Read Revised Akuapem Twi DC-KYERƐW KRONKRON Yosua 8 Bible Online

Yosua 8 - Revised Akuapem Twi DC-KYERƐW KRONKRON bible

Yosua 8

¹Na AWURADE ka kyerɛɛ Yosua sɛ: Nsuro, na mma wo bo nntu. Fa akofo dɔm no nyinaa ka wo ho, na sɔre foro kɔ Ai. Hwɛ, mede Ai hene ne ne man ne ne kurow ne n’asase mahyɛ wo nsa.

² Na yɛ Ai ne ne hene sɛnea woyɛɛ Yeriko ne ne hene no; emu asade ne mmoa nko na momfom mfa. Fa atɛwfo ma wɔnkɔtɛw kurow no akyi mma wo.

³Na Yosua sɔree, ɔno ne akofo dɔm no nyinaa, sɛ wɔreforo akɔ Ai. Na Yosua yiyii mmarima akofo ɔpeduasa, na ogyaa wɔn kwan anadwo.

⁴Na ɔhyɛɛ wɔn sɛ: Monhwɛ, monkɔtɛw kurow no, kurow no akyi noho; mommma mo ne kurow no ntam nnware bebree, na mo nyinaa nnyina ahoboa mu.

⁵Na me de, me ne nnipa a wɔka me ho no nyinaa betwiw abɛn kurow no; na sɛ wofi adi behyia yɛn sɛ kan no a, yebeguan afi wɔn anim;

⁶ na wobefi adi adi yɛn akyi akosi sɛ yɛbɛtwe wɔn afi kurow no ho; na wɔbɛka sɛ: Wɔreguan afi yɛn anim sɛ kan no; enti yebeguan afi wɔn anim.

⁷Na mo de, monsɔre mfi ɔtɛw no mu, na momfa kurow no, na AWURADE mo Nyankopɔn de bɛhyɛ mo nsa.

⁸Na sɛ munya fa kurow no a, monto kurow no mu gya; monyɛ no sɛnea AWURADE ahyɛ no; monhwɛ, ɔhyɛ na mahyɛ mo no.

⁹Ɛnna Yosua gyaa wɔn kwan, na wosiim kɔtɛwee; na wɔtenaa Betel ne Ai ntam, Ai atɔe fam; na Yosua daa ɔman no mu anadwo no.

¹⁰Na Yosua sɔree anɔpahema siesiee ɔman no, na ɔno ne Israel mpanyimfo foro dii ɔman no anim kɔɔ Ai.

¹¹Na akofo dɔm a wɔka ne ho nyinaa foro kɔe, na wotwiw bɛnee, na woduu kurow no ntentenso, na wɔbɔɔ nsra Ai benkum fam, na obon wɔ wɔn ne Ai ntam.

¹²Na ɔde nnipa bɛyɛ sɛ mpemnum kɔtetɛw Betel ne Ai ntam, kurow no atɔe fam.

¹³Na wɔde dɔm no sisii, ɛdɔm a wɔwɔ kurow no benkum fam ne akyiri tɛwfo no a ɛwɔ kurow no atɔe fam no nyinaa; na Yosua kɔɔ obon no mu anadwo no ara;

¹⁴na Ai hene hui no, ɔne ne man nyinaa ne kurow no mu mmarima no, yɛɛ ntɛm tuaa ahema kɔɔ nea wɔahyɛ hɔ, tataw no anim, sɛ wɔrebehyia Israel ne wɔn ako; nso na onnim sɛ wɔtɛw no kurow no akyi.

¹⁵Na Yosua ne Israel nyinaa ma wɔpam wɔn wɔn anim, na woguan faa sare so kwan so.

¹⁶Ɛnna wɔteɛɛm frɛɛ ɔman a wɔwɔ kurow no mu nyinaa sɛ wommetiw wɔn; na wotiw Yosua, na wɔtwee wɔn fii kurow no ho.

¹⁷Na ɔbarima biara anka Ai ne Betel a wamfi adi ankodi Israel akyi; na wogyaw kurow no maa ano daa hɔ kodii Israel akyi.

¹⁸Ɛnna AWURADE ka kyerɛɛ Yosua sɛ: Teɛ peaw a ɛwɔ wo nsam no kyerɛ Ai, na mede mɛhyɛ wo nsa. Na Yosua teɛɛ ne peaw a ɛwɔ ne nsam no kyerɛɛ kurow no.

