Read Revised Akuapem Twi DC-KYERƐW KRONKRON 1 Samuel 24 Bible Online

1 Samuel 24 - Revised Akuapem Twi DC-KYERƐW KRONKRON bible

1 Samuel 24

¹Na Saul san fii Filistifo akyi bae no, wɔka kyerɛɛ no sɛ: Hwɛ, Dawid wɔ En-gedi sare so.

²Ɛnna Saul faa mmarima mpensa a wɔapaw wɔn afi Israel nyinaa mu, na ɔkɔe sɛ ɔkɔhwehwɛ Dawid ne ne nnipa no Nkakragya Abotan so.

³ Na oduu nguannan a ɛwɔ ɔkwan no so no ho; na ɔbodan bi wɔ hɔ, na Saul hyɛn mu sɛ okogyaa n’anan; na Dawid ne ne nnipa nso tete ɔbodan no mu nohoa

⁴Na Dawid nnipa no ka kyerɛɛ no sɛ: Hwɛ, da a AWURADE ka kyerɛɛ wo sɛ: Hwɛ, mede wo tamfo mɛhyɛ wo nsa, na woayɛ no sɛnea eye w’ani so no ni. Ɛnna Dawid sɔre wiawiaa ne ho kotwaa Saul batakari ano.

⁵Na ɛno akyi no, Dawid koma bɔɔ no paa sɛ watwa Saul atade ano.

⁶ Na ɔka kyerɛɛ ne nnipa no sɛ: AWURADE mma ɛmpare me sɛ mɛyɛ me wura a AWURADE asra no no ade a ɛte sɛɛ, sɛ mɛteɛ me nsa maka no, efisɛ nea AWURADE asra no ne no.

⁷Na Dawid de nsɛm yi bɔɔ ne nnipa no pem, na wampene amma wɔansɔre anhyɛ Saul. Na Saul sɔre fii ɔbodan no mu sii ne kwan so.

⁸Na ɛno akyi no, Dawid nso sɔre fii ɔbodan no mu fii adi, na ɔbɔn Saul sɛ: Me wura ɔhene! Na Saul hwɛɛ n’akyi no, Dawid bɔɔ ne ti ase na ɔkotowee.

⁹Na Dawid ka kyerɛɛ Saul sɛ: Ɛdɛn nti na wutie nnipa nsɛm a wɔkeka sɛ: Hwɛ, Dawid pɛ wo bɔne, no?

¹⁰Hwɛ, ɛnnɛ da yi w’aniwa ahu sɛnea AWURADE de wo hyɛɛ me nsa nnɛ ɔbodan no mu; na wɔkae sɛ minkum wo, nanso mekyɛee wo so, na mise: Merenteɛ me nsa menka me wura, efisɛ nea AWURADE asra no ne no.

¹¹Nso, m’agya, ampa ara, hwɛ sɛ mikura wo batakari ano. Na sɛ matwa wo batakari ano na mankum wo yi, hu na hwɛ sɛ bɔne anaa mmarato bi nni me nsam; na menyɛɛ wo bɔne bi ɛ, nso wo de, worepɛ me akum me.

¹² AWURADE mmu me ne wo ntam atɛn, na AWURADE nnye m’aweretɔde wo nsam. Na me nsa de, ɛrenka wo.

¹³Sɛnea tete bɛ no ka no: Abɔnefo so na bɔne fi; na me nsa de, ɛrenka wo.

¹⁴Ɛhena akyi na Israel hene atu di yi? Hena na woretiw no yi? Ɔkraman funu akyi, ɔkraman dwiw biako akyi.

¹⁵Na AWURADE nyɛ ɔtemmufo, na ommu me ne wo ntam atɛn, na onhu na onni m’asɛm mma me, na ommu me atɛn nyi me wo nsam.

¹⁶Na Dawid kaa nsɛm yi kyerɛɛ Saul wiei no, Saul kae sɛ: So wo nne ni, me ba Dawid? Na Saul maa ne nne so sui.

¹⁷Na ɔka kyerɛɛ Dawid sɛ: Woteɛ kyɛn me, efisɛ wode papa atua me ka, na me de, mede bɔne matua wo ka.

¹⁸Na woakyerɛ me nnɛ sɛ wo ne me adi no yiye, sɛ AWURADE de me hyɛɛ wo nsa na woankum me.

¹⁹Na sɛ obi to ne tamfo a, ɔbɛma ɔde ne ho sɔnn akɔ anaa? Enti AWURADE ntua wo ka pa nhyɛ nea woayɛ me nnɛ yi ananmu.

²⁰ Na afei, hwɛ, minim sɛ wubedi hene, na Israel ahenni betim, wo nsam;

²¹na afei ka me AWURADE ntam sɛ worentwa m’asefo a wobedi m’akyi ngu, na worempopa me din mfi m’agya fi.

²²Na Dawid kaa Saul ntam no. Na Saul siim kɔɔ fie; na Dawid ne ne nnipa no foro kɔɔ bepɔw so a.