Read Revised Akuapem Twi DC-KYERƐW KRONKRON Deuteronomium 23 Bible Online

Deuteronomium 23 - Revised Akuapem Twi DC-KYERƐW KRONKRON bible

Deuteronomium 23

¹Nea wɔapɛtɛw ne hwea ne nea ne barima atwa no mmma AWURADE bagua mu.

²Aguaman ba bi mmma AWURADE bagua mu; n’awo ntoatoaso a ɛto so du po mmma AWURADE bagua mu.

³Amonni anaa Moabni mmma AWURADE bagua mu; wɔn awo ntoatoaso a ɛto so du po mmma AWURADE bagua mu da,

⁴ efisɛ wɔamfa aduan ne nsu ammehyia mo ɔkwan mu, bere a mufi Misraim reba no, ne sɛ wɔkɔbɔɔ Beor ba Bileam a ofi Petor wɔ Mesopotamia paa sɛ ɔmmɛdome wo nti.

⁵Na AWURADE wo Nyankopɔn ampɛ sɛ otie Bileam, na AWURADE wo Nyankopɔn dan nnome no nhyira maa wo, efisɛ AWURADE wo Nyankopɔn dɔ wo.

⁶Nhwehwɛ wɔn asomdwoe ne wɔn papa da, wo nna nyinaa.

⁷ Nkyi Edomni, efisɛ ɔyɛ wo nua. Nkyi Misraimni, efisɛ woakɔyɛ n’asase so hɔho.

⁸Mma a wɔbɛwo ama wɔn no awo ntoatoaso a ɛto so abiɛsa mmra AWURADE bagua mu.

⁹Sɛ wufi kɔbɔ w’atamfo so nsra a, hwɛ wo ho yiye adebɔne nyinaa ho.

¹⁰ Sɛ ɔbarima bi wɔ wo mu a ne ho ntew, nea ɛyɛɛ no anadwo ho a, ɛnne omfi nkɔ nsra no akyi, ɔmmma nsra no mu.

¹¹Na ɛrekɔ anwummere no, ɔmfa nsu nguare, na sɛ owia kɔtɔ a, ɔmmra nsra no mu.

¹²Na yɛ baabi, nsra no akyi fa, na woafi adi akɔ hɔ;

¹³na nya ɔsosɔw wɔ w’ade mu, na sɛ wokɔkotow nsra no akyi hɔ a, wode afunu akotow so, na woakata nea afi wo mu no so.

¹⁴ Efisɛ AWURADE wo Nyankopɔn nam wo nsra mu sɛ ɔregye wo, na ɔde w’atamfo ahyɛ wo nsa; enti ma wo nsra mu nyɛ kronkron, na wanhu wo mu aniwude bi, na wannan amfi w’akyi.

¹⁵Mfa akoa a wafi ne wura nkyɛn abɛdɔm wo nhyɛ ne wura nsa;

¹⁶ ɔntena wo nkyɛn wɔ mo mu, wo nkurow mu biako a ɔbɛfa a eye ma no mu; nhyɛ no so.

¹⁷ Israel mmabea mu biara nnnan aguaman, na Israel babarima biara nnnan aguaman.

¹⁸ Mfa ɔbea guamanfo apɛde anaa ɔkraman (ɔbarima oguamanfo) apaade mma AWURADE wo Nyankopɔn fi wo bɔhyɛ biara mu, na n’abien no yɛ AWURADE wo Nyankopɔn akyide.

¹⁹ Nnye wo nua sika ho mfɛntom, anaa aduan ho mfɛntom, anaa biribiara a wogye ɛho mfɛntom ho mfɛntom.

²⁰Ɔnanani nkyɛn na gye mfɛntom, na wo nua de, nnye no hɔ bi, na AWURADE wo Nyankopɔn nhyira wo nea wode wo nsa bɛka nyinaa mu, asase a worekɔ akɔfa no so.

²¹ Sɛ wohyɛ AWURADE wo Nyankopɔn bɔ a, nnodow ne tua ho, efisɛ AWURADE wo Nyankopɔn bɛhwehwɛ wɔ wo hɔ, na adan wo bɔne.

²²Nanso woanhyɛ bɔ no koraa de a, ɛnyɛ bɔne mma wo.

²³Nea afi w’ano no, di so na yɛ, sɛnea wufi wo pɛ mu de w’ano ahyɛ AWURADE wo Nyankopɔn bɔ no.

²⁴Sɛ wudu wo yɔnko bobeturo mu a, di aba no bi sɛnea wopɛ mee, na mfa bi ngu w’ade mu.

²⁵ Sɛ wudu wo yɔnko awi a egyina hɔ mu a, fa wo nsa pompan mmɛtem no bi, na mma kantankrankyi so wɔ wo yɔnko awi so.