Read Roman Urdu Geo paidāish 1 Bible Online

paidāish 1 - Roman Urdu Geo bible

paidāish 1

¹ibtidā meṅ allāh ne āsmān aur zamīn ko banāyā.

²abhī tak zamīn wīrān aur ḳhālī thī. wuh gahre pānī se ḍhakī huī thī jis ke ūpar andherā hī andherā thā. allāh kā rūh pānī ke ūpar manḍlā rahā thā.

³phir allāh ne kahā, “raushnī ho jāe” to raushnī paidā ho gaī.

⁴allāh ne dekhā ki raushnī achchhī hai, aur us ne raushnī ko tārīkī se alag kar diyā.

⁵allāh ne raushnī ko din kā nām diyā aur tārīkī ko rāt kā. shām huī, phir subh. yūṅ pahlā din guzar gayā.

⁶allāh ne kahā, “pānī ke darmiyān ek aisā gumbad paidā ho jāe jis se nichlā pānī ūpar ke pānī se alag ho jāe.”

⁷aisā hī huā. allāh ne ek aisā gumbad banāyā jis se nichlā pānī ūpar ke pānī se alag ho gayā.

⁸allāh ne gumbad ko āsmān kā nām diyā. shām huī, phir subh. yūṅ dūsrā din guzar gayā.

⁹allāh ne kahā, “jo pānī āsmān ke nīche hai wuh ek jagah jamā ho jāe tāki dūsrī taraf ḳhushk jagah nazar āe.” aisā hī huā.

¹⁰allāh ne ḳhushk jagah ko zamīn kā nām diyā aur jamāshudā pānī ko samundar kā. aur allāh ne dekhā ki yih achchhā hai.

¹¹phir us ne kahā, “zamīn hariyāwal paidā kare, aise paude jo bīj rakhte hoṅ aur aise daraḳht jin ke phal apnī apnī qism ke bīj rakhte hoṅ.” aisā hī huā.

¹²zamīn ne hariyāwal paidā kī, aise paude jo apnī apnī qism ke bīj rakhte aur aise daraḳht jin ke phal apnī apnī qism ke bīj rakhte the. allāh ne dekhā ki yih achchhā hai.

¹³shām huī, phir subh. yūṅ tīsrā din guzar gayā.

¹⁴allāh ne kahā, “āsmān par raushniyāṅ paidā ho jāeṅ tāki din aur rāt meṅ imtiyāz ho aur isī tarah muḳhtalif mausamoṅ, dinoṅ aur sāloṅ meṅ bhī.

¹⁵āsmān kī yih raushniyāṅ duniyā ko raushan kareṅ.” aisā hī huā.

¹⁶allāh ne do baṛī raushniyāṅ banāīṅ, sūraj jo baṛā thā din par hukūmat karne ko aur chāṅd jo chhoṭā thā rāt par. in ke ilāwā us ne sitāroṅ ko bhī banāyā.

¹⁷us ne unheṅ āsmān par rakhā tāki wuh duniyā ko raushan kareṅ,

¹⁸din aur rāt par hukūmat kareṅ aur raushnī aur tārīkī meṅ imtiyāz paidā kareṅ. allāh ne dekhā ki yih achchhā hai.

¹⁹shām huī, phir subh. yūṅ chauthā din guzar gayā.

²⁰allāh ne kahā, “pānī ābī jāndāroṅ se bhar jāe aur fizā meṅ parinde uṛte phireṅ.”

²¹allāh ne baṛe baṛe samundarī jānwar banāe, pānī kī tamām dīgar maḳhlūqāt aur har qism ke par rakhne wāle jāndār bhī banāe. allāh ne dekhā ki yih achchhā hai.

²²us ne unheṅ barkat dī aur kahā, “phalo phūlo aur tādād meṅ baṛhte jāo. samundar tum se bhar jāe. isī tarah parinde zamīn par tādād meṅ baṛh jāeṅ.”

²³shām huī, phir subh. yūṅ pāṅchwāṅ din guzar gayā.

²⁴allāh ne kahā, “zamīn har qism ke jāndār paidā kare: maweshī, reṅgne wāle aur janglī jānwar.” aisā hī huā.

²⁵allāh ne har qism ke maweshī, reṅgne wāle aur janglī jānwar banāe. us ne dekhā ki yih achchhā hai.

²⁶allāh ne kahā, “āo ab ham insān ko apnī sūrat par banāeṅ, wuh ham se mushābahat rakhe. wuh tamām jānwaroṅ par hukūmat kare, samundar kī machhliyoṅ par, hawā ke parindoṅ par, maweshiyoṅ par, janglī jānwaroṅ par aur zamīn par ke tamām reṅgne wāle jāndāroṅ par.”

²⁷yūṅ allāh ne insān ko apnī sūrat par banāyā, allāh kī sūrat par. us ne unheṅ mard aur aurat banāyā.

²⁸allāh ne unheṅ barkat dī aur kahā, “phalo phūlo aur tādād meṅ baṛhte jāo. duniyā tum se bhar jāe aur tum us par iḳhtiyār rakho. samundar kī machhliyoṅ, hawā ke parindoṅ aur zamīn par ke tamām reṅgne wāle jāndāroṅ par hukūmat karo.”

²⁹allāh ne un se mazīd kahā, “tamām bījdār paude aur phaldār daraḳht tumhāre hī haiṅ. maiṅ unheṅ tum ko khāne ke lie detā hūṅ.

³⁰is tarah maiṅ tamām jānwaroṅ ko khāne ke lie hariyālī detā hūṅ. jis meṅ bhī jān hai wuh yih khā saktā hai, ḳhwāh wuh zamīn par chalne phirne wālā jānwar, hawā kā parindā yā zamīn par reṅgne wālā kyūṅ na ho.” aisā hī huā.

³¹allāh ne sab par nazar kī to dekhā ki wuh bahut achchhā ban gayā hai. shām huī, phir subh. chhaṭā din guzar gayā.