¹⁹Ɛnna atɛwfo no sɔree ntɛm fii wɔn afa hɔ, na ɔteɛɛ ne nsa no, wotutuu mmirika kɔhyɛn kurow no mu na wɔfae, na wɔyɛɛ ntɛm de ogya too kurow no mu.

²⁰Na Ai mmarima no dannan wɔn ani hwɛɛ wɔn akyi no, na hwɛ, kurow no mu wusiw retu kɔ ɔsoro, na wonnya ɔkwan nguan nkɔ ha anaa ha. Na nnipa a woguan kɔɔ sare so no dannan wɔn ho behyiaa atiwfo no.

²¹Na Yosua ne Israel nyinaa hui sɛ atɛwfo no afa kurow no, na kurow no mu wusiw retu kɔ ɔsoro no, wɔsan wɔn akyi bekunkum Ai mmarima no.

²²Na eyinom nso fii adi fii kurow no mu behyiaa wɔn, na wɔtɔɔ Israel ntam, eyinom wɔ ha, na eyinom nso wɔ ha; na wokunkum wɔn ara kosii sɛ wɔn mu nnikanfo anaa oguanfo biara anka.

²³Na Ai hene no, wɔkyeree no animono, na wɔde no brɛɛ Yosua.

²⁴Na Israel wiee Aifo nyinaa kum wɔ sare so petee mu, faako a wotiw wɔn no, na wɔn nyinaa totɔe nkrante ano kosii sɛ wɔsae no, Israel nyinaa san kɔɔ Ai, de nkrante kokunkum wɔn.

²⁵Na nnipa a wɔtotɔe da no nyinaa, mmarima ne mmea, si mpem dumien, Aifo nyinaa.

²⁶ Na Yosua antwe ne nsa a ɔde teɛɛ ne peaw no de kosii sɛ wɔsɛee Aifo nyinaa pasaa.

²⁷Kurow no mu mmoa ne asade nko na Israel fom fae, sɛ AWURADE asɛm a ɔde hyɛɛ Yosua no te no.

²⁸Na Yosua hyew Ai na ɔyɛɛ no daa amamfo siw de besi nnɛ.

²⁹ Na Ai hene no de, ɔsɛn no dua so kosii anwummere; na owia kɔtɔe no, Yosua hyɛe sɛ wonkoyi ne funu no mfi dua no so, na wɔde no too kurow no pon ano, na wɔhɔree no so abosiw kɛse a ɛwɔ hɔ de besi nnɛ.

³⁰ Ɛnna Yosua kosii afɔremuka maa AWURADE, Israel Nyankopɔn, Ebal bepɔw so,

³¹sɛnea AWURADE akoa Mose hyɛɛ Israelfo no, sɛnea wɔakyerɛw Mose mmara nhoma no mu no, afɔremuka a wɔde abo amuamu a obi mmaa dade so wɔ so pɛn asi; na wɔbɔɔ so ɔhyew afɔre maa AWURADE, na wokunkum asomdwoe afɔre.

³²Na abo no so hɔ na ɔkyerɛw Mose mmara ntimu a ɔkyerɛwee Israelfo anim no.

³³ Na Israel nyinaa ne wɔn mpanyimfo ne ahwɛfo ne wɔn atemmufo gyinaa adaka no ho ha ne ha, asɔfo, Lewifo a wɔso AWURADE apam adaka no anim, ɔhɔho ne ɔman ba nyinaa; wɔn fa wɔ Gerisim bepɔw ntentenso, na ɔfa nso wɔ Ebal bepɔw ntentenso, sɛnea AWURADE akoa Mose hyɛe sɛ wonhyira ɔman Israel kan no.

³⁴Na ɛno akyi no, ɔkenkan mmara mu nsɛm no nyinaa, nhyira no ne nnome no, sɛnea wɔakyerɛw nhoma no mu nyinaa.

³⁵Nea Mose hyɛɛ no nyinaa mu asɛm biara nni hɔ a, Yosua ankenkan Israel guabɔ nyinaa, ne mmea, mmofra ne ɔhɔho a, ɔnam wɔn mu no anim.