Read Revised Akuapem Twi DC-KYERƐW KRONKRON Marko 11 Bible Online

Marko 11 - Revised Akuapem Twi DC-KYERƐW KRONKRON bible

Marko 11

¹Na wɔbɛn Yerusalem, Betfage ne Betania wɔ Ngo Bepɔw ho no, ɔsomaa n’asuafo no mu baanu,

²na osee wɔn sɛ: Monkɔ akuraa a ɛda mo anim yi ase! Na mudu hɔ pɛ a, mubehu afurum ba a wɔasa no hama a onipa biara ntenaa no so da. Monsan no mfa no mmra!

³ Na sɛ obi se mo sɛ: Adɛn na moyɛ eyi a, monka sɛ: Ne ho hia Awurade; na ntɛm ara ɔbɛma wɔde no aba ha.

⁴Na wɔkɔe kohuu afurum ba no sɛ ɔsa ɔpon ano wɔ mfikyiri, abɔnten, na wɔsan no.

⁵Na wɔn a wogyina hɔ no mu bi see wɔn sɛ: Moresan afurum ba no ayɛ dɛn?

⁶Na asuafo no buaa wɔn sɛnea Yesu kae no, na wɔmaa wɔn kwan.

⁷Na wɔde afurum ba no brɛɛ Yesu, na wɔde wɔn ntama guu no so; na ɔtenaa no so.

⁸Na nnipa bebree de wɔn ntama sesɛw ɔkwan no so, na ebinom twitwaa nnubaa fii mfuw mu de sesɛw ɔkwan no so.

⁹ Na wɔn a wodi anim ne wɔn a wodi akyiri teɛɛm sɛ: Hosiana! Nhyira ne nea ɔnam Awurade din mu reba!

¹⁰Nhyira ne yɛn agya Dawid ahenni a ɛreba no! Hosiana wɔ sorosoro!

¹¹Na ɔhyɛn Yerusalem kɔɔ asɔrefi. Na ɔhwɛɛ nneɛma nyinaa na ade reyɛ asa no, ɔne dumien no fi kɔɔ Betania.

¹²Na ade kyee a wofi Betania reba no, ɔkɔm dee no.

¹³Na ohuu borɔdɔma bi wɔ akyiri sɛ nhaban wɔ so no, ɔkɔɔ hɔ sɛ ebia obehu biribi wɔ so anaa. Na oduu ho no, wanhu hwee sɛ ahaban nko ara; efisɛ borɔdɔma bere nnui ɛ.

¹⁴ Na ɔkasa kyerɛɛ borɔdɔma no sɛ: Obiara renni wo so aba bio da! Na n’asuafo no tee.

¹⁵Na woduu Yerusalem. Na ɔkɔhyɛn asɔrefi no, ofii ase pam wɔn a wɔtɔn ne wɔn a wɔtɔ ade asɔrefi hɔ; na obutuw sikasesafo apon ne wɔn a wɔtɔn mmorɔnoma nkongua,

¹⁶na wamma kwan amma obiara ansoa ade amfa asɔrefi hɔ.

¹⁷ Na ɔkyerɛkyerɛe see wɔn sɛ: Wɔnkyerɛwee sɛ wɔbɛfrɛ me fi asɔrefi ama amanaman nyinaa? Na mo de, mode ayɛ adwowtwafo bon.

¹⁸Na asɔfo mpanyin ne akyerɛwfo no tee, na wɔhwehwɛe sɛ wobekum no; nso wosuro no, efisɛ ne nkyerɛkyerɛ yɛ nkurɔfokuw no nyinaa nwonwa.

¹⁹Na ade sae no, ofii kurom hɔ.

²⁰ Na anɔpatutu a wɔretwam no, wohui sɛ borɔdɔma no awu fi ne ntini ase.

²¹Na Petro kaee see no sɛ: Rabi, hwɛ, borɔdɔma a wodomee no no awu!

²²Na Yesu bua see wɔn sɛ: Munnya Onyankopɔn mu gyidi!

²³ Na nokware mise mo sɛ, obiara a obese bepɔw yi sɛ: Ma wo ho so kɔhwe po mu na onnye akyinnye ne koma mu, na obegye adi sɛ nea ɔka no bɛba mu no, ɛbɛyɛ hɔ ama no.

²⁴ Eyi nti mise mo sɛ: Ade biara a mobɛsrɛ mo mpaebɔ mu no, munnye nni sɛ mubenya, na ɛbɛyɛ hɔ ama mo.

²⁵ Na sɛ mugyina hɔ rebɔ mpae, na mowɔ biribi tia obi a, momfa nkyɛ no, na mo agya a ɔwɔ soro no nso de mo mfomso akyɛ mo.

²⁶ [Na sɛ moamfa ankyɛ a, mo agya a ɔwɔ soro no nso remfa mo mfomso nkyɛ mo.]

²⁷Na wɔbaa Yerusalem bio. Na ɔnenam asɔrefi no, asɔfo mpanyin ne kyerɛwfo ne mpanyimfo no baa ne nkyɛn,

²⁸na wobisaa no sɛ: Tumi bɛn na wode yɛ nneɛma yi? Anaasɛ hena na ɔmaa wo tumi sɛ yɛ eyinom?

²⁹Na Yesu see wɔn sɛ: Mebisa mo asɛm biako, na mummua me, na mɛkyerɛ mo tumi ko a mede yɛ eyinom:

³⁰Yohane asubɔ no, efi soro anaasɛ efi nnipa? Mummua me!

³¹Na wɔdwennwene ho kae sɛ: Sɛ yɛka sɛ efi soro a, ɔbɛka sɛ: Ɛnne ɛdɛn nti na moannye no anni?

³²Anaa yɛnka sɛ: Efi nnipa? Nanso wosuro nkurɔfokuw no; efisɛ nnipa nyinaa bu Yohane sɛ ɔyɛ odiyifo ampa.

³³Na wobua see Yesu sɛ: Yennim. Na Yesu see wɔn sɛ: Me nso merenka tumi ko a mede yɛ eyinom menkyerɛ mo.