Read Revised Akuapem Twi DC-KYERƐW KRONKRON Hebrifo 5 Bible Online

Hebrifo 5 - Revised Akuapem Twi DC-KYERƐW KRONKRON bible

Hebrifo 5

¹Na ɔsɔfo panyin biara, woyi no fi nnipa mu hyɛ no sɔfo ma nnipa, Onyankopɔn fam nneɛma ho, na bɔne nti ɔde ayɛyɛde ne afɔre ama,

² sɛ obi a obetumi ahu ama wɔn a wonnim na wɔfom so no, esiane sɛ mmerɛwyɛ atwa ɔno nso ho ahyia.

³ Na ɛno nti, ɛsɛ sɛ ɔbɔ bɔne ho afɔre ma ne ho, sɛnea ɔbɔ ma ɔman no.

⁴ Na obi mfa saa nidi no mma ne ho, gye sɛ nea Onyankopɔn afrɛ no te sɛ Aaron no.

⁵ Saa ara nso na Kristo anhyɛ ne ho anuonyam sɛ ɔbɛyɛ ɔsɔfo panyin, na mmom nea ɔka kyerɛɛ no sɛ: Me ba ne wo, me na mawo wo nnɛ!

⁶ Sɛnea ɔkae baabi nso sɛ: Woyɛ daa sɔfo panyin, Melkisedek akwan so.

⁷ Ɔno na ne honam nna no mu ɔde mpaebɔ ne nkotɔsrɛ brɛɛ nea obetumi agye no afi owu mu wɔ nteɛm a emu yɛ den ne nusu mu, na ahobrɛase suro nti wotiee no.

⁸ Ɔyɛ ɔba de, nanso osuaa amane a ohui no mu osetie,

⁹ na onya dii mu no, ɔyɛɛ wɔn a wotie no nyinaa daa nkwagye farebae,

¹⁰a Onyankopɔn bɔ ne din frɛ no sɔfo panyin Melkisedek kwan so.

¹¹Ɛno ho na yɛwɔ asɛm a ɛdɔɔso a asekyerɛ yɛ den, nanso ka mo aso asisiw.

¹² Na ɛbere a anka ɛsɛ sɛ moyɛ akyerɛkyerɛfo no, ehia mo bio sɛ wɔkyerɛkyerɛ mo Onyankopɔn nsɛm mu mfitiasesɛm, na moayɛ wɔn a ehia wɔn nufusu, na ɛnyɛ aduan a ɛyɛ den.

¹³ Na obiara a onum nufu no nhuu trenee asɛm no mu, na ɔyɛ akokoaa.

¹⁴ Na aduan a ɛyɛ den no fata wɔn a wɔanyin [1] a ɛnam daa daa adeyɛ nti wɔn adwene tumi hu papa ne bɔne mu.