Read Roman Urdu Geo paidāish 12 Bible Online

paidāish 12 - Roman Urdu Geo bible

paidāish 12

¹rab ne abrām se kahā, “apne watan, apne rishtedāroṅ aur apne bāp ke ghar ko chhoṛ kar us mulk meṅ chalā jā jo maiṅ tujhe dikhāūṅgā.

²maiṅ tujh se ek baṛī qaum banāūṅgā, tujhe barkat dūṅgā aur tere nām ko bahut baṛhāūṅgā. tū dūsroṅ ke lie barkat kā bāis hogā.

³jo tujhe barkat deṅge unheṅ maiṅ bhī barkat dūṅgā. jo tujh par lānat karegā us par maiṅ bhī lānat karūṅga. duniyā kī tamām qaumeṅ tujh se barkat pāeṅgī.”

⁴abrām ne rab kī sunī aur hārān se rawānā huā. lūt us ke sāth thā. us waqt abrām 75 sāl kā thā.

⁵us ke sāth us kī bīwī sāray aur us kā bhatījā lūt the. wuh apne naukar-chākaroṅ samet apnī pūrī milkiyat bhī sāth le gayā jo us ne hārān meṅ hāsil kī thī. chalte chalte wuh kan'ān pahuṅche.

⁶abrām us mulk meṅ se guzar kar sikam ke maqām par ṭhahar gayā jahāṅ morih ke balūt kā daraḳht thā. us zamāne meṅ mulk meṅ kan'ānī qaumeṅ ābād thīṅ.

⁷wahāṅ rab abrām par zāhir huā aur us se kahā, “maiṅ terī aulād ko yih mulk dūṅgā.” is lie us ne wahāṅ rab kī tāzīm meṅ qurbāngāh banāī jahāṅ wuh us par zāhir huā thā.

⁸wahāṅ se wuh us pahāṛī ilāqe kī taraf gayā jo bait-el ke mashriq meṅ hai. wahāṅ us ne apnā ḳhaimā lagāyā. maġhrib meṅ bait-el thā aur mashriq meṅ aī. is jagah par bhī us ne rab kī tāzīm meṅ qurbāngāh banāī aur rab kā nām le kar ibādat kī.

⁹phir abrām dubārā rawānā ho kar junūb ke dasht-e-najab kī taraf chal paṛā.

¹⁰un dinoṅ meṅ mulk-e-kan'ān meṅ kāl paṛā. kāl itnā saḳht thā ki abrām us se bachne kī ḳhātir kuchh der ke lie misr meṅ jā basā, lekin pardesī kī haisiyat se.

¹¹jab wuh misr kī sarhad ke qarīb āe to us ne apnī bīwī sāray se kahā, “maiṅ jāntā hūṅ ki tū kitnī ḳhūbsūrat hai.

¹²misrī tujhe dekheṅge, phir kaheṅge, ‘yih is kā shauhar hai.’ natīje meṅ wuh mujhe mār ḍāleṅge aur tujhe zindā chhoṛeṅge.

¹³is lie logoṅ se yih kahte rahnā ki maiṅ abrām kī bahan hūṅ. phir mere sāth achchhā sulūk kiyā jāegā aur merī jān tere sabab se bach jāegī.”

¹⁴jab abrām misr pahuṅchā to wāqaī misriyoṅ ne dekhā ki sāray nihāyat hī ḳhūbsūrat hai.

¹⁵aur jab fir'aun ke afsarān ne use dekhā to unhoṅ ne fir'aun ke sāmne sāray kī tārīf kī. āḳhirkār use mahal meṅ pahuṅchāyā gayā.

¹⁶fir'aun ne sāray kī ḳhātir abrām par ehsān karke use bheṛ-bakriyāṅ, gāy-bail, gadhe-gadhiyāṅ, naukar-chākar aur ūṅṭ die.

¹⁷lekin rab ne sāray ke sabab se fir'aun aur us ke gharāne meṅ saḳht qism ke amrāz phailāe.

¹⁸āḳhirkār fir'aun ne abrām ko bulā kar kahā, “tū ne mere sāth kyā kiyā? tū ne mujhe kyūṅ nahīṅ batāyā ki sāray terī bīwī hai?

¹⁹tū ne kyūṅ kahā ki wuh merī bahan hai? is dhoke kī binā par maiṅ ne use ghar meṅ rakh liyā tāki us se shādī karūṅ. dekh, terī bīwī hāzir hai. ise le kar yahāṅ se nikal jā!”

²⁰phir fir'aun ne apne sipāhiyoṅ ko hukm diyā, aur unhoṅ ne abrām, us kī bīwī aur pūrī milkiyat ko ruḳhsat karke mulk se rawānā kar diyā.