Read Revised Akuapem Twi DC-KYERƐW KRONKRON Yosua 12 Bible Online

Yosua 12 - Revised Akuapem Twi DC-KYERƐW KRONKRON bible

Yosua 12

¹Na eyinom ne asase no so ahene a Israelfo no kunkum wɔn na wodii wɔn asase so wɔ Yordan agya owiapuei hɔ, fi Arnon subon ho de kosi Hermon bepɔw ho ne Araba a ɛwɔ apuei no nyinaa so:

² Amorifo hene Sihon a ɔtenaa Hesbon a odii hene fi Aroer a ɛda Arnon subon kɔn so ne subon no mfinimfini ne Gilead fa de kosi Yabok subon a ɛne Amonfo hye no ano,

³ne Araba so de kosi Kinerot po no ano apuei fam, na ɛde kosi Araba so po no a ɛne Nkyene-Po no ano, apuei Bet-yesimot kwan so, ne nifa fam Pisga bepɔw ase no;

⁴ ne Basan hene Og a ofi abran akɛse a aka no mu a ɔtenaa Astarot ne Edrei no asase no.

⁵Na odii hene Hermon bepɔw so ne Salka ne Basan nyinaa de kosi Gesurfo ne Maakatfo hye so, ne Gilead fa, Hesbonhene Sihon hye ho.

⁶ AWURADE akoa Mose ne Israelfo no kaa wɔn gui, na AWURADE akoa Mose de asase no maa Rubenfo ne Gadfo ne Manase abusuakuw fa no ma wodii so.

⁷Na eyinom ne asase no so ahene a Yosua ne Israelfo kunkum wɔn Yordan agya atɔe fam, fi Baal-gad a ɛda Lebanon bon no mu de kosi bepɔw a ɛso petee a ɛforo de kɔ Seir no ho; na Yosua de asase no maa Israel mmusuakuw sɛ wonni so, sɛ wɔn nkyekyem no te,

⁸ mmepɔw no so ne po ho asasetaw so ne Araba so ne mmepɔw no ase ne sare no so ne nifa no: Hetifo, Amorifo ne Kanaanfo, Perisifo, Hewifo ne Yebusifo asase no.

⁹ Yeriko hene, Ai a ɛwɔ Betel ho hene,

¹⁰ Yerusalem hene, Hebron hene,

¹¹ Yarmut hene, Lakis hene,

¹² Eglon hene, Gesar hene,

¹³ Debir hene, Geder hene,

¹⁴ Horma hene, Arad hene,

¹⁵ Libna hene, Adulam hene,

¹⁶ Makeda hene, Betel hene,

¹⁷Tapua hene, Hefer hene,

¹⁸ Afek hene, Saron hene,

¹⁹ Madon hene, Hasor hene,

²⁰ Simron-meron hene, Aksaf hene,

²¹Taanak hene, Megido hene,

²²Kedes hene, Yokneam a ɛwɔ Karmel ase no hene,

²³ Dor a ɛwɔ Dor koko so hene, amanaman a ɛwɔ Gilgal no hene,

²⁴Tirsa hene, ahene no nyinaa ano si aduasa biako.