Read Revised Akuapem Twi DC-KYERƐW KRONKRON Luka 6 Bible Online

Luka 6 - Revised Akuapem Twi DC-KYERƐW KRONKRON bible

Luka 6

¹Na ɛbae sɛ homeda bi ɔkɔfaa aburofuw bi mu, na n’asuafo no pempan mmɛtem no bi, na wɔposae wɔ wɔn nsa mu wee.

²Na Farisifo no mu binom see wɔn sɛ: Adɛn na moyɛ nea enni ho kwan sɛ wɔyɛ homeda?

³ Na Yesu bua see wɔn sɛ: Monkenkan nea ɔkɔm dee Dawid ne wɔn a wɔka ne ho no, ɔyɛe no?

⁴ Sɛnea ɔkɔɔ Onyankopɔn fi kɔfaa Kyerɛ Abodoo no dii, na ɔde bi maa wɔn nso a wɔka ne ho a obi nni ho kwan sɛ odi bi, gye sɛ asɔfo nko ara?

⁵Na osee wɔn sɛ: Onipa ba no yɛ homeda nso wura.

⁶Na ɛbae sɛ homeda foforo bi nso ɔkɔɔ hyiadan mu kɔkyerɛkyerɛe. Na onipa bi wɔ hɔ a ne nsa nifa awu.

⁷ Nso akyerɛwfo ne Farisifo no tɛw no sɛ ɔbɛsa yare homeda anaa, na wɔanya no akɔtoto n’ano.

⁸Nanso ohuu wɔn adwene, enti osee onipa a ne nsa awu no sɛ: Sɔre gyina mfinimfini! Na ɔsɔre gyinae.

⁹Ɛnna Yesu see wɔn sɛ: Merebebisa mo: Dɛn na ɛwɔ ho kwan sɛ wɔyɛ homeda, papa anaa bɔne, sɛ wobegye obi nkwa anaasɛ wobekum no?

¹⁰Na ɔhwɛɛ wɔn nyinaa anim hyiae ka kyerɛɛ no sɛ: Teɛ wo nsa! Na ɔyɛɛ sa, na ne nsa no san yɛɛ yiye.

¹¹Na wɔn de, abufuw yɛɛ wɔn ma, na wotuu adekode wɔde bɛyɛ Yesu ho agyina.

¹²Na ɛbae sɛ nna no mu ofii adi kɔɔ bepɔw so mpaebɔ, na ɔbɔɔ Onyankopɔn mpae anadwo mu no nyinaa.

¹³ Na ade kyee no, ɔfrɛɛ n’asuafo no bae, na oyii wɔn mu dumien a ɔfrɛɛ wɔn asomafo;

¹⁴Simon a ɔfrɛɛ no Petro ne ne nua Andrea, Yakob ne Yohane, Filipo ne Bartolomeo,

¹⁵Mateo ne Toma, Alfeo ba Yakob ne Simon a wɔfrɛ no Selote,

¹⁶Yakob ba Yuda ne Yuda Iskariot a oyii no mae no.

¹⁷Na ɔne wɔn sianee no, obegyinaa baabi a ɛhɔ yɛ tamaa: Ɔne n’asuafo bebree ne nnipa pii a wofi Yudea nyinaa ne Yerusalem ne Tiro ne Sidon mpoano, a wɔbae sɛ wobetie no, na wasa wɔn yare,

¹⁸ne wɔn a ahonhom fi haw wɔn; na ɔsaa wɔn yare.

¹⁹Na nkurɔfokuw no nyinaa hwehwɛe sɛ wɔde wɔn nsa bɛka no, efisɛ ahoɔden fi no mu ba; na ɔsaa wɔn nyinaa yare.

²⁰Na ɔmaa n’ani so kyerɛɛ n’asuafo no kae sɛ: Nhyira ne mo ahiafo, na Onyankopɔn ahenni yɛ mo dea.

²¹ Nhyira ne mo a ɔkɔm de mo yi, na wɔbɛma moamee. Nhyira ne mo a moresu yi, na mobɛserew.

²²Nhyira ne mo sɛ nnipa kyi mo, na woyi mo fi wɔn mu, na wɔyaw mo, na wɔbɔ mo dimmɔne onipa ba no nti.

²³Momma mo ani nnye da no, na munni ahurusi! Na hwɛ, mo akatua so ɔsoro; na saa ara na wɔn agyanom de yɛɛ adiyifo no.

²⁴ Nanso mo a moyɛ adefo de, munnue! Na moanya mo awerɛkyekye dedaw.

²⁵ Mo a moamee, munnue! Na ɔkɔm bɛde mo. Mo a moreserew yi, munnue! Na mo werɛ bɛhow, na moasu.

