Read Revised Akuapem Twi DC-KYERƐW KRONKRON 2 Tesalonikafo 3 Bible Online

2 Tesalonikafo 3 - Revised Akuapem Twi DC-KYERƐW KRONKRON bible

2 Tesalonikafo 3

¹ Nea edi akyiri no, anuanom, mommɔ mpae mma yɛn, na Awurade asɛm nnya kwan nkɔ so, na wɔnhyɛ no anuonyam, sɛnea ɛte mo hɔ nso.

²Na wonyi yɛn mfi nnipa ammumɔyɛfo ne abɔnefo nsam, efisɛ ɛnyɛ nnipa nyinaa na wɔwɔ gyidi.

³ Ɔnokwafo ne Awurade a ɔbɛhyɛ mo den na wahwɛ mo so ɔbɔnefo no ho no.

⁴ Na yɛn ani da mo so Awurade mu, sɛ moyɛ na mobɛyɛ nea yɛhyɛ mo.

⁵Na Awurade mma monhu Onyankopɔn dɔ ne Kristo boasetɔ no mu.

⁶ Na anuanom, yɛhyɛ mo, Awurade Yesu Kristo din mu, sɛ montwe mo ho mfi onua biara a ɔnam basabasa na onni atetesɛm a onyae yɛn nkyɛn no so no ho.

⁷ Na mo ankasa munim sɛ ɛsɛ sɛ musua yɛn, efisɛ yɛanyɛ yɛn ho basabasa wɔ mo mu,

⁸ nanso yɛanni obiara aduan kwa, na mmom yɛyɛɛ adwuma, mmɔdemmɔ ne ɔbrɛ mu, anadwo ne awia, na yɛanyɛ adesoa amma mo mu biara,

⁹ ɛnyɛ sɛ yenni ho kwan, na mmom yɛyɛe sɛ yɛde yɛn ho reyɛ nhwɛso ama mo na moasua yɛn.

¹⁰ Na yɛwɔ mo nkyɛn no nso, yɛhyɛɛ mo sɛ, sɛ obi mpɛ sɛ ɔyɛ adwuma a, mma ɔno nso nnnidi.

¹¹Na yɛte sɛ ebinom wɔ hɔ a wɔnenam basabasa wɔ mo mu, na wɔnnyɛ adwuma, na mmom wɔyɛ tɛretɛre.

¹² Na wɔn a wɔte saa no, yɛhyɛ wɔn tu wɔn fo, yɛn Awurade Yesu Kristo mu, sɛ wɔnyɛ adwuma komm mfa mpɛ wɔn anoduan.

¹³ Na mo de, anuanom, mommmrɛ papayɛ mu.

¹⁴ Na sɛ obi antie yɛn asɛm a ɛwɔ nhoma yi mu a, monhyɛ no nsow, mo ne no mmmɔ fekuw, na n’ani nwu;

¹⁵nanso mummmu no sɛ ɔtamfo, na mmom monkasa nkyerɛ no sɛ onua.

¹⁶Na ɔno asomdwoe Awurade no ara mma mo asomdwoe daa, ade nyinaa mu. Awurade ne mo nyinaa ntena.

¹⁷ Me Paulo nkyia a mede m’ankasa me nsa mekyerɛwee. Eyi di adanse wɔ me nhoma nyinaa mu, sɛ ɔkwan a mefa so kyerɛw ni.

¹⁸Yɛn Awurade Yesu Kristo adom nka mo nyinaa.