Read Revised Akuapem Twi DC-KYERƐW KRONKRON Deuteronomium 25 Bible Online

Deuteronomium 25 - Revised Akuapem Twi DC-KYERƐW KRONKRON bible

Deuteronomium 25

¹Sɛ ɔham ba mmarima ntam a, wɔmmra asɛnnii, na wommu wɔn atɛn, na wommu ɔtreneeni bem, na wommu ɔbɔnefo fɔ.

²Na sɛ ɔbɔnefo no di ɔhwe a, ɔtemmufo no mma ɔnna fam, na wɔnhwe no wɔ n’anim, dodow a ɛsɛ ne bɔne no.

³ Mmaa aduanan na wɔnka no, ɛnntena so, na wantena so anhwe no mmaa pii ansen eyi, na wo nua annan w’ani so ɔhohorani.

⁴ Nkata nantwi a ɔporow awi ano.

⁵ Sɛ anuanom tena faako na wɔn mu biako wu na onni ba a, owufo no yere nnkɔ baabi nnkɔware ɔhɔho; ne kunu ne nua nkɔ ne ho nware no, na ɔnyɛ okunu nua asɛde mma no.

⁶Na abakan a ɔbea no bɛwo no no, wɔmfa ne nua a owui no din nto no, na ne din ampopa amfi Israel.

⁷Na sɛ ɔbarima no mpɛ sɛ ɔware ne nua yere no a, ɛnne ne nua yere no nkɔ kurow pon ano mpanyimfo nkyɛn nkɔka sɛ: Me kunu ne nua mpɛ sɛ ɔma ne nua din tena Israel, ɔmpɛ sɛ ɔyɛ me okunu nua asɛde.

⁸Na ne kurom mpanyimfo no mfrɛ no nkasa nkyerɛ no; na sɛ ogyina hɔ ka sɛ: Mempɛ sɛ meware no, a,

⁹ɛnne ne nua yere no ntwiw mmɛn no mpanyimfo no anim, na ɔnsan ne nan mpaboa, na onhinam n’ani so ntasu nka sɛ: Saa na wɔnyɛ ɔbarima a ɔmpɛ sɛ osiesie ne nua fi.

¹⁰Na wɔmfrɛ ne fi Israel mu sɛ: Nea ne mpaboa asan no fi.

¹¹Sɛ mmarima reko, obi ne ne nua, na obiako yere twiw bɛn sɛ ɔrebegye ne kunu afi nea ɔrehwe no no nsam, na ɔteɛ ne nsa so ne barima mu a,

¹²ɛnne twa ne nsa, mma w’ani nnhu no mmɔbɔ.

¹³ Nnya abrammo horow abien, kɛse ne ketewa, wɔ wo fotow mu.

¹⁴Nnya olonka ahorow abien, kɛse ne ketewa, wɔ wo fi.

¹⁵Nya abrammokwanmu a ɛteɛ, nya olonka a edu na ɛteɛ, na wo nna aware asase a AWURADE wo Nyankopɔn de rema wo no so.

¹⁶ Na AWURADE wo Nyankopɔn akyide ne wɔn a wɔyɛ eyinom nyinaa, wɔn a wotwa nkontompo nyinaa.

¹⁷ Kae nea Amalek yɛɛ wo ɔkwan so bere a mufi Misraim reba no:

¹⁸Sɛnea ɔbɛtoaa wo ɔkwan mu, bere a woatɔ piti na woabrɛ, na otwaa wɔn a aka w’akyi no nyinaa gui wɔ w’akyi, na wansuro Onyankopɔn.

¹⁹ Enti sɛ AWURADE wo Nyankopɔn ma wo ɔhome fi w’atamfo a wɔatwa wo ho ahyia nyinaa nsam, asase a AWURADE wo Nyankopɔn de rema wo sɛ fa tena so no so a, popa Amalek nkae fi ɔsoro ase; mma wo werɛ mmfi.