Read Revised Akuapem Twi DC-KYERƐW KRONKRON Galatifo 1 Bible Online

Galatifo 1 - Revised Akuapem Twi DC-KYERƐW KRONKRON bible

Galatifo 1

¹ Paulo a emfi nnipa, nso ɛnnam onipa bi so, na mmom ɛnam Yesu Kristo ne Agya Nyankopɔn a onyan no fii awufo mu no so na ɔyɛ ɔsomafo

²ne anuanom a wɔka me ho nyinaa de kɔma Galatia asafo horow:

³ Adom ne asomdwoe a efi yɛn Agya Onyankopɔn ne Awurade Yesu Kristo nka mo.

⁴ Ɔno na yɛn bɔne nti ɔde ne ho mae, na wayi yɛn afi wiase bɔne yi mu, sɛnea yɛn Agya Onyankopɔn pɛ no te.

⁵Ɔno na anuonyam nka no mmeresanten mfesanten. Amen.

⁶Ɛyɛ me nwonwa sɛ moatwe mo ho ntɛm sɛɛ afi nea wafrɛ mo Kristo adom mu no ho kɔ asɛmpa foforo

⁷ a nso ɛnyɛ asɛmpa foforo biara, na mmom nnipa bi wɔ hɔ a wɔhaw mo na wɔpɛ sɛ wɔsesa Kristo asɛmpa no.

⁸ Na sɛ mpo yɛn anaa abɔfo bi fi soro ba bɛka asɛmpa foforo bi kyerɛ mo, ka nea moagye no ho a, onnue!

⁹Sɛnea yɛkae kan no, saa ara na afei mereka bio, sɛ obi ba bɛka asɛmpa foforo bi kyerɛ mo ka nea moagye no ho a, onnue!

¹⁰ Na afei anim pa na merehwehwɛ afi nnipa hɔ anaasɛ Onyankopɔn hɔ? Anaasɛ merehwehwɛ sɛ mesɔ nnipa ani anaa? Sɛ meda so mesɔ nnipa ani a, ɛnne na menyɛ Kristo akoa.

¹¹Na, anuanom, merema moahu sɛ, asɛmpa a mekae no nte sɛ nnipa ade;

¹²efisɛ ɛnyɛ nnipa nkyɛn na migyee no, nso wɔamfa ankyerɛkyerɛ me, na mmom Yesu Kristo na ɔdaa no adi kyerɛɛ me.

¹³ Na moate abrabɔ a kan no na mebɔ no wɔ Yudafo som mu, sɛnea metaataa Onyankopɔn asafo maa no boroo so, na mesɛee wɔn,

¹⁴na menyaa nkɔso Yudafo som mu mesen m’atipɛnfo pii m’abusua mu, na mebɔɔ m’agyanom atetesɛm ho mmɔden bebree ma ɛtraa so.

¹⁵ Na ɛsɔɔ nea oyii me fii me na yam, na ɔnam n'adom so afrɛ me no ani

¹⁶ sɛ ɔbɛda ne Ba adi me mu no, sɛ menka ne ho asɛmpa menkyerɛ amanaman no, ntɛm ara me ne honam ne mogya antu agyina,

¹⁷nanso mankɔ Yerusalem wɔn a wodii m'anim yɛɛ asomafo no nkyɛn, na mmom mekɔɔ Arabia, na mesan mebaa Damasko bio.

¹⁸ Ɛnna mfirihyia abiɛsa akyi no, mekɔɔ Yerusalem sɛ merekɔhwɛ Kefa anim, na midii ne nkyɛn nna dunum;

¹⁹ na asomafo a ɛkeka ho no de, manhu wɔn mu biara, gye Awurade nua Yakobo.

²⁰Na nea merekyerɛw mo yi, hwɛ, Onyankopɔn anim, merenni atoro.

²¹ Ɛno akyi no, mebaa Siria ne Kilikia fam.

²²Na Yudea asafo a wɔwɔ Kristo mu no nnim m’anim;

²³na ɔte nko na na wɔate sɛ, nea anka kan ɔtaa yɛn no, afei de, ɔka gyidi a kan ɔsɛee no no ho asɛmpa.

²⁴Na me nti wɔhyɛɛ Onyankopɔn anuonyam.