Read Revised Akuapem Twi DC-KYERƐW KRONKRON Sakaria 2 Bible Online

Sakaria 2 - Revised Akuapem Twi DC-KYERƐW KRONKRON bible

Sakaria 2

¹ Na memaa m’ani so mehwɛe, na hwɛ, ɔbarima bi a okura susuhama ne nsam ni.

²Na mibisaa sɛ: Ɛhe na worekɔ? Na obuaa me sɛ: Merekɔ makosusuw Yerusalem mahwɛ sɛ ne trɛw ne ne ntwemu te.

³Na hwɛ, ɔbɔfo a ɔne me kasae no fii adi, na ɔbɔfo foforo fii adi kohyiaa no,

⁴ na ɔka kyerɛɛ no sɛ: Tu mmirika ka kyerɛ aberante yi sɛ: Yerusalem bɛda hɔ sɛ nkuraankuraa a enni afasu, nnipa ne mmoa a ɛwɔ mu dodow nti;

⁵ na me de, Awurade asɛm ni, m’ankasa mɛyɛ no ogya fasu matwa ne ho ahyia, na mayɛ ne mu anuonyam.

⁶Huu, huu! Munguan mfi atifi fam asase so, Awurade asɛm ni, na matrɛw mo mu sɛ ɔsoro mframa anan no, Awurade asɛm ni.

⁷Huu, Sion, bɔ wo ho aguaa, wo a wo ne Babel babea te no.

⁸ Na sɛ asafo Awurade se ni: N’anuonyam nti, na wasoma me amanaman a wɔfom mo no nkyɛn; na nea ɔka mo no, waka Awurade aniwa nkosua.

⁹Na hwɛ, wɔn so na mehwim me nsa na wɔadannan afow ade ama wɔn nkoa, na moahu sɛ asafo Awurade na asoma me.

¹⁰To ahurusi dwom, ma w’ani nnye, Sion babea, na hwɛ, mereba mabɛtena wo mu, Awurade asɛm ni.

¹¹ Na amanaman bebree de wɔn ho bɛba abɛbɔ Awurade ho ɛda no, na wɔayɛ me ɔman; na mɛtena wo mu, na wubehu sɛ asafo Awurade na asoma me wo nkyɛn.

¹² Na Awurade bɛfa Yuda adi so sɛ ne kyɛfa, asase kronkron no, na wakɔ so afa Yerusalem ayɛ ne de.

¹³ Ma akra nyinaa nyɛ komm, Awurade anim, efisɛ wasɔre afi ne tenabea kronkron hɔ.