Read Revised Akuapem Twi DC-KYERƐW KRONKRON Deuteronomium 15 Bible Online

Deuteronomium 15 - Revised Akuapem Twi DC-KYERƐW KRONKRON bible

Deuteronomium 15

¹ Mfirihyia ason biara awiei no, fa biribi kyɛ.

²Na sɛ wɔnkyɛ ade no ni: Ɔdefɛmfo biara a ɔde biribi afɛm ne yɔnko mfa nkyɛ no; ɔnnhyɛ ne yɔnko ne ne nua sɛ ontua, efisɛ wɔapae no adekyɛ afe ama AWURADE.

³Ɔnanani de, hyɛ no ma ontua. Wo biribiara a ɛwɔ wo nua nkyɛn de, fa kyɛ no.

⁴Anka ɛnsɛ sɛ ohiani wɔ wo mu, efisɛ nhyira na AWURADE behyira wo asase a AWURADE wo Nyankopɔn de rema wo sɛ agyapade a kɔfa no so.

⁵Otie nko na tie AWURADE wo Nyankopɔn nne sɛ wobɛhwɛ ayɛ mmara nsɛm a merehyɛ wo nnɛ yi nyinaa.

⁶ Na AWURADE wo Nyankopɔn behyira wo sɛnea ɔka kyerɛɛ wo no, na wode afɛm amanaman pii, na wo de, worenkɔfɛm, na wubedi amanaman pii so, na wo de, wɔrenni wo so.

⁷ Sɛ wo nuanom mu biara dan wo mu hiani, wo kurow biara mu, asase a AWURADE wo Nyankopɔn de rema wo no so a, mpirim wo koma, na mmua wo nsa ano nhyɛ wo nua hiani;

⁸ na bue wo nsam ma no, na fɛm no nea ɛbɛso ne hia a ehia no no.

⁹Hwɛ yiye na wo komam amma ahuhusɛm bi sɛ: Afe a ɛto so asɔn, adekyɛ afe no abɛn: Na woannya wo nua hiani no ho ani bɔne sɛ woremma no hwee, na wanteɛm amfrɛ AWURADE anhyɛ wo, na annan wo bɔne.

¹⁰Yi wo yam ma no, na mma ɛnnyɛ wo koma ahi sɛ wobɛma no; na saa ade yi nti, AWURADE wo Nyankopɔn behyira wo, wo nnwuma nyinaa ne nea wode wo nsa bɛka nyinaa mu.

¹¹ Na ohiani rempa w’asase so, enti na merehyɛ wo sɛ, bue wo nsam ma wo nua, wo brɛfo ne wo hiani a ɔwɔ w’asase so.

¹² Sɛ wɔtɔn wo nua Hebrini, ɔbarima anaa ɔbea ma wo, na ɔsom wo mfirihyia asia a, afe a ɛto so ason no gya no kwan ma omfi wo nkyɛn mfa ne ho nkodi.

¹³Na sɛ woregya no kwan na wafa ne ho afi wo nkyɛn akodi a, mma ɔnnkɔ nsapan:

¹⁴Fa wo nguan, ne w’awiporowbea ade, ne wo nsa-kyi-amoa mu ade no bi kyɛ no; ade a AWURADE wo Nyankopɔn de ahyira wo no bi na fa ma no.

¹⁵ Na kae sɛ woyɛɛ akoa Misraim asase so, na AWURADE wo Nyankopɔn gyee wo; enti na nnɛ merehyɛ wo mmara yi.

¹⁶Na sɛ ɛba sɛ ɔka kyerɛ wo sɛ: Meremfi wo nkyɛn, na medɔ wo ne wo fi, efisɛ odi yiye wɔ wo nkyɛn a,

¹⁷ɛnne fa fitii fiti n’asom apongua ho na ɔnyɛ w’akoa daa; na w’afenaa nso yɛ no saa ara.

¹⁸Mma ɛnnyɛ wo den sɛ wubegya no kwan na wafa ne ho afi wo nkyɛn akodi, na ɔpaani akatua fa na ɔde asom wo mfirihyia asia; na AWURADE wo Nyankopɔn behyira wo nea woyɛ nyinaa mu.

¹⁹ W’anantwi ne wo nguan mmakan anini a wɔbɛwo no, yɛ wɔn kronkron ma AWURADE wo Nyankopɔn. Mfa wo nantwi abakan nyɛ adwuma, na ntwitwa wo nguan abakan ho;

²⁰ AWURADE wo Nyankopɔn anim na di, daa afirihyia, faako a AWURADE beyi no, wo ne wo fi.

²¹ Na sɛ dɛm bi wɔ ne ho, ɔtɔ apakye anaasɛ n’ani afura, anaasɛ dɛmmɔne biara wɔ ne ho a, mfa no mmɔ AWURADE wo Nyankopɔn afɔre;

²² wo kurow apon mu na di, nea ne ho ntew ne nea ne ho tew nyinaa nni, sɛ wodi ɔwansan ne ɔforote;

²³ ne mogya nko na nni, hwie gu fam sɛ nsu.