Read Revised Akuapem Twi DC-KYERƐW KRONKRON Kolosefo 4 Bible Online

Kolosefo 4 - Revised Akuapem Twi DC-KYERƐW KRONKRON bible

Kolosefo 4

¹ Awuranom, momfa nea ɛteɛ, na ɛyɛ pɛ mma nkoa, efisɛ munim sɛ mo nso mowɔ owura ɔsoro.

² Munkura mpaebɔ mu ara, na momfa aseda nwɛn wɔ mu.

³ Na mommɔ mpae mma yɛn nso bi, na Onyankopɔn nhiɛ asɛm no pon mma yɛn, na yɛaka Kristo ahintasɛm a enti meda afiase yi,

⁴na mayi no adi, sɛnea ɛsɛ me sɛ mekasa.

⁵ Monnantew nyansam wɔ ananafo mu, na monnsɛe mo bere kwa.

⁶ Momma mo kasa ho mmra nyam daa a nkyene wɔ mu, na moahu sɛnea ɛsɛ sɛ mubua obiara.

⁷Tikiko, onua dɔfo a ɔyɛ ɔsomfo nokwafo ne m'awurakwaa Awurade mu no bɛba abɛka mo me ho nsɛm nyinaa.

⁸ Eyi ara nti na masoma no mo nkyɛn, na moate yɛn ho asɛm, na wakyekye mo werɛ,

⁹ na mede Onesimo, onua nokwafo dɔfo a ofi mo mu no, mekaa ne ho; wɔn na wɔbɛma moate ɛha nsɛm nyinaa.

¹⁰ Aristarko, me yɔnko dommum, ne Barnaba wɔfase Marko a munyaa ne ho nkra no, (sɛ ɔba mo nkyɛn a, munnye no fɛw so).

¹¹Na afei, Yesu a wɔfrɛ no Yusto, wɔn a wofi twetiatwa mu no, kyia mo. Eyinom nko ne me yɔnko adwumayɛfo Onyankopɔn ahenni no fam, na wɔayɛ me awerɛkyekye.

¹² Kristo Yesu akoa Epafra a ofi mo mu no kyia mo. Daa odi ma mo dennennen wɔ mpaebɔ mu, sɛ munnyina hɔ pɛpɛɛpɛ, na moayɛ ma Onyankopɔn apɛde nyinaa mu.

¹³Na midi no adanse sɛ ɔbɔ mmɔden pii ma mo ne wɔn a wɔwɔ Laodikea ne wɔn a wɔwɔ Hierapoli.

¹⁴ Luka, oduruyɛfo dɔfo no, ne Dema kyia mo.

¹⁵Munkyia anuanom a wɔwɔ Laodikea ne Nimfa ne asafo a ɛwɔ ne fi no.

¹⁶Na sɛ wɔkenkan nhoma yi mo nkyɛn wie a, momma wɔnkɔkenkan Laodikeafo asafo no mu bi, na mo nso monkenkan nea efi Laodikea no.

¹⁷ Na monka nkyerɛ Arkipo sɛ: Hwɛ ɔsom a woanya no Awurade mu no so na woawie no pɛpɛɛpɛ.

¹⁸ Me nkyia a me Paulo mede me nsa mekyerɛwee ni. Monkae me mpokyerɛ no. Adom nka mo nyinaa.