Read Revised Akuapem Twi DC-KYERƐW KRONKRON Habakuk 3 Bible Online

Habakuk 3 - Revised Akuapem Twi DC-KYERƐW KRONKRON bible

Habakuk 3

¹Odiyifo Habakuk mpaebɔ, wɔ Shigionot[1] so.

²AWURADE, mate wo nka na masuro; AWURADE, kanyan w’adwuma no wɔ yɛn bere yi mu, bere yi mu, na ma wonhu; w’abufuhyew mu kae wo mmɔborohunu.

³ Onyankopɔn fi Teman ba, na ɔkronkronni no fi Paran bepɔw so. Sela N’anuonyam kata ɔsoro, na n’ayeyi yɛ asase so ma.

⁴Ne hyerɛn te sɛ owia hann, nsesae wowɔ ne ho, na ɛhɔ ne n’ahoɔden ahintawee.

⁵Ɔyaredɔm a ɛpra di n’anim, na ɔyare a ɛhyehye fi di ne nan ase.

⁶ Ogyina hɔ na ɔwosow asase, ɔhwɛ, na ɔma amanaman ho popo; daa mmepɔw dwiriw, tete nkoko brɛ ase, n’akwan te sɛ tete de.

⁷Mihuu Kusan ntamadan wɔ ahohia mu, Midian asase so kuntudan no popo.

⁸Nsubɔnten so na, AWURADE w’abufuw redɛw? Ɛpo na wo bo huru tiaa no bere a wote w’apɔnkɔ so, wo nkwagye nteaseɛnam so reba no?

⁹Woayɛ wo ta krado, na woaka ntam wɔ w’agyantow ho. Sela Wopaapae asase mu yɛ no nsubɔnten.

¹⁰ Mmepɔw hu wo a wohinhim; nsu a etue reba; ebun donkudonku ma ne nne so, ɛma ne nsa so kɔ soro;

¹¹ owia ne ɔsram gyinagyinaa wɔn sibere w’agyan a ɛnenam no hann nti, wo peaw anyinam pa hyerɛn no nti.

¹²Abohuru mu na wonam fa asase so, abufuw mu na woposaw amanaman.

¹³ Wufii adi sɛ worebegye wo man, worebegye nea wɔasra no no; wobobɔɔ ɔbɔnefo ti, womaa ne ho daa hɔ fi ne nan ase kosi n’atifi Sela

¹⁴Wode mpɛmɛ hwirew n’akofo tirim, wotu sɛ ahum ba sɛ wɔrebɛbɔ me apete, wɔn anigye ne sɛ wɔbɛmene ɔbrɛfo ahintawee mu.

¹⁵Wode w’apɔnkɔ si po mu, nsu pii a ehuru no mu.

¹⁶Metee na me yafunum popoe, m’ano saw biribiri, ɛnne no ho; ɔporow hyɛn me nnompe mu, na m’ase popoe, nanso mɛtena ase matwɛn ahohia da no, mahwɛ asotwe a AWURADE de bɛma wɔn a wɔbɛtoaa yɛn no.

¹⁷Sɛ borɔdɔma rengu nhwiren, na aba bi nni abobe so; ngodua sow di huammɔ, na mfuw mma aduan, nguan to twa fi ban mu, na nantwi bi nni adan mu mpo a.

¹⁸ Me de AWURADE mu na medi ahurusi, me ho bɛsɛpɛw me, me nkwagye Nyankopɔn mu.

¹⁹ ONYANKOPƆN, Awurade no, ne m’ahoɔden, na ɔma m’anan yɛ sɛ aforote de, na ɔma menantew sorɔnsorɔmmea. Wɔmfa mma dwonkyerɛfo na wɔnto no m’asanku so.