Read Roman Urdu Geo paidāish 11 Bible Online

paidāish 11 - Roman Urdu Geo bible

paidāish 11

¹us waqt tak pūrī duniyā ke log ek hī zabān bolte the.

²mashriq kī taraf baṛhte baṛhte wuh sin'ār ke ek maidān meṅ pahuṅch kar wahāṅ ābād hue.

³tab wuh ek dūsre se kahne lage, “āo, ham miṭṭī se īṅṭeṅ banā kar unheṅ āg meṅ ḳhūb pakāeṅ.” unhoṅ ne tāmīrī kām ke lie patthar kī jagah īṅṭeṅ aur masāle kī jagah tārkol istemāl kiyā.

⁴phir wuh kahne lage, “āo, ham apne lie shahr banā leṅ jis meṅ aisā burj ho jo āsmān tak pahuṅch jāe phir hamārā nām qāim rahegā aur ham rū-e-zamīn par bikhar jāne se bach jāeṅge.”

⁵lekin rab us shahr aur burj ko deḳhne ke lie utar āyā jise log banā rahe the.

⁶rab ne kahā, “yih log ek hī qaum haiṅ aur ek hī zabān bolte haiṅ. aur yih sirf us kā āġhāz hai jo wuh karnā chāhte haiṅ. ab se jo bhī wuh mil kar karnā chāheṅge us se unheṅ rokā nahīṅ jā sakegā.

⁷is lie āo, ham duniyā meṅ utar kar un kī zabān ko darham-barham kar deṅ tāki wuh ek dūsre kī bāt samajh na pāeṅ.”

⁸is tarīqe se rab ne unheṅ tamām rū-e-zamīn par muntashir kar diyā, aur shahr kī tāmīr ruk gaī.

⁹is lie shahr kā nām bābal yānī abtarī ṭhahrā, kyūṅki rab ne wahāṅ tamām logoṅ kī zabān ko darham-barham karke unheṅ tamām rū-e-zamīn par muntashir kar diyā.

¹⁰yih sim kā nasabnāmā hai: sim 100 sāl kā thā jab us kā beṭā arfaksad paidā huā. yih sailāb ke do sāl bād huā.

¹¹is ke bād wuh mazīd 500 sāl zindā rahā. us ke aur beṭe-beṭiyāṅ bhī paidā hue.

¹²arfaksad 35 sāl kā thā jab silah paidā huā.

¹³is ke bād wuh mazīd 403 sāl zindā rahā. us ke aur beṭe-beṭiyāṅ bhī paidā hue.

¹⁴silah 30 sāl kā thā jab ibar paidā huā.

¹⁵is ke bād wuh mazīd 403 sāl zindā rahā. us ke aur beṭe-beṭiyāṅ bhī paidā hue.

¹⁶ibar 34 sāl kā thā jab falaj paidā huā.

¹⁷is ke bād wuh mazīd 430 sāl zindā rahā. us ke aur beṭe-beṭiyāṅ bhī paidā hue.

¹⁸falaj 30 sāl kā thā jab raū paidā huā.

¹⁹is ke bād wuh mazīd 209 sāl zindā rahā. us ke aur beṭe-beṭiyāṅ bhī paidā hue.

²⁰raū 32 sāl kā thā jab sarūj paidā huā.

²¹is ke bād wuh mazīd 207 sāl zindā rahā. us ke aur beṭe-beṭiyāṅ bhī paidā hue.

²²sarūj 30 sāl kā thā jab nahūr paidā huā.

²³is ke bād wuh mazīd 200 sāl zindā rahā. us ke aur beṭe-beṭiyāṅ bhī paidā hue.

²⁴nahūr 29 sāl kā thā jab tārah paidā huā.

²⁵is ke bād wuh mazīd 119 sāl zindā rahā. us ke aur beṭe-beṭiyāṅ bhī paidā hue.

²⁶tārah 70 sāl kā thā jab us ke beṭe abrām, nahūr aur hārān paidā hue.

²⁷yih tārah kā nasabnāmā hai: abrām, nahūr aur hārān tārah ke beṭe the. lūt hārān kā beṭā thā.

²⁸apne bāp tārah kī zindagī meṅ hī hārān kasdiyoṅ ke ūr meṅ intiqāl kar gayā jahāṅ wuh paidā bhī huā thā.

²⁹bāqī donoṅ beṭoṅ kī shādī huī. abrām kī bīwī kā nām sāray thā aur nahūr kī bīwī kā nām milkāh. milkāh hārān kī beṭī thī, aur us kī ek bahan banām iskā thī.

³⁰sāray bāṅjh thī, is lie us ke bachche nahīṅ the.

³¹tārah kasdiyoṅ ke ūr se rawānā ho kar mulk-e-kan'ān kī taraf safar karne lagā. us ke sāth us kā beṭā abrām, us kā potā lūt yānī hārān kā beṭā aur us kī bahū sāray the. jab wuh hārān pahuṅche to wahāṅ ābād ho gae.

³²tārah 205 sāl kā thā jab us ne hārān meṅ wafāt pāī.