Read Revised Akuapem Twi DC-KYERƐW KRONKRON Yosua 15 Bible Online

Yosua 15 - Revised Akuapem Twi DC-KYERƐW KRONKRON bible

Yosua 15

¹ Na Yudafo abusuakuw ntonto, sɛ wɔn mmusua te no, ɛtɔɔ Edom hye ho koduu Sin sare so, wɔ nifa fam asase a ɛyɛ nifa hye no awiei so.

²Na wɔn nifa fam hye no fi Nkyene-Po no awiei no ho, dɔnnɔn a ebu fa nifa fam no ano.

³Na ɛnam Akrabim aforoee nifa fam sen kɔ Sin, na ɛforo kɔ nifa fam wɔ Kades-barnea, na etwam kɔ Hesron, na ɛforo kɔ Adar, na ɛpono kɔ Karka.

⁴Na etwam kɔ Asmon, na ekopue Misraim subon no ano, na ɛkɔpem mpoano. Eyi nyɛ mo nifa fam hye.

⁵Na apuei hye ne Nkyene-Po no de besi Yordan awiei. Na benkum fam hye no fi Nkyene-Po ho dɔnnɔn a ɛwɔ Yordan awiei no ho.

⁶ Na ɔhye no foro kosi Bet-hogla, na ɛsen fa Bet-araba benkum fam, na ɔhye no foro kosi Ruben ba Bohan bo no ho;

⁷ na ɔhye no fi Akor bon no mu foro kɔ Debir, na ɛdan kɔ benkum fam kyerɛ Gilgal a ɛda Adumim aforoee a ɛwɔ subon no nifa fam ntentenso no. Na ɔhye no twam fa En-semes nsu no ano, na ɛkɔpem En-rogel.

⁸ Na ɔhye no foro fa Hinom ba bon no mu, Yebusifo nkyɛn mu nifa fam, ɛne Yerusalem; na ɔhye no foro kɔ bepɔw a ɛwɔ Hinom bon no ntentenso wɔ atɔe wɔ Refaim bon no benkum fam awiei no atifi.

⁹ Na ɔhye no hima fi bepɔw no atifi kɔ Neftoa asuti no ho, na efi hɔ kɔ Efron bepɔw so nkurow ho, na ɔhye no hima kɔ Baala a ɛne Kiriat-yearim.

¹⁰Na ɔhye no kɔntɔn fi Baala kɔ atɔe, Seir bepɔw ho, na ɛsen kɔ Har-yearim, ɛne Kesalon, nkyɛn mu wɔ benkum fam; na esian kɔ Bet-semes, na ɛsen kɔ Timna;

¹¹na ɔhye no fi kɔ Ekron nkyɛn mu benkum fam, na ɛkɔntɔn kɔ Sikron, na etwam kɔ Baala bepɔw no so, na efi kɔ Yabneel, na ɔhye no kɔpem po no ano.

¹²Na atɔe hye no ne Po Kɛse no ne ɛho hye. Eyinom ne Yuda hye a atwa ahyia, sɛ wɔn mmusua te.

¹³ Na Yefune ba Kaleb de, ɔmaa no kyɛfa, Yudafo mu, sɛnea AWURADE hyɛɛ Yosua no: Anak n’agya Arba kurow a ɛne Hebron.

¹⁴ Na Kaleb tuu Anak mma baasa no fii hɔ, Sesai ne Ahiman ne Talmai, Anak asefo.

¹⁵Na ofi hɔ foro kɔɔ Debirfo ho; nso kan no na Debir din ne Kiriat-sefer.

¹⁶Na Kaleb kae sɛ: Nea ɔbɛbɔ Kiriat-sefer na ɔbɛfa no, mede me babea Aksa mɛma no aware.

¹⁷Ɛnna Kaleb ne nua Kenas ba Otniel kɔfae, na ɔde ne babea Aksa maa no aware.

¹⁸Na ɔbea no kɔɔ Otniel nkyɛn no, Otniel ka kyerɛɛ Aksa sɛ ommisa n’agya [Kaleb] hɔ asase bi; na ɔbea no fi n’afurum so sii fam; na Kaleb bisaa no sɛ: Ɛdɛn na wohwehwɛ?

