Read Revised Akuapem Twi DC-KYERƐW KRONKRON Yohane 10 Bible Online

Yohane 10 - Revised Akuapem Twi DC-KYERƐW KRONKRON bible

Yohane 10

¹Mereka akyerɛ mo nokware mu pa ara sɛ, nea ɔmfa ɔpon ano nkɔ nguannan mu, na ɔforo fa baabi no, yɛ owifo ne odwowtwafo;

²na nea ɔfa ɔpon ano kɔ mu no, ne nguan no hwɛfo.

³Ɔno na ɔponanohwɛfo hiɛ ma no, na nguan no te ne nne, na ɔbɔ n’ankasa nguan din frɛ wɔn de wɔn fi adi.

⁴Na ɔma n’ankasa nguan fi adi a, odi wɔn anim; na nguan no di n’akyi, efisɛ wonim ne nne.

⁵Na ɔhɔho de, wɔrenni n’akyi, wobeguan no, efisɛ wonnim ananafo nne.

⁶Yesu de bɛ yi buu wɔn; na wɔn de, wɔanhu asɛm ko a ɔkaa wɔn no.

⁷Ɛnna Yesu see wɔn bio sɛ: Mereka akyerɛ mo nokware mu pa ara sɛ: Mene nguan no pon no.

⁸ Wɔn a wodii me kan bae no nyinaa yɛ awifo ne adwowtwafo; na nguan no antie wɔn.

⁹Mene ɔpon no; sɛ obi fa me so kɔ mu a, wobegye no nkwa, na ɔbɛkɔ mu, na obefi adi, na obenya adidibea.

¹⁰ Owifo mma, gye sɛ ɔrebewia, na wakum, na wasɛe; na me de, mebae, na wɔanya nkwa, na wɔanya no mmoroso.

¹¹ Mene guanhwɛfo pa no. Oguanhwɛfo pa de ne kra to hɔ ma nguan no;

¹²na ɔpaani a ɔnyɛ oguanhwɛfo na nguan no nyɛ ne dea no hu pataku sɛ ɔreba a, ogyaw nguan no guan; na pataku no bɛkyere wɔn bɔ wɔn hwete.

¹³Na ɔpaani guan, efisɛ ɔyɛ ɔpaani, na onnwen nguan no ho.

¹⁴ Mene guanhwɛfo pa no; na minim me de, na me de nso nim me,

¹⁵ sɛnea Agya no nim me, na me nso minim Agya no. Na mede me kra meto hɔ mema nguan no.

¹⁶ Na mewɔ nguan foforo a womfi ban yi mu; wɔn nso na etwa sɛ mede wɔn meba, na wobetie me nne, na ayɛ kuw biako ne ɔhwɛfo biako.

¹⁷Eyi nti na agya no dɔ me, efisɛ mede me nkwa meto hɔ, na mafa bio.

¹⁸ Obi nnye me nsam, na m’ankasa na mede meto hɔ; mewɔ ho kwan sɛ mede meto hɔ, na mewɔ ho kwan sɛ mefa bio; ahyɛde yi na minyae m’Agya nkyɛn.

¹⁹ Ɛnna nsɛm yi nti mpaepaemu baa Yudafo no mu bio.

²⁰ Na wɔn mu bebree kae sɛ: Ɔwɔ honhommɔne, na wabɔ dam; adɛn nti na mutie no?

²¹Ebinom se: Nsɛm yi nyɛ nea ɔwɔ honhommɔne nsɛm. Honhommɔne betumi abue anifuraefo ani anaa?

²²Na Asɔrefidwira afahyɛ adu wɔ Yerusalem, na awɔw bere aba.

²³ Na Yesu nenam asɔrefi Solomon abrannaa so.

²⁴Ɛnna Yudafo betwaa ne ho hyiae, na wosee no sɛ: Wobɛma yɛatwɛn akosi da bɛn? Sɛ wone Kristo no a, pae mu ka kyerɛ yɛn pefee.

²⁵ Yesu buaa wɔn sɛ: Maka makyerɛ mo, na munnye nni; nnwuma a meyɛ m’agya din mu no, ɛno na edi me adanse.

²⁶ Na mo de, munnye nni; efisɛ mumfi me nguan no mu.

²⁷ Me nguan tie me nne, na me nso minim wɔn, na wodi m’akyi;

²⁸na mema wɔn daa nkwa, na wɔrenyera, na obi renhuam wɔn mfi me nsam da.

²⁹M’agya a ɔde wɔn maa me no so sen nneɛma nyinaa; na obi rentumi nhuam wɔn m’agya nsam.

³⁰Me ne agya no yɛ baako.

³¹ Ɛnna Yudafo no tasee abo bio sɛ wɔde rebesiw no.

³²Yesu buaa wɔn sɛ: Nnwuma pa pii na mayɛ makyerɛ mo a efi Agya no nkyɛn; emu nea ɛwɔ he nti na morebesiw me abo yi?

³³ Yudafo no buaa no sɛ: Ɛnyɛ adwuma pa nti na yɛrebesiw wo abo, na abususɛm nti, efisɛ wo a woyɛ onipa yɛ wo ho sɛ Onyankopɔn.

³⁴ Yesu buaa wɔn sɛ: Wɔnkyerɛw mo mmara mu sɛ: Mekae sɛ: Moyɛ anyame?

³⁵Sɛ ɔfrɛɛ wɔn a Onyankopɔn asɛm baa wɔn nkyɛn no anyame na wontumi nsan kyerɛw no a,

³⁶ adɛn nti na moka nea Agya ayɛ no kronkron, na wasoma no wiase no ho sɛ: Woka abususɛm, sɛ mekae sɛ: Onyankopɔn Ba ne me nti?

³⁷Sɛ menyɛ m’Agya nnwuma a, ɛnne munnnye me nnni;

³⁸na sɛ meyɛ, na me de munnye me nni a, munnye nnwuma no nni, na moahwɛ ahu sɛ Agya no wɔ me mu, na me nso mewɔ no mu.

³⁹ Ɛnna wɔhwehwɛe bio sɛ wɔkyere no, na ofii wɔn nsa kɔe.

⁴⁰ Na osiim kɔɔ Yordan agya noho bio wɔ faako a Yohane bɔɔ asu kan no, na ɔkɔtenaa hɔ.

⁴¹Na nnipa pii baa ne nkyɛn, na wɔkae sɛ: Yohane anyɛ sɛnkyerɛnne bi de, nanso nneɛma a Yohane kae wɔ oyi ho nyinaa no yɛ nokware.

⁴²Na nnipa pii gyee no dii wɔ hɔ.