Read Revised Akuapem Twi DC-KYERƐW KRONKRON Adiyisɛm 8 Bible Online

Adiyisɛm 8 - Revised Akuapem Twi DC-KYERƐW KRONKRON bible

Adiyisɛm 8

¹ Na ɔtew nsɔano a ɛto so ason no ano no, ɔsoro yɛɛ dinn bɛyɛ sɛ dɔnhwerew fa.

² Na mihuu abɔfo baasɔn a wogyinagyina Onyankopɔn anim no, na wɔmomaa wɔn ntorobɛnto asɔn.

³ Na ɔbɔfo foforo ba begyinaa afɔremuka no ho, okura sika huam kuruwa, na wɔmaa no nnuhuam pii, sɛ ɔmfa nka ahotefo nyinaa mpaebɔ ho, sika afɔremuka a esi ahengua no anim no so.

⁴ Na nnuhuam no wusiw kaa ahotefo mpaebɔ ho fi ɔbɔfo no nsam foro kɔɔ Onyankopɔn anim.

⁵ Na ɔbɔfo no faa ohuam kuruwa no de afɔremuka no so gya bi hyɛɛ mu ma, na ɔtow guu asase so. Na aprannaa ne nne horow ne anyinam ne asasewosow bae.

⁶Na abɔfo baasɔn a wokurakura ntorobɛnto ason no siesiee wɔn ho sɛ wɔrebɛhyɛn.

⁷ Na nea odi kan no hyɛnee. Na amparuwbo ne ogya a ɛne mogya adi afra bae, na wɔtow guu asase so. Na asase nkyɛm abiɛsa mu biako hyewee, na nnua nkyɛm abiɛsa mu biako nso hyewee, na nwura momono nyinaa nso hyewee.

⁸ Na ɔbɔfo a ɔto so abien no hyɛnee. Na wɔtow ade bi a ɛte sɛ bepɔw kɛse a ogya rehyew no kyenee po mu, na ɛpo nkyɛm abiɛsa mu biako dan mogya,

⁹na abɔde a ɛwɔ nkwa wɔ po mu no mu nkyɛm abiɛsa mu biako wuwui, na ahyɛn nkyɛm abiɛsa mu biako nso sɛee.

¹⁰ Na ɔbɔfo a ɔto so abiɛsa no hyɛnee. Na nsoromma kɛse bi a ɛredɛw sɛ ogyatɛn fi soro hwee fam, na ɛbɛhwee nsubɔnten nkyɛm abiɛsa mu biako ne nsu aniwa so.

¹¹Na nsoromma no din de Awɔnwene, na nsu no nkyɛm abiɛsa mu biako yɛɛ nwene, na nnipa pii wuwui, nsu no nwene a ayɛ no nti.

¹² Na ɔbɔfo a ɔto so anan no hyɛnee ne torobɛnto. Na wɔbɔɔ owia nkyɛm abiɛsa mu biako ne ɔsram nkyɛm abiɛsa mu biako ne nsoromma nkyɛm abiɛsa mu biako, na nkyɛm a ɛto so abiɛsa no duduruu sum, na adekyee mu nkyɛm abiɛsa mu biako anhyerɛn, na anadwo nso saa ara.

¹³ Na mihui, na metee sɛ ɔkɔre biako a otu faa ɔsoro mfinimfini no de nne kɛse teɛɛm sɛ: Wɔn a wɔte asase so no nnue, wonnue, wonnue, torobɛnto a aka a abɔfo baasa no rebɛhyɛn no nne no nti!