Read Revised Akuapem Twi DC-KYERƐW KRONKRON Marko 3 Bible Online

Marko 3 - Revised Akuapem Twi DC-KYERƐW KRONKRON bible

Marko 3

¹Na ɔkɔɔ hyiadan mu bio. Na onipa bi wɔ hɔ a ne nsa adwodwo,

²na wɔtɛw no sɛ ɔbɛsa no yare homeda anaa, na wɔakɔtoto n’ano.

³Na osee onipa a ne nsa adwodwo no sɛ: Sɔre gyina mfinimfini!

⁴Na obisaa wɔn sɛ: Ɛwɔ ho kwan sɛ wɔyɛ papa anaa bɔne homeda? Sɛ wogye obi nkwa anaasɛ wokum no? Na wɔyɛɛ komm.

⁵ Na ɔde abufuw hwɛɛ wɔn hyiae, na wɔn komaden nti ɛyɛɛ no yaw, na osee onipa no sɛ: Teɛ wo nsa! Na ɔteɛe; na ne nsa no san yɛɛ yiye.

⁶ Na Farisifo no fii adi no, ntɛm ara wɔne Herodefo kotuu ne ho agyina sɛnea wobɛsɛe no.

⁷ Na Yesu ne n’asuafo no twee wɔn ho kɔɔ mpoano; na nnipakuw pii fi Galilea dii n’akyi, na wɔn a wofi Yudea,

⁸Yerusalem, Idumea, Yordan agya ne wɔn a wɔwɔ Tiro ne Sidon fam, nnipa kuw pii a wɔtee nneɛma a ɔyɛe no baa ne nkyɛn.

⁹Na osee n’asuafo no sɛ, nkurɔfokuw no nti ɔkorow ketewa bi ntwɛn no, na wɔankyere no so.

¹⁰Na ɔsaa nnipa pii yare nti, wɔn a wɔyareyare nyinaa bɛkyeree no so sɛ wobesuso no mu.

¹¹ Na ahonhom fi nso hu no a, wɔhwehwe ase n’anim, na wɔteɛm sɛ: Wone Nyankopɔn ba no.

¹²Na ɔbraa wɔn ketee sɛ wonnyi no nkyerɛ.

¹³Na ɔkɔɔ bepɔw so; na ɔfrɛɛ wɔn a ɔno ara pɛ, na wɔbaa ne nkyɛn.

¹⁴Na oyii wɔn mu dumien sɛ wɔnka ne ho na ɔnsoma wɔn asɛnka,

¹⁵na wɔanya ahonhommɔnetu so tumi.

¹⁶Na oyii dumien no, na ɔtoo Simon din Petro;

¹⁷ Sebedeo ba Yakobo, ne ne nua Yohane, na ɔtoo wɔn din Boanerges, ase ne ɔprannaa mma;

¹⁸ne Andrea ne Filipo ne Bartolomeo ne Mateo ne Toma, ne Alfeo ba Yakobo, ne Tadeo ne Kanani Simon,

¹⁹ne Yuda Iskariot a oyii no mae no.

²⁰Na ɔbaa fie. Na nkurɔfokuw behyiae bio a enti wɔantumi annidi po.

²¹Na n'abusuafo tee no, wofi bae sɛ wɔrebɛtwe no akɔ; efisɛ wɔkae sɛ: Ne tirim ka no.

²²Na akyerɛwfo a wofi Yerusalem bae no kae sɛ: Ɔwɔ Beelsebub, na ahonhommɔne panyin so na ɔnam tu ahonhommɔne.

²³Na ɔfrɛɛ wɔn baa ne nkyɛn no, ɔkasa kyerɛɛ wɔn mmebu mu sɛ: Ɛbɛyɛ dɛn na Satan betumi atu Satan?

²⁴Na sɛ ahenni bi ne ne ho di asi a, ahenni no ntumi nnyina.

²⁵Na sɛ ofi bi ne ne ho di asi a, ofi no ntumi nnyina.

²⁶Na sɛ Satan sɔre ɔno ara ne so, na ɔne ne ho di asi a, ɔrentumi nnyina, ɛnne na n’awiei ara nen.

²⁷Obi ntumi nkɔ ɔhoɔdenfo fi nkɔfow n’afide, gye sɛ ɔkyekyere ɔhoɔdenfo no kan, ansa na wafow ne fi nneɛma.

²⁸Nokware mise mo sɛ, wɔde nnipa mma bɔne ne abususɛm a wɔbɛka nyinaa bekyɛ wɔn;

²⁹na mmom nea ɔbɛka abususɛm atia Honhom Kronkron no de, ɔrennya fakyɛ da, na daa afobu da no so.

³⁰ Efisɛ wɔkae sɛ: Ɔwɔ honhom fi.

³¹Ɛnna ne na ne ne nuanom ba begyinaa mfikyiri soma kɔɔ ne nkyɛn kɔfrɛɛ no.

³²Na nkurɔfokuw tete ne ho. Na wosee no sɛ: Hwɛ, wo na ne wo nuanom gyina adihɔ rehwehwɛ wo.

³³Na obuaa wɔn sɛ: Hena ne me na ne me nuanom?

³⁴Na otwaa n’ani hwɛɛ wɔn a wɔtete ne ho no hyiae no, ɔkae sɛ: Hwɛ, me na ne me nuanom ni!

³⁵Na obiara a ɔbɛyɛ nea Onyankopɔn pɛ no, ɔno ara ne me nuammarima, ne me nuabea, ne me na.