Read Revised Akuapem Twi DC-KYERƐW KRONKRON Atemmufo 3 Bible Online

Atemmufo 3 - Revised Akuapem Twi DC-KYERƐW KRONKRON bible

Atemmufo 3

¹ Na eyinom ne amanaman a AWURADE gyaw wɔn sɛ ɔde bɛsɔ Israel a wɔanhu Kanaan ko no biara no nyinaa ahwɛ,

²sɛnea ɛbɛyɛ na Israel awo ntoatoaso no behu akodi na wɔakyerɛ wɔn a kan no wonnim no:

³ Filistifo ahemfo baanum no, ne Kanaanfo ne Sidonfo ne Hewifo a wɔte Lebanon bepɔw so de fi Baal-hermon bepɔw ho kosi Hamat ahyɛnee no nyinaa.

⁴Na wɔtenaa hɔ na wɔde wɔn asɔ Israel ahwɛ de ahu sɛ wobetie AWURADE mmara nsɛm a ɔnam Mose so hyɛɛ wɔn agyanom no anaa.

⁵Na Israelfo no tenaa Kanaanfo, Hetifo ne Amorifo ne Perisifo ne Hewifo ne Yebusifo no mu.

⁶ Na wɔfofaa wɔn mmabea warewaree na wɔde wɔn mmabea momaa wɔn mma aware, na wɔsonsom wɔn anyame.

⁷Na Israelfo yɛɛ nea ɛyɛ AWURADE ani so bɔne, na wɔn werɛ fii AWURADE wɔn Nyankopɔn, na wɔkɔsom Baalim ne Asera nnua.

⁸Ɛnna AWURADE abufuw dɛw hyɛɛ Israel, na ɔtɔn wɔn hyɛɛ Mesopotamia hene Kusan-risataim nsa, na Israelfo som Kusan-risataim mfirihyia awotwe.

⁹ Na Israelfo su frɛɛ AWURADE, na AWURADE maa ogyefo bi so maa Israelfo ma ogyee wɔn: Otniel, Kaleb nua kumaa Kenas ba.

¹⁰ Na AWURADE honhom baa no so, na odii Israel anim, na ofii adi tuu sa, na AWURADE de Mesopotamia hene Kusan-risataim, hyɛɛ ne nsa, na odii no so nkonim

¹¹Na asase no so dwoe mfirihyia aduanan. Na Kenas ba Otniel wui.

¹²Na Israelfo kɔɔ so yɛɛ nea ɛyɛ AWURADE ani so bɔne; na AWURADE hyɛɛ Moab hene Eglon den tiaa Israel, efisɛ wɔyɛɛ nea ɛyɛ AWURADE ani so bɔne.

¹³ Na ɔboaboaa Amon ne Amalekfo ano kaa ne ho, na ɔbae bedii Israel so nkonim na wɔbɛfaa nkyeresia kurow no.

¹⁴Na Israelfo som Moab hene Eglon mfe dunwɔtwe.

¹⁵Ɛnna Israelfo su frɛɛ AWURADE, na AWURADE maa ogyefo bi so maa wɔn, Gera ba Ehud, Benyaminni a ɔyɛ abenkumma no. Na Israelfo de ayɛyɛde nam no so kɔmaa Moab hene Eglon.

¹⁶Na Ehud yɛɛ sekan anofanu a ne tenten yɛ nsaama, na ɔde bɔɔ n’akotade ase, ne dwonku nifa so.

¹⁷Na ɔde ayɛyɛde no kɔmaa Moab hene Eglon; nso Eglon yɛ onipa bran pa ara.

¹⁸Na ɔde ayɛyɛde no maa no wiei no, ogyaa nkurɔfo a wɔsoso ayɛyɛde no kwan ma wɔkɔe;

¹⁹na ɔno ara de, ɔdan ne ho fii ahoni a ɛwɔ Gilgal no ho bɛkae sɛ: Ɔhene, mewɔ ahintasɛm bi meka mekyerɛ wo. Na ose: Monyɛ komm. Na wɔn a wogyina ne ho nyinaa fii ne nkyɛn fii adi.

²⁰Na Ehud baa ne nkyɛn, nso ne nko ara na ɔte n’abansoro dan a ogye mframa wɔ mu no mu. Na Ehud kae sɛ: Mewɔ Onyankopɔn asɛm bi meka mekyerɛ wo. Na ɔsɔre fii n’agua so.

²¹Ɛnna Ehud teɛɛ ne nsa benkum soo sekan a ɛwɔ ne dwonku nifa so no mu de wɔɔ n’afuru mu,

²²na sekan dua no nso dii dade no akyi hyɛn mu, na srade sram dade no so. Na wantwe sekan no amfi ne yafunu no mu, na epue fii akyiri.

²³Na Ehud fii adi kɔɔ abrannaa so, na ɔtotoo abansoro dan no apon mu wɔ n’akyi, na ɔtoo apratwom no mu.

²⁴Na ofii adi no, ne nkoa no ba bɛhwɛe, na hwɛ, wɔatoto abansoro dan apratwom no mu. Na wose: Ebia okogya ne nan mframadan pia mu.

²⁵Na wɔtwɛnee ara de kosii sɛ wɔn ani bui, na hwɛ, obiara anhiɛ abansoro dan no pon no. Ɛnna wɔfaa safe de hiɛe, na hwɛ, wɔn wura da fam, awu.

²⁶Na wɔretwentwɛn wɔn nan ase no, Ehud guanee, na obetwaa ahoni no ho, na oguan baa Seira.

²⁷Na odui no, ɔhyɛn torobɛnto Efraim bepɔw so, na Israel mma ne no sian fii bepɔw no so, na odii wɔn anim;

²⁸na ɔka kyerɛɛ wɔn sɛ: Muntu mmirika nni m’akyi, efisɛ AWURADE de mo atamfo Moabfo no ahyɛ mo nsa. Na wosian dii n’akyi, na wɔkɔfaa Yordan atwaree a wɔde kɔ Moab no, na wɔamma obiara antwa.

²⁹Na saa bere no wokunkum Moab mmarima bɛyɛ ɔpedu, mmarima akatakyi ahoɔdenfo ara nko, na wɔamma obiara amfi mu.

³⁰Na wɔbrɛɛ Moab ase da no ara, Israel nsa ase. Na asase no so dwoe mfirihyia aduɔwɔtwe.

³¹Na Ehud wu akyi no, Anat ba Samgar na ɔde nantwika poma kum Filistifo mu nnipa ahansia; na ɔno nso, gyee Israel.