Read Revised Akuapem Twi DC-KYERƐW KRONKRON Yosua 18 Bible Online

Yosua 18 - Revised Akuapem Twi DC-KYERƐW KRONKRON bible

Yosua 18

¹ Na Israelfo asafo no nyinaa behyiae Silo, na wosii ahyiae ntamadan no wɔ hɔ, na wɔbrɛɛ asase no ase wɔn anim.

²Na aka Israelfo mu mmusuakuw ason a wɔnkyɛɛ agyapade mmaa wɔn.

³Na Yosua ka kyerɛɛ Israelfo sɛ: Da bɛn na mobɛtwentwɛn mo nan ase akosi ansa na moakɔ akɔfa asase a AWURADE mo agyanom Nyankopɔn de ama mo no?

⁴Muntu abusuakuw biara mu nnipa baasa, na mensoma wɔn mma wɔnsɔre nkokyin asase no so, na wɔnkyerɛw ho asɛm, sɛ ɛbɛyɛ na ɛbɛyɛ wɔn agyapade, na wɔmmra me nkyɛn.

⁵Na monkyekyɛ mu nkyekyem ason. Yuda nnyina ne hye so nifa fam, na Yosef fi nnyina wɔn hye so benkum fam.

⁶Na monkyerɛw asase no nkyekyem ason no ho asɛm, na momfa mmrɛ me ha, na mentwe ntonto memma mo, AWURADE yɛn Nyankopɔn anim ha.

⁷ Na Lewifo de wɔrenya mo mu kyɛfa bi, efisɛ AWURADE asɔfodi no ne wɔn agyapade; na Gad ne Ruben ne Manase abusuakuw fa no anya wɔn agyapade, Yordan agya apuei a AWURADE akoa Mose de maa wɔn no.

⁸Ɛnna mmarima no sɔre kɔe; na Yosua hyɛɛ wɔn a wɔrekɔ akɔkyerɛw asase no ho asɛm no sɛ: Monkɔ nkokyin asase no so na monkyerɛw ho asɛm, na monsan mmra me nkyɛn, na mentwe ntonto memma mo, AWURADE anim ha wɔ Silo.

⁹Na mmarima no siim kɔe kɔfaa asase no so, na wɔkyerɛw no sɛnea nkurow no tetee nkyekyem ason de hyɛɛ nhoma bi so, na wɔsan baa Yosua nkyɛn Silo nsra mu.

¹⁰Na Yosua twee ntonto maa wɔn, AWURADE anim wɔ Silo, na Yosua kyɛɛ asase no mu wɔ hɔ maa Israelfo sɛ wɔn nkyekyem te.

¹¹Na Benyaminfo abusuakuw ntonto bae sɛ wɔn mmusua te; na wɔn ntonto no hye fi Yuda mma ne Yosef mma ntam.

¹² Na wɔn benkum fam hye fi Yordan; na ɔhye no foro fa Yeriko nkyɛn mu benkum fam, na ɛforo kɔ bepɔw no so kɔ atɔe, na ano kodu Bet-awen sare so.

¹³ Na ɔhye no fi hɔ sen fa nifa fam kɔ Lus, wɔ Lus a ɛne Betel nkyɛn mu, na ɔhye no sian kɔ Atarot-adar, bepɔw a ɛda anafo Bet-horon nifa fam no so.

¹⁴ Na ɔhye no hima na ɛkɔntɔn kɔ atɔe fam fa bepɔw a ɛda Bet-horon anim nifa fam no, na ano kodu Kiriat-baal a ɛne Kiriat-yearim, Yudafo kurow bi. Atɔe fam de ne no.

¹⁵Na nifa fam de fi Kiriat-yearim kurotia, na ɔhye no fi kɔ atɔe, na efi kɔ Neftoa asuti ho.

¹⁶Na ɔhye no sian kɔ bepɔw a ɛda Hinom ba bon anim a ɛwɔ Refaim bon mu benkum fam no ano noho, na esian Hinom bon no kɔ Yebusifo nifa fam nkyɛn mu, na esian kɔ En-rogel ho.

¹⁷Na ehima kɔ benkum fam, na efi kɔ En-semes, na efi kɔ Gelilot a ɛda Adumim aforoee no ntentenso, na esian kɔ Ruben ba Bohan bo no ho.

¹⁸Na etwam fa benkum fam nkyɛn mu Araba ntentenso, na esian kɔ Araba.

¹⁹Na ɔhye no twam kɔ Bet-hogla benkum fam nkyɛn mu, na ano kodu Nkyene-Po benkum fam dɔnnɔn no ho, Yordan nifa fam awiei. Eyi ne nifa fam hye.

²⁰Na Yordan ne n’apuei fam hye. Eyi ne Benyaminfo agyapade sɛ n’ahye te hyia sɛ wɔn mmusua te.

²¹Na Benyaminfo abusuakuw, sɛ wɔn mmusua te no, nkurow ni: Yeriko, Bet-hogla ne Emek-kesis,

²²Bet-araba, Semaraim ne Betel,

²³Awim, Para ne Ofra,

²⁴Kefar-amonai, Ofni ne Geba: Nkurow dumien ne ɛho nkuraa.

²⁵Gibeon, Rama ne Beerot,

²⁶Mispe, Kefira ne Mosa,

²⁷ne Rekem ne Yirpeel ne Tarala,

²⁸ ne Sela, Haelef ne Yebus a ɛne Yerusalem, Gibeat, Kiriat: Nkurow dunan ne ɛho nkuraa. Eyi ne Benyaminfo no agyapade sɛ wɔn mmusua te.