Read Revised Akuapem Twi DC-KYERƐW KRONKRON Deuteronomium 26 Bible Online

Deuteronomium 26 - Revised Akuapem Twi DC-KYERƐW KRONKRON bible

Deuteronomium 26

¹Na sɛ wunya du asase a AWURADE wo Nyankopɔn de rema wo sɛ di so no so na wofa tena so a,

² fa asase no so adua a wubenya w’asase a AWURADE wo Nyankopɔn de rema wo no so no nyinaa aduankan no bi gu kyerɛnkyɛ mu, na fa kɔ faako a AWURADE wo Nyankopɔn bɛkyerɛ sɛ ne din ntena hɔ no,

³na kɔ ɔsɔfo a ɔwɔ so saa bere no nkyɛn kɔka kyerɛ no sɛ: Mepae mu nnɛ mekyerɛ AWURADE wo Nyankopɔn sɛ madu asase a AWURADE kaa yɛn agyanom ntam sɛ ɔde bɛma yɛn no so.

⁴Na ɔsɔfo no nnye kyerɛnkyɛ no mfi wo nsam mfa nsi AWURADE wo Nyankopɔn afɔremuka no anim.

⁵ Na gye so ka AWURADE wo Nyankopɔn anim sɛ: M’agya yɛ Aramni a anka okyinkyini, na ɔde nnipa kakraa bi sian kɔɔ Misraim kɔsoɛɛ hɔ hɔho, na ɔyɛɛ ɔman kɛse a wɔyɛ den na wɔdɔe wɔ hɔ.

⁶Na Misraimfo yɛɛ yɛn bɔne na wɔhyɛɛ yɛn so na wɔde ɔsom dennen too yɛn so;

⁷na yesu frɛɛ AWURADE yɛn agyanom Nyankopɔn, na AWURADE tiee yɛn nne, na ohuu yɛn ade mmɔbɔ a ɛyɛ ne yɛn haw ne yɛn ahoguan.

⁸Na AWURADE de nsa a ɛyɛ den ne basa a wateɛm ne ahodwiriwde akɛse ne nsɛnkyerɛnne ne anwonwade yii yɛn fii Misraim bae.

⁹Na ɔde yɛn aba ha yi de asase yi ama yɛn, asase a ɛsen nufusu ne ɛwo.

¹⁰Na afei, hwɛ, mede asase a wo, AWURADE, de ama me no so aduankan maba! Na fa si AWURADE wo Nyankopɔn anim, na sɔre AWURADE wo Nyankopɔn anim,

¹¹ na gye w’ani adepa a AWURADE wo Nyankopɔn de ama wo ne wo fi no nyinaa ho, wo ne Lewini ne ɔhɔho a ɔwɔ wo mu no.

¹² Sɛ wuwie wo nnɔbae mu ntotoso du du nyinaa yiyi, afe a ɛto so abiɛsa a ɛne ntotoso du du ma afe no mu, na wode ama Lewini ne ɔhɔho ne ayisaa ne okunafo ama wɔadi wo nkurow mu amee a,

¹³ɛnne ka wɔ AWURADE wo Nyankopɔn anim sɛ: Mayi akronkronne afi me fi, na mede mama Lewini ne ɔhɔho ne ayisaa ne okunafo nso, sɛ wo mmara a woahyɛ me no nyinaa te, mamfom wo mmara nsɛm no na me werɛ amfi;

¹⁴minnii bi m’awerɛhow mu, na minyii bi, bere a me ho ntew, na memfaa bi memmaa owufo bi; matie AWURADE me Nyankopɔn nne, na mayɛ sɛnea woahyɛ me nyinaa.

¹⁵Fi wo tenabea kronkron ɔsoro brɛ w’ani ase hwɛ, na hyira wo man Israel ne asase a wode ama yɛn, sɛnea wokaa yɛn agyanom ntam no, asase a ɛsen nufusu ne ɛwo no.

¹⁶Ɛnnɛ da yi AWURADE wo Nyankopɔn rehyɛ wo sɛ: Yɛ ahyɛde ne atemmude yi, na fa wo koma nyinaa ne wo kra nyinaa di so na yɛ.

¹⁷Ɛnnɛ woaka wɔ AWURADE ho sɛ ɔbɛyɛ wo Nyankopɔn, na woanantew n’akwan so, na woadi n’ahyɛde ne ne mmara nsɛm ne n’atemmude so, na woatie ne nne;

¹⁸na AWURADE nso aka wɔ wo ho nnɛ sɛ wobɛyɛ n’ankasa ne man, sɛnea wahyɛ wo bɔ no, na woadi ne mmara nsɛm nyinaa so,

¹⁹ na wama wo so akyɛn amanaman a ɔyɛɛ wɔn no nyinaa, de wo ayɛ ayeyi ne din ne anuonyam, na woayɛ ɔman kronkron ama AWURADE wo Nyankopɔn sɛnea ɔkae no.