Read Revised Akuapem Twi DC-KYERƐW KRONKRON 2 Timoteo 3 Bible Online

2 Timoteo 3 - Revised Akuapem Twi DC-KYERƐW KRONKRON bible

2 Timoteo 3

¹ Na hu eyi sɛ, nna a edi akyiri mu no, mmere a emu yɛ den bɛba.

²Efisɛ nnipa bɛyɛ ahopɛfo, sikapɛfo, ahohoahoafo, ahantanfo, abususɛnkafo, awofo asɛm ho asoɔdenfo, bonniayɛfo, wɔn a biribiara ho ntew mma wɔn,

³wɔn a wonni tema, apamsɛefo, nsekufo, wɔn a wɔnhyɛ wɔn akɔnnɔ so, wɔn a wɔyɛ keka, wɔn a wɔmpɛ papa,

⁴ afatwafo, akakabenfo, wɔn a wɔhoman, wɔn a wɔdɔ anigyede sen Nyankopɔn,

⁵ wɔkekare wɔn anim kyerɛ onyamesom pa, nanso wɔpa emu ahoɔden. Saa nnipa yi, dan wo ho fi wɔn ho!

⁶ Na eyinom mu bi ne wɔn a wɔnam ase hyɛnhyɛn afi mu, na wɔfa mmeawa a bɔne adɔre ahyɛ wɔn so a akɔnnɔ horow keka wɔn

⁷a wosua daa, nanso wontumi nhu nokware no da no nnommum.

⁸ Na sɛnea Yane ne Yambre ne Mose dii asi no, saa ara na eyinom nso ne nokware no di asi. Wɔyɛ nnipa a wɔn adwene asɛe; wɔmfra wɔ gyidi fam.

⁹Nso wɔrenkɔ wɔn anim pii biara, na wɔn gyimi bɛda adi nnipa nyinaa anim, sɛ wɔn de no nso yɛe no.

¹⁰Na wo de, woadi me nkyerɛkyerɛ, me bra, me tirimmɔ, me gyidi, m’abodwokyɛre, me dɔ, me boasetɔ,

¹¹ me taa a wɔanya me ntaae, m’amanehunu a ɛbaa me so Antiokia, Ikonium ne Listra no akyi. Saa ɔtaa yi na migyinaa mu, na Awurade gyee me fii ne nyinaa mu.

¹² Na wɔn a wɔpɛ sɛ wɔde onyamesom pa tena ase Kristo Yesu mu nyinaa, wɔbɛtaa wɔn.

¹³ Na nnipa bɔne asisifo bɛkɔ wɔn anim wɔ bɔne mu, wɔdaadaa na wɔadaadaa wɔn nso.

¹⁴ Na wo de, tena nea woasua na woahu mu nokware no mu. Wunim onii ko a wusuae ne nkyɛn no,

¹⁵ na wufi wo mmofraase nim nkyerɛwee kronkron no a ebetumi ama woahu nyansa afa Kristo Yesu mu gyidi so akɔ nkwagye mu.

¹⁶ Kyerɛw nyinaa fi Nyankopɔn home mu, na eye ma nkyerɛkyerɛ, ntɛnyi, nteɛso ne trenee mu ntetewee.

¹⁷ Na Onyankopɔn nipa ayɛ pɛ a wɔasiesie no koraa ama nnwuma pa nyinaa.