Read Revised Akuapem Twi DC-KYERƐW KRONKRON Filemon 1 Bible Online

Filemon 1 - Revised Akuapem Twi DC-KYERƐW KRONKRON bible

Filemon 1

¹ Paulo, Kristo Yesu deduani, ne onua Timoteo de kɔma Filemon, yɛn dɔfo ne yɛn yɔnko dwumayɛni,

² ne onuabea Apia, ne Arkipo, yɛn yɔnko sraani, ne asafo a ɛwɔ wo fi:

³Adom ne asomdwoe a efi yɛn Agya Onyankopɔn ne Awurade Yesu Kristo nka mo.

⁴Da biara a mekae wo wɔ mpaebɔ mu no, meda me Nyankopɔn ase,

⁵efisɛ mete wo dɔ a wowɔ ma ahotefo nyinaa ne wo gyidi a wowɔ no Awurade Yesu mu no nka.

⁶Na mebɔ mpae sɛ nnepa a ɛnam Kristo so wɔ wo mu ho nimdeɛ bɛma wo gyidi adɔe nnwuma no ada adi kɛse.

⁷Me nua, mewɔ wo dɔ ho anigye ne awerɛkyekye bebree, sɛ woama ahotefo no akoma atɔ wɔn yam.

⁸Ɛno nti, ɛwom sɛ anka mewɔ akokoduru kɛse wɔ Kristo mu sɛ mehyɛ wo sɛ yɛ ade a ɛfata yi,

⁹nanso ɔdɔ nti mesrɛ wo mmom, me, akora Paulo a seisei meyɛ Kristo Yesu deduani nso.

¹⁰ Mesrɛ wo mema me ba a mewoo no wɔ nkyehama mu, Onesimo

¹¹(a kan no, ne ho nni mfaso mma wo, na afei oye ma wo ne me).

¹²Ɔno ara na masoma no wo nkyɛn bio; onipa a ɔte sɛ me ara m'akoma.

¹³Anka mepɛe sɛ mesan no ma ɔtena me nkyɛn, na wasi w’ananmu asom me, wɔ asɛmpa nkyehama no mu,

¹⁴nanso mampɛ sɛ mifi w’akyi meyɛ biribiara, na wo yiyeyɛ anyɛ sɛ efi ɔhyɛ mu, na mmom afi ɔpɛ mu.

¹⁵Na ebia eyi nti na ɔne wo tetew mu kakra, sɛ wubenya no daa,

¹⁶ɛnyɛ sɛ akoa bio, na mmom nea ɔsen akoa, sɛ onua dɔfo a oye ma me titiriw, na menne sɛ wo, ɔhonam ne Awurade fam.

¹⁷Enti sɛ wubu me sɛ ɔyɔnko de a, gye no sɛ me ara.

¹⁸Na sɛ wayɛ wo bɔne bi, sɛ nso ɔde wo ka bi a, bu brɛ me.

¹⁹Me Paulo na mede m’ankasa nsa mekyerɛw sɛ: Metua ka biara a ɔde wo, anka mempɛ sɛ, mekae wo mpo sɛ wo ara ankasa wode me ka.

²⁰Yiw, onua, ma minnya wo ho biribi a eye, Awurade mu, na me koma ntɔ me yam wɔ Kristo mu.

²¹Mewɔ awerɛhyɛm wɔ wo setie ho nti na mekyerɛw wo nhoma yi, na minim sɛ wobɛyɛ asen nea maka yi mpo.

²²Nanso siesie ahɔhotenabea ma me, na m’ani da so sɛ ɛnam mo mpaebɔ so, wɔde me bɛsan abrɛ mo.

²³ Epafra, me yɔnko deduani wɔ Kristo Yesu mu,

²⁴ Marko, Aristarko, Dema ne Luka, me yɔnkonom adwumayɛfo, kyiakyia wo.

²⁵Awurade Yesu Kristo adom nka mo honhom.