²⁶ Nnipa nyinaa kasa mo ho yiye a, munnue! Na saa ara nso na wɔn agyanom de yɛɛ atoro adiyifo no.

²⁷Na mise mo a mote yi sɛ: Monnɔ mo atamfo, monyɛ wɔn a wɔtan mo yiye,

²⁸munhyira wɔn a wɔdome mo, mommɔ mpae mma wɔn a wɔhaw mo!

²⁹Nea ɔbɔ w’aso biako mu no, dan biako no nso ma no. Na nea ɔfa w’atade nkataso no, mfa w’atade nhyɛase nso nkame no!

³⁰Obiara a ɔsrɛ wo no, ma no! Na nea ogye w’ade no, mmisa no bio!

³¹ Na sɛnea mopɛ sɛ nnipa nyɛ mo no, mo nso monyɛ wɔn saa ara!

³²Na sɛ modɔ wɔn a wɔdɔ mo a, aseda bɛn na mowɔ? Na nnebɔneyɛfo nso dɔ wɔn a wɔdɔ wɔn.

³³Na sɛ moyɛ wɔn a wɔyɛ mo yiye no yiye a, aseda bɛn na mowɔ? Na nnebɔneyɛfo nso yɛ saa ara.

³⁴ Na sɛ mofɛm wɔn a mo ani da so sɛ mubegye wɔn hɔ bio a, aseda bɛn na mowɔ? Na nnebɔneyɛfo nso fɛm nnebɔneyɛfo sɛ wobegye wɔn hɔ saa ara.

³⁵Na monnɔ mo atamfo, na monyɛ wɔn yiye na momfɛm wɔ nea ani nni biribi so, na mo akatua ayɛ bebree, na moayɛ nea ɔwɔ sorosoro no mma, efisɛ ɔno de, oye ma bonniayɛfo ne nnipa bɔne.

³⁶Enti monyɛ timmɔbɔ sɛnea mo agya nso yɛ timmɔbɔ no.

³⁷ Nanso mummmu ntɛn, na wɔammu mo ntɛn; mummmu fɔ, na wɔammu mo fɔ; momfa nkyɛ, na wɔde akyɛ mo.

³⁸ Momma, na wɔama mo; susukora pa a wɔamia so na wɔawosow na abu so na wɔde begu mo ntama mu. Na susukora a mode susuw no, ɛno ara na wɔde besusuw ama mo bio.

³⁹ Na obuu wɔn bɛ sɛ: Onifuraeni betumi akyerɛ onifuraeni kwan? Wɔn baanu nyinaa renhwe amoa mu anaa?

⁴⁰ Osuani nsen ne kyerɛkyerɛfo; nea wasua biribi ahu na ɔbɛyɛ sɛ ne kyerɛkyerɛfo.

⁴¹Na ɛdɛn na wohwɛ duaa a ɛwɔ wo nua aniwa so, na mpuran a ɛda wo ankasa aniwa so de, wunhu?

⁴²Ɛbɛyɛ dɛn na wubetumi aka akyerɛ wo nua sɛ: Onua, ma minyi duaa a ɛda w’aniwa so no! Na wo ankasa aniwa so mpuran de, wunhu? Nyaatwomni, yi mpuran no fi w’aniwa so kan, ansa na woahu ade yiye de ayi wo nua aniwa so duaa.

⁴³Na dua pa biara nni hɔ a ɛsow aba bɔne, nanso dua bɔne biara nni hɔ a ɛsow aba pa.

⁴⁴Na dua biara n’aba na wɔde hu; na wɔntetew borɔdɔma wɔ nsɔe so, nanso wɔntetew obobe aba nguare so.

⁴⁵Onipa pa fi nnepa a waboaboa ano ne koma mu no mu na oyi adepa adi, na onipa bɔne fi nnebɔne a waboaboa ano ne koma mu no mu na oyi adebɔne adi; na efi nea ayɛ koma ma aboro so no mu na ano ka.

⁴⁶ Na ɛdɛn na mofrɛ me: Awurade, Awurade, na monyɛ nea mise?

⁴⁷Obiara a ɔba me nkyɛn na otie me nsɛm na ɔyɛ no, mɛkyerɛ mo nea ɔsɛ no:

⁴⁸Ɔte sɛ onipa a ɔtoo aban, na otutu ma ɛkɔɔ fam pa ara, na ɔtoo ase ɔbotan so; na nsu yirii no, ɛfaa aban no ho, na antumi anwosow no, efisɛ wɔtoo no yiye.

⁴⁹Na nea ɔte na ɔnyɛ no te sɛ onipa a ɔtoo aban asase ani, na enni fapem; ɛno na nsu yirii faa ho, na ntɛm ara ɛhwee ase, na aban no sɛee koraa.