Read Revised Akuapem Twi DC-KYERƐW KRONKRON 1 Timoteo 5 Bible Online

1 Timoteo 5 - Revised Akuapem Twi DC-KYERƐW KRONKRON bible

1 Timoteo 5

¹ Mpoopoo w’ani nkyerɛ ɔpanyin, na mmom tu no fo sɛ agya, mmerante sɛ anuanom,

²mmea mpanyin sɛ ɛnanom, mmabaa sɛ nuammeanom, wɔ ahotew nyinaa mu.

³ Di mmea akunafo a wɔyɛ akunafo ampa no ni.

⁴Na sɛ okunafo bi wɔ mma anaa mmanana a, wonsua onyamesom pa wɔn fi mu kan, ntua wɔn awofo ka; efisɛ eyi na eye na ɛsɔ Onyankopɔn ani.

⁵ Na nea ɔyɛ okunafo ampa, na aka ne nko no, ɔde n’ani to Nyankopɔn so, na okura nkotɔsrɛ ne mpaebɔ mu anadwo ne awia.

⁶Na nea ɔbɔ ahohwi no de, ɔyɛ teaseawu.

⁷Eyinom ho na hyɛ, na wɔannya wɔn ho asɛm bi anka.

⁸Na sɛ obi nhwɛ n’ankasa ne nnipa ne, ne titiriw no, ne fifo a, wapa gyidi, na ɔyɛ onipa bɔne sen nea onnye nni.

⁹Wɔmmfa okunafo a onnya nnii mfirihyia aduosia nhyɛ mu, na mmom wɔmfa nea waware kunu biako,

¹⁰ nea wodi no ne ne nnwuma pa ho adanse: Wayɛn mma, sɛ wayɛ hɔhoyɛ, sɛ wahohoro ahotewfo anan ho, sɛ waboa wɔn a wɔn ho hia wɔn, sɛ wadi adwuma pa nyinaa akyi.

¹¹Na akunafo a wonnyinii de, mfa wɔn; na sɛ Kristo ho fono wɔn a, na wɔpɛ sɛ wɔware,

¹²na wonya afobu sɛ wɔapa kan gyidi no.

¹³Na emu ara nso na wɔyɛ anihaw sua afi mu kyinkyin, na ɛnyɛ anihaw nko na wɔyɛ, na wɔyɛ kurokuro ne tɛretɛre nso keka nsɛm a ɛnsɛ.

¹⁴ Enti mepɛ sɛ wɔn a wonnyinii ɛ no ware wo mma di ofi so, na wɔamma ɔtamfo ho kwan sɛ ɔnyaw;

¹⁵efisɛ ebinom aman akodi Satan akyi dedaw.

¹⁶Sɛ ɔbea gyidini bi wɔ akunafo a, ɔnhwɛ wɔn, na ɔmmma ɛnnyɛ asafo no adesoa, na asafo no nhwɛ wɔn a wɔyɛ akunafo ampa no.

¹⁷ Mpanyimfo a wɔhwɛ asafo no so yiye no, wɔmfa nidi mmɔho nni wɔn, ne titiriw no wɔn a wɔyɛ asɛnka ne nkyerɛkyerɛ ho adwuma.

¹⁸ Na kyerɛw no se: Nantwi a ɔporow aburow no, ma no nni bi, ne: Odwumayɛni akatua sɛ no.

¹⁹ Ntie asafo mu panyin ho nkurobɔ, gyee adansefo baanu anaa baasa anom.

²⁰ Wɔn a wɔyɛ bɔne no, yi wɔn ntɛn wɔn nyinaa anim, na wɔn a aka no nso asuro.

²¹Mehyɛ wo Onyankopɔn ne Awurade Kristo Yesu ne abɔfo a wɔapaw wɔn no anim, sɛ hwɛ eyinom yiye, na woampere ho ammu atɛn, nso woanyɛ biribiara nyiyimu so.

²² Mfa wo nsa ngu obi so ntɛm, nanso mfa wo ho mfra ebinom bɔne mu. Fa wo ho si hɔ kronn.

²³Nnom nsu nko bio, na wo yafunu ne wo mmerɛw a wotaa yɛ no nti, nom bobesa kakraa bi!

²⁴Nnipa binom bɔne da adi de wɔn rekɔ atemmu mu, na ebinom de nso di wɔn akyi.

²⁵Saa ara na nnwuma pa nso da adi pefee, na sɛ annyɛ saa mpo a entumi nhintaw.