Read Revised Akuapem Twi DC-KYERƐW KRONKRON Mateo 6 Bible Online

Mateo 6 - Revised Akuapem Twi DC-KYERƐW KRONKRON bible

Mateo 6

¹Monhwɛ yiye na moanyɛ mo trenee nnipa anim sɛ wobehu mo; anyɛ saa a, munni akatua mo agya a ɔwɔ soro no nkyɛn.

²Enti sɛ woyɛ adɔe a, nhyɛn torobɛnto nni w’anim, sɛnea nyaatwomfo no yɛ no hyiadan mu ne mmorɔn so, sɛnea wobenya nnipa anim anuonyam. Nokware mise mo sɛ, wɔanya wɔn akatua dedaw.

³ Na wo de, woyɛ adɔe a, mma wo benkum nnhu nea wo nifa reyɛ no;

⁴na w’adɔe aka kokoam, na w’agya a ohu kokoam no betua wo ka.

⁵Na sɛ morebɔ mpae a, monnyɛ sɛ nyaatwomfo no; na wɔpɛ sɛ wogyina hyiadan mu ne mmɔnten twea so bɔ mpae, na nnipa ahu wɔn. Nokware mise mo sɛ, wɔanya wɔn akatua dedaw.

⁶ Na wo de, worebɔ mpae a, hyɛn wo pia mu, na to wo pon mu bɔ w’agya a ɔwɔ kokoam no mpae, na w’agya a ohu kokoam no betua wo ka.

⁷ Na sɛ morebɔ mpae a, monnkasakasa pii kwa sɛ abosonsomfo; na wosusuw sɛ wɔn kasa dodow nti wobetie wɔn!

⁸ Enti monnyɛ sɛ wɔn; na mo agya Onyankopɔn nim nneɛma a ehia mo ansa na moabisa no.

⁹ Enti mommɔ mpae sɛ: Yɛn Agya a wowɔ soro, wo din ho ntew,

¹⁰ w’ahenni mmra, nea wopɛ nyɛ asase so, sɛnea ɛyɛ ɔsoro.

¹¹Ma yɛn yɛn daa aduan nnɛ,

¹² na fa yɛn aka kyɛ yɛn, sɛnea yɛde kyɛ wɔn a wɔde yɛn aka.

¹³ Na mfa yɛn nkɔ sɔhwɛ mu, na yi yɛn fi bɔne mu.[1] [Na wo na ahenni ne ahoɔden ne animuonyam yɛ wo dea daa, Amen.][2]

¹⁴Na sɛ mode nnipa mfomso kyɛ wɔn a, mo soro agya de mo de bɛkyɛ mo nso.

¹⁵ Na sɛ moamfa nnipa mfomso ankyɛ wɔn a, mo agya no nso remfa mo mfomso nkyɛ mo.

¹⁶ Na sɛ moredi mmuada a, monnyɛ mo anim bosaa sɛ nyaatwomfo no. Na wonyinnyan wɔn anim sɛnea nnipa behu sɛ wɔredi mmuada. Nokware mise mo sɛ, wɔanya wɔn akatua dedaw.

¹⁷Na wo de, woredi abuada a, sra wo tirim, na hohoro w’anim,

¹⁸na nnipa anhu sɛ woredi abuada, na mmom w’agya a ɔwɔ kokoam no; na w’agya a ohu kokoam no betua wo ka.

¹⁹Monnhyehyɛ agyapade asase so, nea nwewee ne nkannare sɛe no, na awifo bubu kowia.

²⁰ Na mmom monhyehyɛ agyapade ɔsoro, faako a nwewee ne nkannare nsɛe no na awifo mmubu nkowia;

²¹na nea w’agyapade wɔ no, ɛhɔ na wo koma nso wɔ.

²² Nipadua kanea ne aniwa. Enti sɛ w’ani ye a, wo nipadua nyinaa bɛyɛ hann.

²³Na sɛ w’ani nye a, wo nipadua nyinaa bɛyɛ kusuu. Na sɛ hann a ɛwɔ wo mu no yɛ sum a, esum no mu bɛyɛ duru yiye.

²⁴ Obiara ntumi nsom awuranom baanu. Sɛ ɛba saa a, ɔbɛtan biako na wadɔ biako, anaasɛ ɔde ne ho bɛbata biako no na wabu biako animtiaa. Morentumi nsom Onyankopɔn ne mamon.[3]

²⁵ Eyi nti mise mo sɛ: Munnnwinnwen mo kra ho sɛ dɛn na mubedi anaasɛ dɛn na mobɛnom, anaasɛ mo nipadua ho sɛ dɛn na mubefura. Ɔkra nsen aduan, na nipadua nsen ntama anaa?

²⁶ Monhwɛ wim nnomaa sɛ wongu na wontwa, na wɔmmoaboa ano ngu asan so, nanso mo soro agya yɛn wɔn; na monsom bo nsen wɔn anaa?

²⁷Mo mu hena na ɔdwennwen a, obetumi de dakoro ato ne nkwa nna so?

²⁸Na adɛn na mudwinnwen ntama ho? Monhwɛ wuram sukooko, sɛnea enyin; ɛnyɛ adwuma, nso ɛnto asaawa,

²⁹ nanso mise mo sɛ, Solomon anuonyam nyinaa mu po wankeka ne ho sɛ eyinom mu biako.

³⁰Na sɛ Onyankopɔn fura wuram ahaban a ɛwɔ hɔ nnɛ na ɔkyena wɔde gu fononoo mu no ntama saa a, ɔrenyɛ nea ɛkyɛn eyi mma mo, mo a mo gyidi sua?

³¹Enti munnnwinnwen sɛ: Dɛn na yebedi anaasɛ dɛn na yɛbɛnom anaasɛ dɛn na yebefura?

³²Na eyinom nyinaa akyi na wiase amanaman no di. Na mo soro agya no nim sɛ eyinom nyinaa hia mo.

³³ Na monhwehwɛ Onyankopɔn ahenni ne ne trenee kan; na wɔde eyinom nyinaa bɛka mo ho.

³⁴ Enti munnnwinnwen ɔkyena ho; na ɔkyena ankasa bedwinnwen ne ho. Da biara mu bɔne dɔɔso ma ɛda no.