Read Revised Akuapem Twi DC-KYERƐW KRONKRON Yohane 3 Bible Online

Yohane 3 - Revised Akuapem Twi DC-KYERƐW KRONKRON bible

Yohane 3

¹ Na Farisini bi wɔ hɔ a ne din de Nikodemo a ɔyɛ Yudafo panyin bi;

²ɔno na ɔbaa Yesu nkyɛn anadwo, na obesee no sɛ: Rabi, yenim sɛ wufi Nyankopɔn nkyɛn na aba sɛ ɔkyerɛkyerɛfo; na obi ntumi nyɛ nsɛnkyerɛnne a woyɛ yi, gye sɛ Onyankopɔn ka ne ho.

³ Yesu bua see no sɛ: Mereka akyerɛ wo nokwarem pa ara sɛ: Wɔanwo obi foforo a, ɔrentumi nhu Nyankopɔn ahenni no.

⁴Nikodemo see no sɛ: Ɛbɛyɛ dɛn na onipa a wanyin no, wobetumi awo no? Obetumi akɔ ne na yam bio na wɔawo no anaa?

⁵ Yesu buae sɛ: Mereka akyerɛ wo nokwarem pa ara sɛ: Wɔamfi nsu ne honhom mu anwo obi a, ɔrentumi nhyɛn Onyankopɔn ahenni mu.

⁶ Nea wofi honam mu awo no no yɛ ɔhonam; na nea wofi Honhom mu awo no no yɛ honhom.

⁷Mma ɛnnyɛ wo nwonwa sɛ meka mekyerɛɛ wo sɛ: Etwa sɛ wɔwo mo foforo.

⁸Mframa bɔ nea ɛpɛ, na wote ne nka, na wunnim nea efi ba ne nea ɛrekɔ. Saa ara nso na obiara a wɔawo no Honhom mu no te.

⁹Nikodemo bua see no sɛ: Ɛbɛyɛ dɛn na eyinom ayɛ hɔ?

¹⁰Yesu bua see no sɛ: Woyɛ Israel kyerɛkyerɛfo na wunnim eyinom?

¹¹ Mereka akyerɛ wo nokwarem pa ara sɛ: Nea yenim na yɛka, na nea yɛahu na yedi ho adanse; nanso munnye yɛn adanse no.

¹²Sɛ maka mo fam asɛm na munnye nni a, ɛbɛyɛ dɛn na sɛ meka mo ɔsoro nsɛm no a, mubegye adi?

¹³ Na obi mforoo soro, gye nea ofi soro sianee no, Onipa Ba a ɔwɔ ɔsoro no.

¹⁴ Na sɛnea Mose maa ɔwɔ no so sare so no, saa ara na etwa sɛ wɔma Onipa Ba no so,

¹⁵na obiara a ogye no di no anya daa nkwa.

¹⁶ Na sɛnea Onyankopɔn dɔɔ wiase ni, sɛ ɔde ne Ba a ɔwoo no koro no mae, na obiara a ogye no di no anyera, na wanya daa nkwa.

¹⁷ Na Onyankopɔn ansoma Ɔba no wiase sɛ ommebu wiase atɛn, na mmom sɛ wɔmfa no so nnye wiase.

¹⁸ Nea ogye no di no, wommu no atɛn; na nea onnye nni no, wɔabu no atɛn dedaw sɛ wannye Onyankopɔn Ba koro no din no anni.

¹⁹ Na eyi mmom ne atemmu no, sɛ hann no aba wiase, na nnipa dɔ sum sen hann no; efisɛ wɔn nnwuma yɛ bɔne.

²⁰ Na obiara a ɔyɛ bɔne no tan hann no, na ɔmma hann no ho, na wɔanyi no ne nnwuma ho ntɛn.

²¹Na nea ɔyɛ nea ɛyɛ nokware no ba hann no ho sɛ ne nnwuma mmɛda adi, efisɛ ɔyɛɛ no Onyankopɔn mu.

²² Eyinom akyi no, Yesu ne n’asuafo no baa Yudea asase so; na ɔne wɔn tenaa hɔ, na ɔbɔɔ asu.

²³Na Yohane nso rebɔ asu wɔ Ainon a ɛbɛn Salim, efisɛ asuasu pii wɔ hɔ; na wɔbaa hɔ ma wɔbɔɔ wɔn asu.

²⁴ Na wonnya mfaa Yohane ntoo afiase ɛ.

²⁵Ɛnna ahodwira ho akyinnyegye bi sɔree Yohane asuafo ne Yudafo ntam.

²⁶ Na wɔbaa Yohane nkyɛn bɛka kyerɛɛ no sɛ: Rabi, nea ɔbaa wo nkyɛn Yordan agya noho a wudii ne ho adanse no, hwɛ, ɔno nso bɔ asu, na nnipa nyinaa ba ne nkyɛn.

²⁷ Yohane bua kae sɛ: Onipa ntumi nnya biribi, gye sɛ wɔde fi soro ama no ansa.

²⁸ Mo ankasa mudi me adanse sɛ mekae sɛ: Ɛnyɛ mene Kristo no, na wɔsomaa me dii n’anim.

²⁹ Nea ayeforo wɔ no no ne ayeforokunu; na ayeforokunu adamfo a ogyina hɔ na otie no de, ogye na n’ani gye, ayeforokunu no nne nti. Ɛno nti afei na me saa anigye yi awie pɛyɛ.

³⁰Ɔno de, etwa sɛ ɔdɔre, na me de, me so huan.

³¹ Nea ofi soro ba no sen nnipa nyinaa. Nea ofi fam no fi fam, na ofi fam kasa; nea ofi soro ba no sen nnipa nyinaa,

³² na nea wahu na wate no, ɛno ho adanse na odi; na obi nnye n’adanse no.

³³Nea wagye n’adanse no asi gyinae sɛ Onyankopɔn yɛ ɔnokwafo.

³⁴ Na nea Onyankopɔn asoma no no ka Onyankopɔn asɛm; na Onyankopɔn nsusuw Honhom ansa na ɔde ma.

³⁵ Agya no dɔ Ɔba no, na ɔde nneɛma nyinaa ahyɛ ne nsa.

³⁶ Nea ogye Ɔba no di no wɔ daa nkwa; na nea ontie Ɔba no no renhu nkwa, na Onyankopɔn abufuw da no so.