Read Revised Akuapem Twi DC-KYERƐW KRONKRON Filipifo 3 Bible Online

Filipifo 3 - Revised Akuapem Twi DC-KYERƐW KRONKRON bible

Filipifo 3

¹ Afei nea edi akyi, me nuanom, momma mo ani nnye Awurade mu. Sɛ mekyerɛw mo ade koro no ara a, ɛnyɛ ade a ɛhaw me, na mmom, ɛma mutim.

² Monhwɛ yiye akraman no ho, monhwɛ yiye adwumayɛfo bɔne no ho, monhwɛ yiye wɔ twetiatwafo no ho!

³ Na yɛn twetiatwa no, yɛn na yɛsom Nyankopɔn honhom mu, na yɛhoahoa yɛn ho Kristo Yesu mu, na yɛmfa yɛn ho nto honam so.

⁴ Ɛwom sɛ anka me nso mewɔ ɔhonam mu biribi a mede me ho mɛto so. Sɛ ɔfoforo bi susuw sɛ ɔwɔ ɔhonam mu biribi a ɔde ne ho bɛto so a, me mmom na mewɔ bi.

⁵ Hwɛ, wotwaa me twetia da a ɛto so awotwe, mifi Israel asefo mu, Benyamin abusuakuw mu, meyɛ Hebrifo mu Hebrini, mmara fam, meyɛ Farisini,

⁶mmɔdemmɔ fam, metaa asafo no, mmara mu trenee fam, wɔannya me ho asɛm.

⁷ Nanso nneɛma a anka ɛyɛ me mfaso no, Kristo nti mibuu no adehwere.

⁸Nanso ampa ara meda so mibu nneɛma nyinaa adehwere, m’Awurade Kristo Yesu ho nimdeɛ a ɛboro so no nti. Ne nti na mebuu nneɛma nyinaa adehwerede, na mibu no sɛ sumina so ade, na Kristo ayɛ me mfaso,

⁹ na wɔahu me ne mu sɛ minni me ara me trenee a efi mmara mu, na mmom nea ɛnam Kristo ho gyidi so ba, trenee a efi Nyankopɔn mu, a ɛnam gyidi so.

¹⁰ Na anka mahu no yiye, ne ne wusɔre tumi no, na manya kyɛfa wɔ n’amanehunu no mu, na wɔama masɛ ne wu no,

¹¹sɛ ebia mɛto awufo mu sɔre no.

¹² Ɛnyɛ sɛ me nsa anya aka, anaasɛ manya mawie pɛyɛ dedaw, na mmom mepem kɔ m’anim ara na me nsa aka, sɛnea Kristo Yesu nso nsa aka me no.

¹³Anuanom, me de, minsusuw sɛ me nsa anya aka biribi; nanso ade biako pɛ na meyɛ: Mema me werɛ fi nea atwam no, na metwe me mu mepɛ nea ɛwɔ anim no.

¹⁴ Mepem kɔ m'anim sɛ medu botae no ho, na makonya ɔsoro frɛ a Onyankopɔn nam Kristo Yesu mu afrɛ me no mu nkonimbo no.

¹⁵ Enti momma yɛn mu dodow a yɛyɛ pɛ no nnwen sa; na sɛ biribi wɔ hɔ a mudwen no foforo a, ɛno nso Onyankopɔn beyi adi akyerɛ mo.

¹⁶ Nanso nea yɛanya dedaw no, momma yɛnkɔ so saa ara nkura mu.

¹⁷ Anuanom, munsua me, na monhwɛ wɔn a wɔnam saa, sɛnea mowɔ yɛn sɛ nhwɛso no.

¹⁸ Na nnipa bebree wɔ hɔ a metaa ka wɔn nnantew ho asɛm kyerɛ mo, na seisei nso mede nusu mereka bio sɛ: Wɔyɛ Kristo asɛnnua no atamfo;

¹⁹ wɔn na wɔn awiei ne ɔsɛe, wɔn nyame ne yafunu, na wɔn anuonyam wɔ wɔn aniwu mu, na asase so nneɛma ho na wodwen.

²⁰ Na yɛn de, yɛn man a yefi mu ankasa ne ɔsoro. Efi hɔnom nso na yɛtwɛn Agyenkwa a ɔno ne Awurade Yesu Kristo

²¹ a ɔbɛsakra yɛn ahobrɛase nipadua sɛnea n'ahoɔden adwuma a ɔde betumi abrɛ nneɛma nyinaa ase ahyɛ n'ase no te.