¹⁹Na ɔka kyerɛɛ no sɛ: Ma me akyɛde bi ɛ, na nifa asase na wode ama me nti, ma me mmasu nso. Na ɔmaa no atifi mmasu ne anafo mmasu.

²⁰Eyi ne Yuda mma abusuakuw no agyapade, sɛ wɔn mmusua te.

²¹Na Yudafo abusuakuw no nkurow a ɛdeda nifa fam pɛɛ de rekɔ Edom hye so ne: Kabseel ne Eder ne Yagur,

²²ne Kina ne Dimona ne Adada,

²³ne Kedes ne Hasor ne Itnan,

²⁴Sif ne Telem ne Bealot,

²⁵ne Hasor-hadata ne Keriot, Hesron, ɛne Hasor,

²⁶Amam ne Sema ne Molada,

²⁷ne Hasar-gada ne Hesmon ne Bet-pelet,

²⁸ne Hasar-sual ne Beer-seba ne ɛho nkuraa,

²⁹Baala ne Iyim ne Esem,

³⁰ne Eltolad ne Kesil ne Horma,

³¹ne Siklag ne Madmana ne Sansana,

³²ne Lebaot ne Silhim ne Ain ne Rimon: Ne nyinaa si nkurow aduonu akron ne ɛho nkuraa.

³³ Po ho tataw no so de ne: Estaol ne Sora ne Asna,

³⁴Sanoa ne En-ganim, Tapua ne Enam,

³⁵Yarmut ne Adulam, Soko ne Aseka,

³⁶Saaraim ne Aditaim ne Gedera ne Gederotaim: Nkurow dunan ne ɛho nkuraa.

³⁷Senan ne Hadasa ne Migdal-gad,

³⁸ne Dilean ne Mispe ne Yokteel,

³⁹Lakis ne Boskat ne Eglon,

⁴⁰ne Kabon ne Lahmas ne Kitlis,

⁴¹ne Gederot, Bet-dagon ne Naama ne Makeda: Nkurow dunsia ne ɛho nkuraa.

⁴²Libna ne Eter ne Asan,

⁴³ne Yifta ne Asna ne Nesib,

⁴⁴ ne Keila ne Aksib ne Maresa: Nkurow akron ne ɛho nkuraa.

⁴⁵ Ekron ne ɛho nkurow ne nkuraa,

⁴⁶efi Ekron de kosi po fam nea ɛwɔ Asdod nkyɛn mu nyinaa ne ɛho nkuraa.

⁴⁷ Asdod, ɛho nkurow ne nkuraa, Gasa, ɛho nkurow ne nkuraa de kosi Misraim subon no ano, ne Po Kɛse ne ɛho hye.

⁴⁸Na mmepɔw so de ne: Samir ne Yatir ne Soko,

⁴⁹ne Dana ne Kiriat-sana a ɛne Debir,

⁵⁰ne Anab ne Estemo ne Anim,

⁵¹ne Gosen ne Holon ne Gilo: Nkurow dubiako ne ɛho nkuraa.

⁵²Arab ne Duma ne Esan,

⁵³ne Yanum ne Bet-apua ne Afeka,

⁵⁴ne Humta ne Kiriat-arba a ɛne Hebron, ne Sior: Nkurow akron ne ɛho nkuraa.

⁵⁵Maon, Karmel ne Sif ne Yuta,

⁵⁶ne Yesreel ne Yokdeam ne Sanoa,

⁵⁷Kain, Gibea ne Timna: Nkurow du ne ɛho nkuraa.

⁵⁸Halhul, Bet-sur ne Gedor,

⁵⁹ne Maarat ne Bet-anot ne Eltekon: Nkurow asia ne ɛho nkuraa.

⁶⁰ Kiriat-baal a ɛne Kiriat-yearim ne Raba: Nkurow abien ne ɛho nkuraa.

⁶¹Num so de ne: Bet-araba, Midin ne Sekaka,

⁶²ne Nibsan ne Ir-hamela ne En-gedi: Nkurow asia ne ɛho nkuraa.

⁶³ Na Yebusifo a wɔte Yerusalem no de, Yudafo no antumi antu wɔn, na Yebusifo no ne Yudafo no tenaa Yerusalem de abesi nnɛ.