Read Revised Akuapem Twi DC-KYERƐW KRONKRON Asomafo 8 Bible Online

Asomafo 8 - Revised Akuapem Twi DC-KYERƐW KRONKRON bible

Asomafo 8

¹ Na Saulo nso penee ne kum no so. Na da no ara ɔtaa kɛse baa asafo a ɛwɔ Yerusalem no so, na wɔn nyinaa hwete kɔɔ Yudea ne Samaria nsaase so, gye asomafo no nko.

² Nso nnipa nyamesurofo bi siee Stefano, na wosuu no pii.

³ Na Saulo de, ɔhaw asafo no hyɛnhyɛn afi mu kɔtwee mmarima ne mmea ma wɔde wɔn koguu afiase.

⁴Ɛnna wɔn a wɔhwetee no kyinkyin kɔkaa asɛmpa no.

⁵ Na Filipo kɔɔ Samaria kurow bi mu kɔkaa Kristo ho asɛm kyerɛɛ wɔn.

⁶Na nkurɔfo akuwakuw no tee na wohuu nsɛnkyerɛnne a Filipo yɛe no, wɔde koma koro yɛɛ aso maa nsɛm a ɔkae no.

⁷ Na ahonhom fi a ɛwɔ nnipa bebree mu de nne kɛse teɛɛm fii adi, na mmubuafo ne mpakye pii ho sanee.

⁸ Na anigye kɛse baa kurow no mu.

⁹Na ɔbarima bi a ɔde Simon wɔ kurow no mu a kan no oyi nkonyaa, na ɔyɛ ne ho sɛ obi a ɔyɛ kɛse ma Samaria man no ho dwiriw wɔn.

¹⁰Ɔno na wɔn nyinaa, efi nketewa so kosi akɛse so, tie no ka sɛ: Oyi ne Onyankopɔn tumi a wɔfrɛ no Kɛse no.

¹¹Na wotiee no, efisɛ ɔde nkonyaayi no maa wɔn ho dwiriw wɔn akyɛ.

¹² Na wogyee Filipo a ɔka Onyankopɔn ahenni ne Yesu Kristo din ho asɛmpa no dii no, mmarima ne mmea ma wɔbɔɔ wɔn asu.

¹³Na Simon ankasa nso gye dii, na wɔbɔɔ no asu no, ɔde ne ho bataa Filipo ho; na ohuu nsɛnkyerɛnne ne ahoɔdenne akɛse a ɔyɛe no, ne ho dwiriw no.

¹⁴Na asomafo a wɔwɔ Yerusalem no tee sɛ Samariafo agye Onyankopɔn asɛm no, wɔsomaa Petro ne Yohane kɔɔ wɔn nkyɛn.

¹⁵Na wɔbae no, wɔbɔɔ mpae maa wɔn sɛ wonnya Honhom Kronkron;

¹⁶efisɛ na ɔmmaa wɔn mu biara so, na asu nko na wɔabɔ wɔn akɔ Awurade Yesu din mu.

¹⁷Ɛnna wɔde wɔn nsa guu wɔn so, na wonyaa Honhom Kronkron.

¹⁸Na Simon hui sɛ ɛnam asomafo no nsa a wɔde gu obi so no so na wɔde Honhom no ma no, ɔde sika brɛɛ wɔn kae sɛ:

¹⁹Momma me tumi yi bi, na obiara a mede me nsa megu no so no, wanya Honhom Kronkron.

²⁰Na Petro ka kyerɛɛ no sɛ: Wo sika ne wo nyinaa nyera, efisɛ woasusuw sɛ wɔde sika na enya Onyankopɔn akyɛde.

²¹Wunni asɛm yi mu kyɛfa anaa apɛgyade, efisɛ wo koma nteɛ Onyankopɔn anim.

²²Enti sakra w’adwene fi wo bɔne yi ho, na srɛ Onyankopɔn sɛ ebia wɔde wo komam adwene no bɛkyɛ wo.

²³Efisɛ mahu sɛ wowɔ bɔnwoma nwenenwene mu, na amumɔyɛ hama akyekyere wo.

²⁴Na Simon buae sɛ: Monsrɛ Awurade mma me, na nea moaka yi mu biara amma me so.

²⁵Na wɔn de, wodii adanse na wɔkaa Awurade asɛm no no, wɔsan kɔɔ Yerusalem, na wɔkaa asɛmpa no wɔ Samariafo nkuraa bebree ase.

²⁶Na Awurade bɔfo kasa kyerɛɛ Filipo sɛ: Sɔre kɔ anafo fam ɔkwan a esian fi Yerusalem kɔ Gasa no so! Ɛyɛ anwea pradada so kwan.

²⁷Na ɔsɔre kɔe. Na hwɛ, Etiopiani barima bi a ɔyɛ Etiopiafo hemmaa Kandake piani tumfo a wasa no a ɔhwɛ ne sika nyinaa so ni; waba Yerusalem abɛsɔre,

²⁸na ɔresan akɔ, na ɔte ne teaseɛnam mu rekan odiyifo Yesaia nhoma.

²⁹Na Honhom no ka kyerɛɛ Filipo sɛ: Twiw kɔ teaseɛnam yi ho!

³⁰Na Filipo de mmirika kɔɔ ne nkyɛn, na ɔtee sɛ ɔrekan Odiyifo Yesaia nhoma no, obisaa no sɛ: So wote nea wokan yi ase anaa?

³¹Na ose: Ɛbɛyɛ dɛn na metumi, gye sɛ obi kyerɛ me? Na ɔsrɛɛ Filipo sɛ ɔmforo mmɛtena ne nkyɛn.

³² Nso kyerɛw no mu asɛm a ɔrekenkan no ni: Wɔde no kɔe sɛ oguanten a wɔrekokum no, na sɛ oguammaa tɔ ne yifo anim mum no, sɛ nso wammue n’ano ne no.

³³N’ahobrɛase mu wobuu no ntɛnkyew. N’abusua nso hena na obetumi akyerɛ? Efisɛ woyii ne nkwa fii asase so.

³⁴Na opiani no buaa Filipo sɛ: Mesrɛ wo, hena ho asɛm na odiyifo no ka yi? N’ankasa anaa obi ho asɛm?

³⁵Na Filipo buee n’ano, na ogyinaa kyerɛwsɛm no ara so kaa no Yesu ho asɛmpa no kyerɛɛ no.

³⁶Na wɔnam kwan so rekɔ no, wokoduu asu bi ho, na opiani no kae sɛ: Hwɛ, nsu ni; ɛdɛn na esiw me asubɔ ho kwan?

³⁷[Na Filipo se: Sɛ wode wo koma nyinaa gye di a, ɛwɔ ho kwan sa. Na obuae sɛ: Migye midi sɛ Yesu Kristo ne Nyankopɔn ba].

³⁸Na ɔhyɛ maa teaseɛnam no gyinae, na wɔn baanu sian kɔɔ asu no mu, Filipo ne opiani no, na ɔbɔɔ no asu.

³⁹ Na wofi asu no mu reba no, Awurade honhom hwim Filipo, na opiani no anhu no bio; na ɔde anigye kɔɔ ne kwan.

⁴⁰ Na Filipo de, okofii Asoto; na ɔretwam no, ɔkaa asɛmpa no nkurow no nyinaa mu de kosii sɛ oduu Kaesarea.