnommum ba wɔn nkyɛn, na wɔfom aman nyinaa fa.

⁶Hwɛ bere bi reba a wɔn nnommumfafo bɛserew wɔn na wɔadi wɔn ho fɛw sɛ: Nea ɔfow nneɛma bebree fa no w’apoobɔ yi bɛkɔ so akosi da bɛn?

⁷So ɛnyɛ mpofirim na wɔn a wɔde wo ka no bɛsɔre, na wɔabɛhwanyan mo na moadan wɔn asade?

⁸ Esiane sɛ woafow amanaman pii nti, na woahyɛ nkurow ne emufo so, na woahwie nnipa mogya agu nti, wo nso aman bɛfow wo afa.

⁹Onnue, nea onya mfaso bɔne ma ne fi, na ɔde ne berebuw besi sorɔnsorɔmmea sɛ wayi ne ho afi mmusu nsam no.

¹⁰Woatu agyina bɔne anya aniwu ama wo fi, sɛ woatwitwa aman pii agu na woayɛ wo kra bɔne.

¹¹Ɔbo fi ɔfasu mu bɛteɛm, na mpuran afi nnua mu agye so.

¹² Onnue, nea ɔkyekye kurow mogya mu, na ɔto aban abusude mu.

¹³ Hwɛ, so emfi asafo AWURADE nkyɛn sɛ aman yɛ adwuma brɛ ma ogya, na nkurɔfo brɛ ma adehunu?

¹⁴ Na afei AWURADE anuonyam ho nimdeɛ, bɛhyɛ asase so ma sɛ nsu kata ɛpo so.

¹⁵Due, wo a woma wo yɔnko biribi nom wɔ adwene bɔne kwan so na woma ɔbow na woahwɛ n’adagyaw mu.

¹⁶ Ahohora amee wo asen anuonyam, wo nso nom, na wo momonoto nna adi. AWURADE nifa mu kuruwa bɛdan aba wo so, na ɔfe ne ahohora begu w’anuonyam so.

¹⁷Na wo Babel, asɛmmɔne a wodii no Lebanon; mmoa sɛe a ɛbɔɔ wɔn piriw, nnipa mogya a woka guu asase so, ne kurow ne emufo nhyɛso no nyinaa bɛba w’atifi.

¹⁸ Sɛ odwumfo sen ohoni a, ɛho mfaso ne dɛn? Ɛyɛ oguhoni ne atoro kyerɛkyerɛfo; efisɛ odwumfo yɛ ahoni mum a ɔde ne ho to n’ankasa n’adwinni a odi no so.

¹⁹ Due, wo a woka kyerɛ dua sɛ: Nyan! Na woka kyerɛ ɔbo mum sɛ: Sɔre! So ebetumi akyerɛ biribi? Hwɛ, wɔde sika ne dwetɛ adura ho, na honhom biara nni mu.

²⁰ Na AWURADE wɔ n’asɔrefi kronkron mu; ma asase nyinaa nyɛ komm wɔ n’anim.