Read Revised Akuapem Twi DC-KYERƐW KRONKRON Romafo 16 Bible Online

Romafo 16 - Revised Akuapem Twi DC-KYERƐW KRONKRON bible

Romafo 16

¹Na mebɔ yɛn nuabea Foibe a ɔyɛ asafo a ɛwɔ Kenkrea no mu somfo din mede no mehyɛ mo nsa

²sɛ: Munnye no Awurade mu, sɛnea ɛsɛ ahotefo no, na munnyina n’akyi adwuma biara a mo ho behia no mu; efisɛ ɔno nso ayɛ nnipa pii ne m’ankasa boafo.

³ Munkyia Priska ne Akwila, me yɔnko adwumayɛfo Kristo Yesu mu

⁴a wɔpɛe sɛ anka wɔde wɔn ara wɔn nkwa to hɔ ma de si me kra ananmu. Na ɛnyɛ me nko na meda wɔn ase, na mmom asafo a ɛwɔ amanaman nyinaa mu nso.

⁵ Munkyia asafo a ɛwɔ wɔn fi no nso. Munkyia me dɔfo Epaineto a ɔyɛ Kristo mu abakan a ofi Asia no.

⁶Munkyia Maria a ɔhaw ne ho pii maa mo no.

⁷ Munkyia Androniko ne Yunia, m’abusuafo ne me yɔnko apokyerɛfo a wɔwɔ din asomafo no mu na wodii me kan Kristo mu no.

⁸Munkyia m’Awurade mu dɔfo Amplia.

⁹Munkyia yɛn Kristo mu yɔnko dwumayɛfo Urbano ne me dɔfo Staki.

¹⁰Munkyia Apele a wɔahu no ɔnokwafo Kristo mu no. Munkyia wɔn a wofi Aristobulo fifo mu no.

¹¹Munkyia me busuani Herodion. Munkyia wɔn a wofi Narkiso fifo mu a wɔwɔ Awurade mu no.

¹²Munkyia Trifaina ne Trifosa a wɔbɔ Awurade mu mmɔden no. Munkyia ɔdɔfo Persi a ɔbɔɔ Awurade mu mmɔden pii no.

¹³ Munkyia Rufo a wɔayi no Awurade mu, ne ne na a ɔyɛ me nso me na no.

¹⁴Munkyia Asinkrito, Flegon, Herme, Patroba, Herma ne anuanom a wɔka wɔn ho.

¹⁵Munkyia Filologo ne Yulia, Nereo ne ne nuabea ne Olimpa ne ahotefo a wɔne wɔn wɔ hɔ nyinaa.

¹⁶ Momfa mfewano kronkron nkyiakyia mo ho. Kristo asafo nyinaa kyiakyia mo.

¹⁷ Nanso, anuanom, mitu mo fo sɛ monkari wɔn a wɔde mpaepaemu ba na wɔto hintidua de sɛe nkyerɛkyerɛ a moasua no, na montwe mo ho mfi wɔn ho.

¹⁸ Na wɔn a wɔte saa no nsom yɛn Awurade Yesu Kristo, na mmom wɔsom wɔn ankasa yafunu, na wɔde tɛkrɛmadɛ ne adɔkɔdɔkɔsɛm daadaa wɔn a wonnim bɔne no koma.

¹⁹ Na mo de, mo asoɔmmerɛw no atrɛw adu nnipa nyinaa asom; enti m’ani gye mo ho, nanso mepɛ sɛ moyɛ papa ho anyansafo, na moyɛ kronn wɔ bɔne ho,

²⁰ na asomdwoe Nyankopɔn no bɛpɛtɛw Satan mo nan ase ntɛm. Yɛn Awurade Yesu Kristo adom nka mo.

²¹ Me yɔnko dwumayɛfo Timoteo ne m’abusuafo Lukio ne Yasɔn ne Sosipatro kyia mo.

²²Me Tertio a mekyerɛw nhoma yi, mikyia mo Awurade mu.

²³ Gaio a ɔyɛ me ne asafo no nyinaa fiwura kyia mo. Erasto a ɔyɛ kurom ha sikakorafo ne onua Kwarto kyia mo.

²⁴[Yɛn Awurade Yesu Kristo adom nka mo nyinaa. Amen].

²⁵ Nea otumi sɛ ɔhyɛ mo den, sɛnea m’asɛmpa ne Yesu Kristo ho asɛnka te, sɛnea ahintasɛm a kan teteete no wɔanka,

²⁶ na afei wɔayi no adi, na wɔnam adiyifo kyerɛw nsɛm no so ayi no adi akyerɛ amanaman mufo, sɛnea daa Nyankopɔn hyɛ no te, ama osetie a ɛde kɔ gyidi mu,

²⁷ Onyankopɔn a ɔyɛ onyansafo koro no, anuonyam mfa Yesu Kristo so nka no daa daa! Amen.