Read Revised Akuapem Twi DC-KYERƐW KRONKRON Yohane 15 Bible Online

Yohane 15 - Revised Akuapem Twi DC-KYERƐW KRONKRON bible

Yohane 15

¹Mene nokware bobe no, na m’Agya ne okuafo no.

²Me ho baa biara a ɛnsow aba no, oyi; na ebiara a ɛsow aba no, oyiyi ho, na asow aba bebree.

³Asɛm a maka makyerɛ mo no nti mo ho anya afi.

⁴Montena me mu, na me nso mentena mo mu. Sɛnea baa ntumi mfi n’ankasa mu nsow aba gye sɛ ɛtena obobe no mu no, saa ara nso na muntumi, gye sɛ motena me mu.

⁵ Mene bobe no, mone abaa no. Nea ɔtena me mu na me nso metena no mu no, ɔno ara na ɔsow aba pii; na mokwati me a, muntumi nyɛ hwee.

⁶Sɛ obi antena me mu a, wɔtow no kyene sɛ baa, na ewu; na wɔboaboa ano de kogu gya mu, na ɛhyew.

⁷ Sɛ motena me mu na me nsɛm tena mo mu a, mobɛsrɛ biribiara a mopɛ, na ɛbɛyɛ ama mo.

⁸Eyi mu na wɔahyɛ m’Agya anuonyam, sɛ mosow aba pii; ɛno na mobɛyɛ me asuafo.

⁹Sɛnea Agya no adɔ me no na me nso madɔ mo; montena me dɔ no mu.

¹⁰ Sɛ mudi m’ahyɛde so a, mobɛtena me dɔ mu, sɛnea madi m’Agya ahyɛde so na mete ne dɔ mu no.

¹¹ Maka eyinom nyinaa makyerɛ mo, na m’anigye atena mo mu, na mo anigye awie pɛyɛ.

¹² Eyi ne m’ahyɛde, sɛ monnodɔ mo ho sɛnea medɔɔ mo no.

¹³ Obi nni dɔ kɛse a ɛsen eyi: Sɛ obi de ne kra bɛto hɔ ama ne nnamfo.

¹⁴ Sɛ moyɛ nea mehyɛ mo a, na moyɛ me nnamfo.

¹⁵Memfrɛ mo nkoa bio, efisɛ akoa nnim nea ne wura reyɛ; na mafrɛ mo nnamfo, efisɛ nneɛma a mate m’Agya nkyɛn no nyinaa maka makyerɛ mo.

¹⁶Ɛnyɛ mo na moayi me, na me na mayi mo, na mede mo masi hɔ sɛ monkɔ na monkɔsow aba, na mo aba no ntena hɔ, na biribiara a mobɛsrɛ Agya no me din mu no, ɔde ama mo.

¹⁷Eyi na mehyɛ mo, sɛ monnodɔ mo ho.

¹⁸ Sɛ wiase tan mo a, munhu sɛ watan me kan ansa na ɛretan mo.

¹⁹ Sɛ mufi wiase a, anka wiase bɛdɔ n’ankasa ne de; na sɛ mumfi wiase na mayi mo afi wiase yi, eyi nti na wiase tan mo.

²⁰ Monkae asɛm a meka mekyerɛɛ mo sɛ: Akoa nsen ne wura. Sɛ wɔataa me a, wɔbɛtaa mo nso; sɛ wɔadi m’asɛm so a, wobedi mo de so bi.

²¹ Na eyinom nyinaa, me din nti na wɔde bɛyɛ mo, efisɛ wonnim nea ɔsomaa me no.

²²Sɛ mamma mammɛka mankyerɛ wɔn a, anka wonni bɔne; na afei de, wonni wɔn bɔne ho anoyi.

²³ Nea ɔtan me no tan m’Agya no nso.

²⁴ Sɛ manyɛ nnwuma a obiara nyɛe da wɔn mu a, anka wonni bɔne; na afei de, wɔahu, nanso wɔatan me ne m’Agya.

²⁵ Na ɛyɛe na asɛm a wɔakyerɛw no wɔn mmara mu no aba mu sɛ: Wɔtan me kwa.

²⁶ Na Okyigyinafo a mɛsoma no mabrɛ mo afi Agya no nkyɛn, nokware Honhom a ofi Agya no nkyɛn reba no, sɛ onya ba a, ɔno na obedi me ho adanse;

²⁷ na mo nso mubedi adanse, efisɛ moka me ho fi mfiase.