Read Revised Akuapem Twi DC-KYERƐW KRONKRON Deuteronomium 31 Bible Online

Deuteronomium 31 - Revised Akuapem Twi DC-KYERƐW KRONKRON bible

Deuteronomium 31

¹Na Mose kɔe kɔkaa nsɛm yi kyerɛɛ Israel nyinaa.

² Na ɔka kyerɛɛ wɔn sɛ: Mfirihyia ɔha aduonu ba ne me nnɛ, mintumi mimfi adi na mintumi memma mu bio; nso AWURADE aka akyerɛ me sɛ: Worentwa Yordan yi.

³ AWURADE wo Nyankopɔn, ɔno na ɔretwa adi w’anim, ɔno na ɔbɛsɛe amanaman yi afi w’anim, na woadi wɔn so; Yosua na ɔretwa adi w’anim, sɛnea AWURADE aka no.

⁴ Na AWURADE bɛyɛ wɔn sɛnea ɔyɛɛ Amorifo ahene Sihon ne Og a ɔsɛee wɔn no ne wɔn asase.

⁵ Na AWURADE de wɔn bɛhyɛ mo nsa na moayɛ wɔn sɛnea mmara nsɛm a mahyɛ mo no nyinaa te.

⁶Monyɛ den na monyɛ nnam, munnsuro na mommma wɔn ho nnyɛ mo hu, efisɛ AWURADE wo Nyankopɔn no, ɔno na ɔne wo nam; ɔrempa wo na ɔrennyaw wo.

⁷ Na Mose frɛɛ Yosua, na ɔka kyerɛɛ no Israel nyinaa anim sɛ: Yɛ den na yɛ nnam, na wo na wode ɔman yi bɛkɔ asase a AWURADE kaa wɔn agyanom ntam sɛ ɔde bɛma wɔn no so, na wo na wobɛkyɛ ama wɔn.

⁸Na AWURADE, ɔno na ɔredi w’anim, ɔno na obedi w’akyi, ɔrempa wo na ɔrennyaw wo; nsuro na mma wo bo nntu.

⁹Na Mose kyerɛw mmara yi, na ɔde maa asɔfo no, Lewi mma a wɔsoa AWURADE apam adaka no, ne Israel mpanyimfo nyinaa.

¹⁰ Na Mose hyɛɛ wɔn sɛ: Daa mfirihyia ason awiei, adekyɛ afe afahyɛ no mu, asese nnapɔnna no mu

¹¹a Israel nyinaa aba rebepue AWURADE wo Nyankopɔn anim faako a ɔbɛkyerɛ hɔ no, kenkan mmara yi, Israel nyinaa anim gu wɔn asom.

¹²Ma ɔman no mmarima ne mmea, mmofra ne wo hɔho a ɔwɔ wo nkurow mu mmɔ gua na wontie, na wonsua, nsuro AWURADE wo Nyankopɔn, na wɔnhwɛ mmara yi mu nsɛm nyinaa nni so:

¹³Na wɔn mma a wonnim no ntie, na wonsua, nsuro AWURADE mo Nyankopɔn, nna a mode te asase a moretwa Yordan akɔ hɔ akodi so no so no nyinaa.

¹⁴Na AWURADE ka kyerɛɛ Mose sɛ: Hwɛ, wo nna a worebewu abɛn; frɛ Yosua bra, na mummegyina ahyiae ntamadan no mu, na menhyɛ no mmara. Na Mose ne Yosua bae begyinaa ahyiae ntamadan no mu.

¹⁵ Na AWURADE de omununkum dum beyii ne ho adi ntamadan no mu, na omununkum dum no begyinaa ntamadan no ano.

¹⁶Na AWURADE ka kyerɛɛ Mose sɛ: Hwɛ, wo ne w’agyanom rekɔda, na ɔman yi bɛsɔre akodi asase a wɔrekɔ so hɔ no anananyame akyi aguamammɔ mu, na wɔagyaw me, na wɔato m’apam a me ne wɔn pamee no.

¹⁷Na me bo befuw wɔn da no, na magyaw wɔn, na mayi m’ani mahintaw wɔn, na wɔamene wɔn, na bɔne pii ne ahohia horow bɛto wɔn ama wɔaka da no sɛ: So ɛnyɛ yɛn Nyankopɔn a onni yɛn mu nti na bɔne yi abɛto yɛn yi anaa?

¹⁸Na me de, bɔne a wɔayɛ no nyinaa, sɛ wɔaman akɔ anyame foforo nkyɛn nti, da no, ohintaw na mede m’ani mehintaw.

¹⁹ Na afei monkyerɛw dwom yi mfa, na fa kyerɛkyerɛ Israelfo; fa hyɛ wɔn anom, na dwom yi nni me adanse, Israelfo mu.

²⁰ Na mede wɔn medu asase a mekaa ho ntam mekyerɛɛ wɔn agyanom a ɛsen nufusu ne ɛwo no so, na wobedidi amee na wɔayɛ akɛse, na wɔaman akɔ anyame foforo nkyɛn akɔsom wɔn, na wɔapo me na wɔato m’apam.

²¹ Na sɛ bɔne pii ne ahohia horow bɛto wɔn a, dwom yi bɛyɛ ɔdansefo adi adanse wɔ wɔn anim, efisɛ ɛrempa wɔn asefo anom. Na minim wɔn adwene a wɔredwen nnɛ po, ansa na mede wɔn madu asase a mekaa ho ntam no so.

²²Na Mose kyerɛw dwom yi da no ara, na ɔkyerɛɛ Israelfo no.

²³Na AWURADE hyɛɛ Nun ba Yosua sɛ: Yɛ den na yɛ nnam; na wo na wode Israelfo bɛkɔ asase a mekaa wɔn ɛho ntam no so: Na me na medi w’akyi.

²⁴Na Mose kyerɛw mmara yi mu nsɛm de hyɛɛ nhoma mu wiei koraa no,

²⁵Mose hyɛɛ Lewifo a wɔso AWURADE apam adaka no sɛ:

²⁶Momfa mmara nhoma yi nto AWURADE mo Nyankopɔn apam adaka no ho, na ɛntena hɔ nni wo adanse.

²⁷Na me de, minim w’atuatew ne wo kɔn a asen; hwɛ, meda so ne mo te ase nnɛ yi po moyɛ AWURADE anim atuatewfo, na me wu akyi ɛ!

²⁸ Momma mo mmusuakuw mu mpanyimfo nyinaa ne mo ahwɛfo mmɛbɔ me nkyɛn gua, na menka nsɛm yi nyinaa mingu wɔn asom, na memfrɛ ɔsoro ne asase minni wɔn adanse.

²⁹Na minim sɛ me wu akyi no, ɔsɛe na mobɛsɛe, na moaman afi ɔkwan a mahyɛ mo no so, na bɔne abɛto mo daakye, efisɛ mobɛyɛ AWURADE anim bɔne, na mode mo nsa ano adwuma bɛhyɛ no abufuw.

³⁰Na Mose kaa dwom yi mu nsɛm guu Israel bagua nyinaa asom de kosii sɛ owiei.