Read Revised Akuapem Twi DC-KYERƐW KRONKRON 1 Samuel 4 Bible Online

1 Samuel 4 - Revised Akuapem Twi DC-KYERƐW KRONKRON bible

1 Samuel 4

¹ Na Samuel asɛm duu Israel nyinaa. Na Israel tu kɔe sɛ wokohyia Filistifo ne wɔn ako; na wɔkɔbɔɔ nsra wɔ Ebeneser, na Filistifo nso bɛbɔɔ nsra wɔ Afek.

²Na Filistifo no twaa mpasua hyiaa Israel, na ɔko no mu trɛwee, na Israelfo dii nkogu Filistifo no anim, na wokum wɔn mu nnipa bɛyɛ mpemnan.

³ Na ɔman no baa nsra no mu no, Israel mpanyin kae sɛ: Ɛdɛn nti na AWURADE ama yɛadi nkogu nnɛ Filistifo anim yi? Momma yɛnkɔfa AWURADE apam adaka no mfi Silo mmra yɛn nkyɛn, na ɛmmra yɛn mu mmegye yɛn mfi yɛn atamfo nsam.

⁴ Ɛnna ɔman no soma kɔɔ Silo kɔsoaa asafo AWURADE a ɔte Kerubim ntam no apam adaka no bae, na Eli mma baanu no, Hofni ne Pinehas, na wɔwɔ Onyankopɔn apam adaka no ho.

⁵Na AWURADE apam adaka no duu nsram hɔ no, Israel nyinaa bɔɔ ose kɛse maa asase wosowee.

⁶Na Filistifo tee osebɔ no, wɔkae sɛ: Hebrifo nsram osebɔ kɛse yi ase ne dɛn? Na wɔtee sɛ AWURADE adaka no aba nsra no mu.

⁷Ɛnna Filistifo no suroe, na wose: Onyankopɔn aba nsra no mu. Na wɔkae sɛ: Buei, yennue! Na ɛmmae sɛɛ pɛn.

⁸Buei, yennue! Hena na obeyi yɛn afi anyame atumfo yi nsam? Eyinom ne anyame a wɔde ɔhaw ahorow haw Misraimfo wɔ sare so no.

⁹ Mo Filistifo, monhyɛ mo ho den, na monyɛ mmarima, na moansom Hebrifo sɛnea wɔsom mo no; enti monyɛ mmarima na monko.

¹⁰Na Filistifo no koe, na Israel dii nkogu, na wɔn nyinaa guanguan kokɔɔ wɔn ntamadan mu; na ɛyɛɛ okunkɛse sɛ, na Israel mu nnipa a wɔnam anammɔn mu ɔpeduasa totɔe.

¹¹Na Onyankopɔn adaka no, Filistifo no fae, na Eli mma baanu no, Hofni ne Pinehas nso totɔe.

¹²Na Benyaminni bi fi mpasua no so tutuu mmirika baa Silo da no ara, na n’atade asunsuane, na dɔte gu n’atifi.

¹³Na odui no, na hwɛ, Eli te agua so kwankyɛn rehwɛ kwan; na Onyankopɔn adaka no nti na ne bo ntɔ ne yam. Na ɔbarima no ba bɛkae, na kurow mu no nyinaa sui.

¹⁴Na Eli tee osu no, ɔkae sɛ: Hooyɛ gyegyeegye yi ase ne dɛn? Na ɔbarima no yɛɛ ntɛm bɛka kyerɛɛ Eli.

¹⁵ Nso na Eli adi mfe aduakron awotwe, na n’ani so ayɛ wusiwusi, na onhu ade yiye.

¹⁶Na ɔbarima no ka kyerɛɛ Eli sɛ: Mene nea ofi mpasua so mebae no. Ɛnnɛ na mifi mpasua no so miguanee. Na ose: Asɛm no te dɛn, me ba?

¹⁷Na ɔbɔfo no buae sɛ: Israelfo adi nkogu Filistifo anim, na wɔakunkum Israelman no mu nnipa pii nso, na wo mma baanu no, Hofni ne Pinehas nso atotɔ, na atamfo no afa Onyankopɔn adaka no.

¹⁸Na ɔbɔɔ Onyankopɔn adaka no din no, Eli fi n’agua so tew faa n’akyi hwee ase ɔpon kɛse no ho, na ne kɔn mu bui, na owui, efisɛ ɔyɛ akwakoraa na ɔyɛ duru. Na wahwɛ Israel so mfe aduanan.

¹⁹Na ne sew, Pinehas yere, anyinsɛn na n’awo bere reyɛ adu. Na ɔtee asɛm no sɛ wɔafa Onyankopɔn adaka no, na n’ase ne ne kunu awuwu no, awoko yaw patu kaa no, na ɔkotow woe amonom hɔ ara, na yaw dodow no nti, owui.

²⁰ Na ɔregyaa mu no, mmea a wogyinagyina ne nkyɛn no ka kyerɛɛ no sɛ: Nsuro, na ɔbarima na woawo yi. Nanso wammua, na wammu.

²¹ Na ɔtoo abofra no din Ikabod, ase ne: Anuonyam wɔ he? Ɛna ose: Ɔfa a wɔafa Onyankopɔn adaka no, ne n’ase ne ne kunu wu no nti, anuonyam no afi Israel kɔ.

²²Enti na ose: Anuonyam apa afi Israel, efisɛ wɔafa Onyankopɔn adaka no.