Read Revised Akuapem Twi DC-KYERƐW KRONKRON Yosua 5 Bible Online

Yosua 5 - Revised Akuapem Twi DC-KYERƐW KRONKRON bible

Yosua 5

¹ Na Amorifo ahene a wɔwɔ Yordan agya atɔe fam no nyinaa ne Kanaan ahene a wɔwɔ po ano no nyinaa tee sɛ AWURADE ayow Yordan nsu Israelfo no anim akosi sɛ wotwae no, wɔn koma tui a ɔhome bi nni wɔn mu bio Israelfo no anim.

² Ɛbere no ara mu na AWURADE ka kyerɛɛ Yosua sɛ: Yɛ twɛrebo asekan, na san twitwa Israelfo no twetia a ɛto so abien.

³Na Yosua yɛɛ twɛrebo asekan de twitwaa Israelfo no twetia Aralot koko so.

⁴Na nea enti a Yosua twitwaa wɔn twetia ne sɛ: Ɔman no a wofi Misraim bae no mu mmarima nyinaa, akofofo no nyinaa wuwui ɔkwan mu wɔ sare no so, bere a wofi Misraim reba no.

⁵Na ɔman a wofi Misraim bae no nyinaa, wɔatwitwa wɔn twetia, nanso ɔman no a wɔwoo wɔn ɔkwan mu wɔ sare no so, bere a wofi Misraim reba no nyinaa de, na wontwitwaa wɔn twetia ɛ.

⁶ Na mfirihyia aduanan na Israelfo no nantew sare so kosii sɛ akofo a wofi Misraim bae no nyinaa sae korakora, efisɛ wɔantie AWURADE nne ma AWURADE kaa wɔn ntam sɛ wɔrenhu asase a AWURADE kaa wɔn agyanom ntam sɛ ɔde bɛma yɛn no, asase a ɛsen nufusu ne ɛwo no.

⁷Na wɔn mma na ɔma wɔsɔre sii wɔn ananmu; wɔn na Yosua twitwaa wɔn twetia, na wɔyɛ momonoto, efisɛ wɔantwitwa wɔn twetia ɔkwan no mu.

⁸Na wowiee ɔman mu no nyinaa twetiatwa no, wɔtenaa wɔn tenabea hɔ nsra no mu kosii sɛ wɔn ho tɔɔ wɔn.

⁹Na AWURADE ka kyerɛɛ Yosua sɛ: Ɛnnɛ mapirew Misraim nsopa afi mo so. Ɛno nti wɔfrɛɛ hɔ sɛ: Gilgal[1] de besi nnɛ yi ara.

¹⁰ Na Israelfo no bɔɔ nsra Gilgal, na wodii Twam no, ɔsram no da a ɛto so dunan no anwummere, Yeriko tataw so.

¹¹Na Twam no adekyee no, da no ara na wodii asase no so aduan, apiti ne nkyewe, da a wodii asase no so aduan no, adekyee no ara, na mana no to twae.

¹² Na Israelfo no annya bi bio, afei wodii Kanaan asase no so nnɔbae afe no ara mu.

¹³ Na Yosua wɔ Yeriko ho no, ɔmaa n’ani so hwɛe, na hwɛ, ɔbarima bi gyina ne ntentenso kura nkrante a watwe. Na Yosua kɔɔ ne nkyɛn kɔka kyerɛɛ no sɛ: Yɛn afa na wowɔ anaa yɛn atamfo afa?

¹⁴ Na ose: Daabi, na afei na maba sɛ AWURADE dɔm so safohene. Na Yosua de n’anim butuw fam sɔree no, na obisaa no sɛ: Ɛdɛn na me wura reka akyerɛ n’akoa?

¹⁵ Na AWURADE dɔm so safohene no ka kyerɛɛ Yosua sɛ: Yi wo mpaboa fi wo nan, na nea wugyina hɔ yɛ kronkron. Na Yosua yɛɛ saa.